Read Kissi 1Dɛnnda lemasalan 23 Bible Online

1Dɛnnda lemasalan 23 - Kissi bible

1Dɛnnda lemasalan 23

¹Lɔ́ɔ́ David yuuva taw-taw-o, mó suili Salomɔn po ndɔ masaa Israɛlla coo.

²Mó cuungiaa vɛlɛ simlacia Israɛl kpow nɛɛ pilɛ, handɔɔ o vanaa-solia-lasálàá a leviia coo.

³Má cɔm leviia, áà nɔ vɔsilan kandɔɔ beleyaa-a haa a lecoo-a a pilɛn-pilɛnnda, má bɛnda faw-faw vannda vaalan beleyaa a laŋɔmaa (38 000).

⁴Mí David hɛli vannda vaalan bidiin a lahiɔɔlu (24 000) le hɔlla landɔɔ o baala Cɛi-Mɛlɛka-o coo, vannda vàálan tan ŋɔmpum (6 000) le simlacilen a le yaman kiolɔɔ,

⁵vannda vàálan tan hiɔɔlu (4 000) le diola luɛyaalan cumullo, vannda vàálan tan hiɔɔlu (4 000) vɛlɛ le Mɛlɛka biiloo a ɲɛm-caan ndáà cɔw le ndu sangalaa-on.

⁶Mó piɔw leviia a kundalan lapilɛn-pilɛn mɛɛ nda va a yungulan yɛ: kunda Kɛrsɔn-ndo, kunda Kehat-o a kunda Merari-o. Kundala yɛ́-yɛ́la lan, o yungula fula o polale Levii len nin-ndan nin ndáà fula ni.

⁷Poaa Kɛrsɔn-nda a yɔŋnun Laedan[35] nda Simei ni.

⁸Mí Laedan vialu poaa nda yáá: Yehiɛl yɔŋnun po tasoo ni, o kon kɔɔli, Setam a Yɔɛl.

⁹Faw-faw, mí Simei vialu poaa nda yáá: Selomit, Hasiɛl a Haran. Haa yɔŋnun simlacia o yungula fula o polale Laedan-nden coo-a ni.

¹⁰Poaa hiɔɔlua Simei velu-a a yɔŋnun Yahat, Siisa[36], Yeus a Beria ni.

¹¹Yahat va po tasoo ni, o diinndɔɔ Siisa. Yeus a Beria ndáà vilu poaa bɔɔ le, lelan má mɔsɔŋan, má sɛva nda yungoo ndu pilɛ.

¹²Mí Kehat vialu Amram, Yisehar, Hebrɔn a Usiɛl, faw-faw poaa nda hiɔɔlu.

¹³Poaa Amram-nda a yɔŋnun Aarɔn nda Moise ni. Má kɛsi Aarɔn nda polale ndɔlen teengen le lɔ́ɔ́-lɔ́ɔ̀, le ɲɛm diandaa-diandan mandaa, a le Mɛlɛka sálàlan solullo, le baala ndɔɔ tosaa a le duaalan dɔvɔɔ lɔ́ɔ́-lɔ́ɔ̀ o diola Mɛlɛka lan.

¹⁴Kɛ má handu poaa Moise, vana baala Hala-o-a, o polale Levii len coo.

¹⁵Poaa Moise-a a yɔŋnun Kɛrsɔn a Eliesɛr ni.

¹⁶O poaa Kɛrsɔn-nda nin Sebuɛl va o tasoo ni.

¹⁷Mí Eliesɛr vialu Rehabia ndu pilɛ kpé, o sɔla lɛ poaa celen te. Kɛ mí Rehabia ndu vialu poaa taw.

¹⁸O poaa Yisehar-a nin Selomit yɔŋnun po tasoo ni.

¹⁹Poaa Hebrɔn-nda: Yeriyahu yɔŋnun po tasoo ni, o diinndɔɔ Amaria, o yàándɔɔ Yahasiɛl, o hiɔɔlundɔɔ Yekamean.

²⁰Poaa Usiɛl-la a yɔŋnun haa ni: o tasoo Mika, o diinndɔɔ Yisiya.

²¹Poaa Merari-a yɔŋnun Mahli a Musi ni. Mí Mahli vialu Eleasar a Kis.

²²Mí Eleasar vu, o mɛi hɔ́ɔ́ piaandu le, fɔ a laandua daama. Mí puapilɛa ndaa, poaa Kis-a a yil cuavaa kan o nɔ̀lan.

²³Mí Musi vialu poaa nda yáá, nda yɔŋnun haa ni: Mahli, Edɛr a Yeremɔt.

²⁴Haa yɔŋnun poaa Levii-a ni, nda va bolii lapangɛi o yungula ndala yɛ́-yɛ́lan coo ni. Lende ndáà sɛva nda telen nda va nda cɔmndo a pilɛn-pilɛnnda-o ni. Vanaa ndáà sɔla vɔsilan bidiin, te kon te bidiin a ɲɛ lecoo, má va baalaa tosaa o Cɛi-Mɛlɛka-o nin-nda pɛɛn.

²⁵Kani mí David ndóò dimi aa: «Mɛlɛka, Hala Israɛlla cii vanaa ndɔa pɛngio ke. Ndu Mɛlɛka vanin Yerusalɛm le lɔ́ɔ́-lɔ́ɔ̀.

²⁶Le hee, leviia cue lɛnin Calta Mɛlɛka lan a ɲɛm-laandun baalan ndɔn le balɔɔ a mun te.»

²⁷O silala mɛɛlala David lan nin, mó dimi aa le leviia cɔmndo, mɛɛ mi levinɔɔ ndóò nɔ vɔsilan kandɔɔ bidiin a hiovɔɔ bidiin coo.

²⁸Baalala nda va tosaa poaa Aarɔn-nda ikɛi o Cɛi-Mɛlɛka-o nin-ndan la yɔŋnun ndan ni: bɛ́ɛ̀lan dindio, cɛila leninndan dindio a ɲɛm siŋnun teengen-ndon kpow dindio. A va vɛlɛ baalala celen tosaa o Cɛi-Hala-o nin:

²⁹bulu sálà ndáà kɛsi Mɛlɛka o hɔl-lo, kpeyanndo le sálàla ɲɛm-vaalan, dɛɛ toaŋaa toosian a lɛvɛn too, a dɛɛ tuɛyaa, a fùlúfúlùla muulianndan kpow. Ndáà tofa ɲɛla tuvaalan a lusulta ndalan kpow ni.

³⁰Idii a icɔl, a va hunɔɔ Mɛlɛka biiloo a ndu sangalaa.

³¹O palɛi pɛngiɛi coo, o kafola paangun sɛnɛilan a o kafola tɔ̀lan coo, ndáà solul Mɛlɛka sálàla loamaalan ni mɛɛ la va lakialaa le nda o tɔŋndo nin le lɔ́ɔ́-lɔ́ɔ̀ yɛ.

³²Ndáà bɛnda le cɛi-kola-toandaa-labɔɔŋianndo a Fonda-Diandaa mandaa ni. Puapilɛa ndaa, poaa Aarɔn-nda va nda hɔlten coo o baala Cɛi-Hala-o nin.