Read Kissi 1Dɛnnda lemasalan 22 Bible Online

1Dɛnnda lemasalan 22 - Kissi bible

1Dɛnnda lemasalan 22

¹O kon, mí David dimi aa: «Nanu Cɛi-Mɛlɛka-o vanin ni, Hala pɛɛn. Nanu koni fonda-loamaa-lasálàá vanin vɛlɛ le Israɛlla sálàla loamaalan solio lecoo ni.»

²Mí David viam vannda le mialaa va o lɛŋnde Israɛl-ten nin-nda bɔɔŋiaa. Mó hɛli vanaa sialaa lapowva nda tɛɛn, mó baŋ nda powtan siɔlɔɔ le Cɛi-Hala-o tangullo.

³Mí David cuungiaa cilinndon taw le pɔɔndɔɔn toosiaa, le koŋnda bɛndula ladiolan a sɔkɔan baŋɔɔ, mó cuungiaa vɛlɛ daɲan kunda bɛndoo, vanáà nɔla mun tuu le.

⁴Mó cuungiaa vɛlɛ yɔmii sɛɛdrei kunda bɛndoo taw, vanáà cii ndi cɔm te. Sidɔnnda a vanaa fula Tir-a vili yɔmii ken ni.

⁵David va diminndo o kɔl aa: «Salomɔn po ni co vɔ cuaambɔ, o bii-yɔ ɲɛ-ɲɛ bila le. Nduyɛ, Cɛi-Hala co hunɔɔ tangulɔn le Mɛlɛka-o fulanin tɔ́ɔ́ taw o lɛŋnden nden kpow nin, le va o vanin o bɔɔ-o a le biilu ndɔ bɛndoo. Lelan mɛɛ mi cuungian taw le ndu tangullo.» Le hee, lɔ́ɔ́ pá mí David vu, mó cuungian fɔlɔn ɲɛkɛndɛi.

⁶Mí David veelu Salomɔn po ndɔ, mó dimul ndu le Cɛi-Mɛlɛka-o tangullo, Hala Israɛlla pɛɛn.

⁷Mí David dimul Salomɔn aa: «Po nuu, yáà yeema le Mɛlɛka Hala nuu cɛiyo tengullo,

⁸kɛ mí Mɛlɛka dimul-la aa ya diw vannda taw, aa ya tosa vɛlɛ cɔwlan taw. Le tùú ya diw kon vannda mí sɛŋi koovan taw-vo, aa ya bɛnda mì tangul cɛiyo le ndu Mɛlɛka le.

⁹Kɛ aa ya vialunin poo, vana kɔlɲuloo o vanin ni. Ndu Mɛlɛka kenin po kon pɛngio, mò baŋa ndu yaamɔaa o vanin tɛɛn-nda kpow o ba. Salomɔn o nɔnin diolan ni. O masale ndɔlen bɛngu ndu Mɛlɛka kenin Israɛlla kɔlɲuloo a pɛngio ni.

¹⁰Ndu tangulnin cɛiyo le diola Mɛlɛka lan ni. O vanin poo le ndu Mɛlɛka, mì ndu Mɛlɛka va fuɲaa le ndu. O kenin masale ndɔlen kpaayaa o lɛŋnde Israɛl-ten nin le lɔ́ɔ́-lɔ́ɔ̀.

¹¹Lelan, po nuu, maa Mɛlɛka va nɔm ikɛi, haliko ma tiwba Cɛi-Mɛlɛka Hala nɔmndo tangullo, maa mɛɛ o dimi sɔɛi ken le nɔm yɛ!

¹²Màá o ke nɔm taasio a kɔlkaloo telen o kenin nɔm masalen Israɛlla coo-o, haliko ma bii tɔŋnda ndɔlan!

¹³Taa bii pɛ silalan a tɔŋnda Mɛlɛka yɔngu Moise le Israɛlla lan, mà kela lecoo, mɛɛ dɛnnda nɔmndan kpow la naŋnin. Lueí yoomuan ma sim yili. Siòòŋii bii nɔm te, ɲiiya le.

¹⁴Tofa vɔ, i kindin, mí cuungiaa ɲɛm baalan le Cɛi-Mɛlɛka-o tangullo: sianion hiow kilolan milionndan tan yáá, volin latámán mún mun hiow kilolan milionndan beleyaa, daɲan a cilinndon mun cuu cɔm te. Mí cuungiaa vɛlɛ yɔmnde a powtan, nɔm handunin vɛlɛ lecoo.

¹⁵Vanaa baalaa co nɔm ikɛi taw: vanaa sialaa lapowva, vanaa cuaa layindɔa a vanaa caa baalala súú-súù ka tosaa-a.

¹⁶Sianion, volion a daɲan cuu cɔm te. Lelan, cɔn ma tosa baala. Màá Mɛlɛka va nɔm ikɛi!»

¹⁷Mí David yoongu simlacia Israɛl kpow le Salomɔn po ndɔ malaa.

¹⁸Mó ɲuna nda aa: «Vɛ̀ɛ̀ Mɛlɛka, Hala niaa co niaa ikɛi le? Vɛ̀ɛ̀ o co ndu le yɔngu niaa pɛngio mì la vannun yili le? Kani ndu mal vanaa-mangalaa-isɔaa va o lɛŋnden nden nin-nda ya o ba ni. Sisa, vanaa kan co Mɛlɛka a vanaa ndɔa o ba bɛngu.

¹⁹La handu niko kɔlta niaalan a yiyannda niaalan kpow Mɛlɛka Hala niaa coo. La cɔn mì la tangul Fonda-Diandaa Mɛlɛka Hala-o. O cɛi kon nin niaa lueinin kesu kpema Mɛlɛka-o a ɲɛm baalan siŋnun teengen le ndu Mɛlɛka-on ni, o niaa tangulnin kon o diola ndɔla lan-ndo.»