Read Kissi 1Dɛnnda lemasalan 26 Bible Online

1Dɛnnda lemasalan 26 - Kissi bible

1Dɛnnda lemasalan 26

¹Mí kpalilaa cumulaa ladioa bɛɛ piɔvan kundalan: A fula o polale Kore len nin-nda, mí Meselemia, po Kore-o, ó va vana pilɛ o poaa Asaf[39]-a tɛɛn-ndo,

²vialu poaa nda ŋɔmmɛw. Nda yɔŋnun haa o polalen ni: Sakari, Yediaɛl, Sebadiahu, Yatniɛl,

³Elam, Yohanan a Elioenai.

⁴Mí Obɛd-Edɔm vialu poaa nda ŋɔmaa, nda yɔŋnun haa a polalen ni: Semaya, Yehosabad, Yoah, Sakar, Netaneɛl,

⁵Amiɛl, Isakar, a Peultai. Kani Hala ndóò dɔw ndu duaa.

⁶Mí Semaya po ndɔ bɛɛ vialu poaa, mí poaa kan siŋnun bolii lapangɛi o yungula ndalan nin, kani vanaa sɔvɛa nda va ni.

⁷Poaa Semaya-a a yɔŋnun Ɔtni, Refaɛl, Obɛd a Ɛlsabad ni. Vanaa sɔvɛa puapilɛa ndaa ŋiɔnda bɛɛ yɔŋnun ni, Elihu nda Semakia pɛɛn.

⁸Haa kpow va poaa Obɛd-Edɔm-nda ni, vanaa sɔvɛa poaa ndaa a puapilɛa ndaa yɔŋnun ni, ndáà nɔ vɛlɛ yoomuan taw o baalala ndalan nin. Faw-faw, a va n'van belaŋɔmpum a vanaa ŋiɔn.

⁹Poaa Meselemia a puapilɛa ndɔa faw, a va n'van tɔ́ a vanaa ŋɔmaa, vanaa sɔvɛa nda va ni.

¹⁰Mí Hosa po Merari-o vialu poaa nda hiɔɔlu: Simri va simlacinɔɔ ni, kɛ o ve po tase le. Fuɲa ndɔ siinguu ndu simlacinɔɔ ni.

¹¹Hilkiya va o diinndɔɔ ni, o yàándɔɔ Tabelia, o hiɔɔlundɔɔ Sakari. Faw-faw, poaa Hosa-a a puapilɛa ndaa a va n'van tɔ́ a vanaa yaa.

¹²Kundala kpalilaa cumulaa ladioa ha, simlacia ndaa a puapilɛa ndaa va Cɛi-Mɛlɛka-o cumullo ni.

¹³Má mal siondei mɛɛ yungula ndalan la va yɛ le diola luɛyaala ndáà bɛnda le cumullo lan piɔwvo cuaambɔa a kaasonnda tɛɛn kpen-kpen.

¹⁴Mí sionnden le bii Selemia le dio va a ba paalen le can-ndo-o cumullo. Má mal vɛlɛ siondei le Sakari po ndɔ, vana kɔlkaloo o va ni, mí ndu sɔla dio va a ba luaŋ-ndo-o.

¹⁵Mí Obɛd-Edɔm ndu sɔla dioo a ba too, mí poaa ndɔa nda sɔla cɛi mandaa lavolɔɔ le cumullo.

¹⁶Mí Supim nda Hosa nda nda piɔvian dio va a ba paalen le del-lo-o a dio nɔ diolan aa Salekɛt-o le cumullo. Dio kon va o nɛi heelu-o ikɛi. Tofa vɔ mɛɛ kpalilaa cumulaa kan ndáà piɔvian kundalan yɛ:

¹⁷Lepalaa-lepala, leviia nda ŋɔmpum a va cumullo o dio luɛyaa va a ba paalen le can-ndo ni, nda hiɔɔlu va o dio va a ba luaŋ-ndo-o ni, nda hiɔɔlu va o dio va a ba too ni. Má piɔvan kundala vanaa ŋiɔn-ŋiɔnndan tan tiɔn o cɛila mandaa lavolɔɔlan sondoo.

¹⁸Má kɛsi vanaa hiɔɔlu o nɛi le cɛi pɔmbɔ va a ba paalen le del-lo-o cumullo, má kɛsi vanaa ŋiɔn o cɛi kalaa nin.

¹⁹Haa va o kundala kpalilaa cumulaa ndáà sɛva diolan o polale Kore len nin a o polale Merari len nin-nda ni.

²⁰Leviia tɔ̀a nda, má kɛsi nda hɔlten o bolofaa va o Cɛi-Hala-o nin-ndo coo a o bolofaa ɲɛm kea coo[40].

²¹Vanaa va bolofaa mandaa o Cɛi-Mɛlɛka-o nin o poaa Laedan-nda tɛɛn, má va bolii lapangɛi o polale Kɛrsɔn-nden nin-nda a yɔŋnun Yehieli,

²²nda poaa ndɔa ni, Setam a Yɔɛl puapilɛ ndɔ pɛɛn.

²³O vanaa fula o polama Amram, Yisehar, Hebrɔn a Usiɛl lan nin-nda tɛɛn yɛ,

²⁴Sebuɛl va vana lebollo o bolofaa kpow coo ni. Moise velu Kɛrsɔn ni, mí Kɛrsɔn vialu Sebuɛl kon.

²⁵Poaa ndɔa a yɔŋnun haa o puapilɛa ndɔa velun o polole Eliesɛr len nin-nda tɛɛn ni: Rehabia, Esai, Yoram, Sikri a Selomit.

²⁶Selomit nda puapilɛa ndɔa a va ɲɛm diandan mandaa ni, ɲɛm diandan mun pɛɛn, n masaa David, vanaa va bolii lapangɛi-ya, simlacia vanaa cɔvaa kundala n'van kɛmɛ-kɛmɛa, kundala n'van vaa pilɛa a simlacia vanaa cɔvaa tɔ̀a kpow a siinguu teengen le Mɛlɛka-on.

²⁷Má siinguu ɲɛm nda poondiaa o cɔwvo-on n'pum teengen le Cɛi-Mɛlɛka-o bɛɛndiaa.

²⁸Ɲɛm Samiɛl vana-tɛɛngaa-diom Hala-o, Saul po Kis-o, Abnɛr po Nɛr-o a Yoab po Seruya-o ndáà siinguu teengen le Hala-on kpow, Selomit nda puapilɛa ndɔa a va mun mandaa ni.

²⁹O polale Yisehar len coo, Kenania a poaa ndɔa va sɔɔn tɔ̀un bɛɛndiaa Israɛlla tɛɛn ni, a va maa n'simlaci a vanaa kialaa n'yama.

³⁰O poaa Hebrɔn-nda tɛɛn, Hasabia nda puapilɛa ndɔa, a va faw vannda vàá pilɛ kɛmɛ leŋɔmmɛw, vanaa sɔvɛa nda va ni. Ndáà nɔ hɔlten o sɔɔn Hala-on a o sɔɔn masaa kpow coo o lɛŋnde Israɛl-ten nin Yurdɛn a ba paalen le del-lo ni.

³¹Yeriya va simlacinɔɔ Hebrɔnnda coo ni. O vɔsi hiɔɔlundɔɔ o masale David len nin, mí vannda yaasiaa dɛnɛ polale vialaale yungula vanaa kan, má komal vanaa mayoomua Yaesɛr, o tàndá Kalaad-o nin.

³²Yeriya a puapilɛa ndɔa a va vàálan tan tiɔn a kɛmɛ leŋɔmmɛw (2 700), nda kpow vanaa sɔvɛa a vanaa va bolii lapangɛi o yungula ndalan nin-nda nda va ni. Mí masaa David kɛsi nda le sɔɔn Hala-on a sɔɔn masaa bɛɛndiaa vanaa fula o polale Rubɛn-nden nin-nda, vanaa fula o polale Kad len nin-nda, a vanaa fula o polale tálále Manase len nin-nda coo.