Read Kissi 1Dɛnnda lemasalan 21 Bible Online

1Dɛnnda lemasalan 21 - Kissi bible

1Dɛnnda lemasalan 21

¹Paale pilɛ, mí Setana can le Israɛlla tɛɛmbuuo. Mó luei David yiyanndo nin le Israɛlla diolan sɛvaa.

²Mí David dimul Yoab a simlacia vanaa cɔwva aa: «La kɔ mì la cɔm Israɛlla tɛ́kpɛ́-tɛ́kpɛ́, kandɔɔ Bɛɛr-Seba kɔlan háá Dan, o kon mì la hun downun ya kona. Kani i yeema mì sina mɛɛ nda co kpow yɛ.»

³Mí Yoab mulul ndu aa: «Màá Mɛlɛka cɔɔlu vanaa nɔmnda kui ma va sɛ́lɛ́ háá kundalan kɛmɛ! Òó masaa, vana ni bɛndoo! Vɛ̀ɛ̀ o co vanaa nɔmaa baalaa le nda co kpow le? Le kɔlɔ yɛɛ nɔm vana ni bɛndoo yeema yɛ le sinaa mɛɛ nda co yɛ? O co Israɛlla le n co lueiyo o pɔwlan nin nuaa le?»

⁴Kɛ mí masaa baŋ Yoab vomɔɔ o vem ndu-o tosaa. O kon mí Yoab can, mó kɔ balu lɛŋnde Israɛl-ten kpow, mó muungu Yerusalɛm.

⁵Mí Yoab hun downun David kona mɛɛ o cɔm vannda yɛ: o lɛŋnde Israɛl-ten nin kpede, mó cɔm vannda milionndo o pilɛ a vannda vaalan kɛmɛ (1 100 000), handɔɔ o n'van vaala kɛmɛ lehiɔɔlu a belaŋɔmmɛvaa va Yuda-a coo. Nda kpow, vanaa cɔvaa ndáà caa mɔɛi cɔwve hiŋndo-a nda va ni.

⁶Kɛ o vannda ha tɛɛn, Yoab ndóò sɛva polale Levii len a polale Bɛnyamɛn-nden diolan te, kani o va a kɔl tambɛiyo taw le baŋɔɔ masaa baŋ mó viam ndu-o.

⁷Mí dɛnɛ kon nɛinun Hala. O kon, mó saangiaa Israɛlla.

⁸Mí David dimul Hala aa: «I cua hakio taw. I tosa bɔɔ dɛnɔɔ maa diɔm. Lelan Mɛlɛka, mal-la haki yandi, ya vana nɔm baalaa.»

⁹Mí Mɛlɛka dimul Kad, vana-tɛɛngaa-diom Hala-o, ó va vana silaa David-o-o aa:

¹⁰«Kɔ o David lo, ma tɛɛngul ndu diom Mɛlɛka dimi-o aa: ‹Má cè sangalan ndan tan yáá! Hɛli o pilɛ, mì tuisi nɔm ndu coo.›»

¹¹Mí Kad kɔa o David lo, mó dimul ndu aa: «Mɛlɛka dimi aa:

¹²‹Vaa a yiaan o vɔsilan tan yáá bɛngu-ou, yaamɔaa nɔmnda nɔm cɔlɔbaa a mɔɔn cɔwvon o paangon mún yáá bɛngu-ou, ndu Mɛlɛka nɔm sangalan tuisio coo o palɛi ndii yáá bɛngu, mó tuisi nàà halimaa, mo vem mɛlɛkanɔ ndɔɔ, mo diw vanaa nɔmnda a mɔɛi cɔwve o lɛŋnde Israɛl-ten nin kpow-ou, ɔ́ɔ̀ o n hɛli-o?› Yiyan, ma dimul-la ɲɛ ya kɔ dimul vana vem ya-o-o.»

¹³Mí David mulul Kad aa: «Mɔnɛi co ya taw! Kɛ, o co fisa mì del Mɛlɛka o ba, kani ɲíí ndɔɛi co i bɔɔ. Kɛ i yeema mì del vanndacieea o ba le few.»

¹⁴O kon, mí Mɛlɛka tuisi nàà halimaa o lɛŋnde Israɛl-ten coo, mí vannda vaalan belaŋɔmmɛw a vu.

¹⁵Mí Mɛlɛka viam mɛlɛkanɔɔ Yerusalɛm le kobi kalaa tɛɛmbuuo. Kɛ o lo ndu tɛɛmbuuo, mí Mɛlɛka tofa, mí mɔnɛi bii ndu a dɛnɛ kon, mó dimul mɛlɛkanɔ tɛɛmbua kon aa: «O va nihau nuaa! Tuisi ba nɔmndo.» A telen kon, mɛlɛkanɔ Hala-o va isisi o kpele lɔaa n'mal Ɔrnan[34] Yebusiinɔ-o ikɛi.

¹⁶Mí David heelu hɔlla, mó ca mɛlɛkanɔ Hala-o, o va halataalaa a lɛŋnden tɛɛn, mɔɛi cɔwve va ndu o ba, i ve o boo nin te. Mó muli ndi hɔlla a kpengii kobio Yerusalɛm. O kon, mí David a kaasoŋaa kɔlkalua va a yalala yuululan lekɔɔ-a deli, má kuumbu hɔlla lɛŋ.

¹⁷Mí David dimul Hala aa: «Vɛ̀ɛ̀ o co ya le vem vannda le vanaa cɔwva cɔmndo le? I pɔw mí tosa hakio. Vannda ha yɛ, a tɛɛmbuu ɲɛ-ɲɛ le. Éé Mɛlɛka! Hala nuu, màá kɔl nɔm tambɛiyo tol-la coo a yungu nuu! O bɛnda ma tuisi sanga kon vanaa nɔmnda coo le.»

¹⁸Mí mɛlɛkanɔ Hala-o soaa o Kad lo le David dimullo mo kɔ cow Mɛlɛka fonda-loamaa-lasálàá o kpele lɔaa n'mal Ɔrnan, Yebusiinɔ-o coo.

¹⁹Mí David kɔa maa mɛɛ Kad tɛɛngul ndu sɔɛi ken o diola Mɛlɛka lan yɛ.

²⁰Ɔrnan va malun ndɔn lɔɔ telen kon, mó mulin, mó ca mɛlɛkanɔɔ. Mí poaa ndɔa hiɔɔlu-a va ndu ikɛi-ya a kɔ viannun.

²¹Lɔ́ɔ́ David tiiya Ɔrnan ikɛi-yo, mí Ɔrnan tofa, mó ca ndu, mó faŋan o kpele lɔaa n'mallo nin, mó kɔ baŋ vulan David o hɔl, mó tundu hɔlla háá lɛŋ.

²²Mí David dimul Ɔrnan aa: «Ke ya kpele lɔaa n'mal nɔmndo ho mi cow Mɛlɛka fonda-loamaa-lasálàá. Ke ya ndu mì pendu ndu mɛɛ vɔngu ndɔɔ co yɛ, haliko mi dɛnɛ palaa hoo faŋan vannda coo.»

²³Mí Ɔrnan mulul David aa: «Vana bɛndoo, masa nuu! Má cè ndu! Tosa ɲɛ hɛnan nɔm-ndo. Tofa vɔ navaa nia, i ke nɔm nda le sálà loamaa solio, i ke nɔm ɲɛla ɲaanannda soa nan-ndan le yɔmnde. Má cè vɛlɛ maalon le sálà kpeyanndo solio! I yɔngu nɔm ɲɔɔn mun kpow.»

²⁴Mí masaa David dimul Ɔrnan aa: «Ɛ-ɛ, i yeema mi pendu fondaa ho mɛɛ vɔngu ndɔɔ co o volion nin yɛ. Kani i yeema mi ke Mɛlɛka ɲɛ co le nɔm ndo le. I yeema vɛlɛ mi solul ndu sálàla loamaala ya dow vɔngu le lan te.»

²⁵Mí David yɔngu Ɔrnan sianin latámán kɛmɛ leŋɔmpum le fonda kon.

²⁶Mí David cɔaw fonda-loamaa-lasálàá o fonda kon le Mɛlɛka, mó soli sálàla loamaalan a sálàla kɔlɲululan lecoo. O kon kɔɔli, mó piɛi Mɛlɛka, mí Mɛlɛka mulul ndu, mó tuisi yinnden fulaa o halataala le sálàla va o fonda-loamaa-lasálàá coo lan lomɔɔ.

²⁷O kon kɔɔli, mí Mɛlɛka dimul mɛlɛkanɔɔ le mɔɛi ndɔɛi cɔwve mingio o boo nin.

²⁸Mɛɛ David ce mɛɛ Mɛlɛka mulul ndu telen kon o kpele lɔaa n'mal Ɔrnan Yebusiinɔ-o nin yɛ, mó va niko ndu sálàlan solullo lɔ́ɔ́-lɔ́ɔ̀ o fonda kon coo.

²⁹Telen kon yɛ, Calta Mɛlɛka lan, la Moise ndóò tangul o lɛŋnde veselɛilen nin-ndan a fonda-loamaa-lasálàá, la va vɔ o fonda biilaa nin Kabaɔn.

³⁰Kɛ David ndóò tiw-vɔ ba le kɔlan o fonda-loamaa-lasálà kon le Hala isɔɔ ɲuna le, kani siòònde va vɔ ndu taw a mɔɛi cɔvii mɛlɛkanɔ Hala-o-e.