Read Kissi 1Dɛnnda lemasalan 27 Bible Online

1Dɛnnda lemasalan 27 - Kissi bible

1Dɛnnda lemasalan 27

¹Diola Israɛlaa va baalaa masaa ikɛi-ya la co lan ni: vanaa va bolii lapangɛi o yungula ndalan nin, má va simlacia kundala vanaa cɔvaa n'van vaa-vaa a kundala n'van kɛmɛ-kɛmɛa coo-a pɛɛn. Le vɔsio kpow baala ndaa va le vanaa cɔwva piɔwvo a kundalan ni, kunda oo kunda paangii ndɔ. O kunda oo kunda nin, vanaa cɔwva va vaalan bidiin a lahiɔɔlu.

²Yasobeam, po Sabdiɛl-lo va simlacinɔ kunda tasoo, o paangii tasei nin ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

³O polale Perɛs len nin ndóò fula ni, ndu va simlacinɔ vanaa cɔwva kpow o paangii ken nin ni.

⁴Dodai Ahohiinɔ va kunda va le paangii diinndɔɛi-yo bollen ni, mí Miklɔt va ndu ikɛi. Vanaa cɔwva vaalan bidiin a lahiɔɔlu a va o kunda ndɔɔ nin ni.

⁵Benaya, po Yehoyada vana-solia-lasálàá-o, va simlacinɔ kunda yàándɔɔ le paangii yàándɔɛi ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

⁶Benaya kon yɔŋnun kuubanɔ pilɛ o n'van beleyaa tɛɛn, mó va nda bollen ni. Telen o siŋnun simlacinɔɔ-o, mí Amisabad po ndɔ muungu o fonda ndɔɔ.

⁷Asaɛl, puapilɛ Yoab-o va simlacinɔ hiɔɔlundɔɔ o paangii hiɔɔlundɔɛi nin ni. Ndu faŋanndo, mí Sebadia po ndɔ muungu o fonda ndɔɔ. Vanaa cɔwva vaalan bidiin a lahiɔɔlu a va o kunda ndɔɔ nin ni.

⁸O ŋuɛɛnundɔɔ, le paangii ŋuɛɛnundɔɛi yɔŋnun Samehut fula o polale Yisra len nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

⁹O ŋɔmpumndɔɔ, le paangii ŋɔmpumndɔɛi yɔŋnun Ira, po Ikes fula Tekoa-o ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹⁰O ŋɔmmɛwndɔɔ, le paangii ŋɔmmɛwndɔɛi yɔŋnun Helɛs fula Pelɔn, o polale Efraim-nden nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹¹O ŋɔmaandɔɔ, le paangii ŋɔmaandɔɛi yɔŋnun Sibekai fula Husa o polale Sera len nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹²O ŋɔmahiɔɔlundɔɔ, le paangii ŋɔmahiɔɔlundɔɛi yɔŋnun Abiesɛr fula Anatɔt, o polale Bɛnyamɛn-nden nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹³O tɔ́ndɔɔ, le paangii tɔ́ndɔɛi yɔŋnun Maharai fula Netofa, o polale Sera len nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹⁴O tɔ́ a ò pilɛndɔɔ, le paangii tɔ́ a ipilɛndɔɛi yɔŋnun Benaya fula Piratɔn, o polale Efraim-nden nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹⁵Simlacinɔ tɔ́ a o diinndɔɔ, le paangii tɔ́ a idiinndɔɛi yɔŋnun Hɛldai fula Netofa, o polale Ɔtniɛl-ten nin-ndo ni. Vanaa cɔwva vaalan bidiin a lahiɔɔlu a va o kunda ndɔɔ nin ni.

¹⁶Kuubaa cɔvaa va polama Israɛlla simndan laci-a a yɔŋnun haa ni: Le polale Rubɛn-nden, Eliesɛr po Sikri-o. Le polale Simeɔn-nden, Sefatia po Maaka-o.

¹⁷Le polale Levii len, Hasabia po Kemuɛl-lo. Le polale Aarɔn-nden, Sadɔk.

¹⁸Le polale Yuda len, Elihu, fulaa o puapilɛa David-a tɛɛn. Le polale Isakar len, Ɔmri po Mikaɛl-lo.

¹⁹Le polale Sabulɔn-nden, Yisemaya po Abdia-o. Le polale Nɛftali len, Yerimɔt po Asriɛl-lo.

²⁰Le polale Efraim-nden, Osee po Asasia-o. Le polale tálále Manase len, Yɔɛl po Pedayahu-o.

²¹Le polale tálále Manase le va o tàndá Kalaad-o nin-nden, Yido po Sakari-o. Le polale Bɛnyamɛn-nden, Yaasiɛl po Abnɛr-o.

²²Le polale Dan-nden, Asareɛl po Yeroham-ndo. Haa yɔŋnun kuubaa cɔvaa va simndan polama Israɛlla laci-a ni.

²³David sɛva langbaa felengia áà nɔ vɔsilan bidiin-nda a langbaa áà tiiya vɔ bidiin te-a diolan te. Kani Mɛlɛka ndóò yii kpemaa le Israɛlla kuiyo maa loeon o halataala.

²⁴Mí Yoab po Seruya-o ndóò kandu vannda diolan sɛvaa, kɛ o siow le, bau mí Mɛlɛka tambu kɔllo a Israɛlla le sɛva kon[41]. Lelan, mɛɛ nda sɛva nda diolan faw-faw yɛ, kon co o sɛbɛ Dɛnnda lemasala David lan[42] nin te.

²⁵Asmavɛt po Adiɛl-lo va bolofaa masaa mandaa ni. Yonatan po Osias-o va ɲɛm ndáà kɛsi o yondolan nin-ndon, ɲɛm ndáà kɛsi o kobilan nin-ndon, ɲɛm ndáà kɛsi o cieon nin-ndon a ɲɛm ndáà kɛsi o cɛila coocoola cumulaalan nin-ndon mandaa ni.

²⁶Ɛsri po Kelub-o va vanaa vaa va valtan tosaa yondolan nin-nda bollen ni.

²⁷Simei fula Rama-o va vanaa tɔalaa n'rɛsɛnnda bollen ni. Sabdi fula Sefam-ndo va vanaa va mɔima n'rɛsɛnndan mandaa-a bollen ni.

²⁸Baal-Hanan Kederiinɔ ndóò nɔ hɔlten o nakɔla olivieelan a nakɔla n'buumbuula va o dɛɛlaa nin-ndan coo ni. Yoas ndóò nɔ hɔlten o cuɛima olivean coo ni.

²⁹Sitrai fula Saron-ndo ndóò nɔ hɔlten o navaa va yondoo nin Saron-nda coo ni. Safat po Adlai-yo ndóò nɔ hɔlten o navaa va o dɛɛlalan nin-nda coo ni.

³⁰Obil Ismaɛlnɔ[43] ndóò nɔ hɔlten o ɲɔɔmɛɛa coo ni. Yedia fula Meronɔt-o ndóò nɔ hɔlten o sofɛlɛa coo ni.

³¹Yasis Hakeriinɔ ndóò nɔ hɔlten o cɔlua pɔmbɔa coo ni. Haa kpow a va bolofaa masaa David-o mandaa ni.

³²Yonatan, vanayɛi[44] David-e va ndu David silaa ni, ndóò nɔ dɛnɛ sinaa a kɔlkaloo. Mí Yehiɛl po Hakmoni-o va poaa masaa ikɛi le nda pɛɛkoo.

³³Ahitofɛl va vana silaa masaa ni, Husai Arkiinɔ va caaŋoo masaa ni.

³⁴Vanaa silaa muungu o fonda Ahitofɛl-lo-a yɔŋnun Yehoyada po Benaya-o nda Abiatar ni. Yoab va simlacinɔ vanaa cɔvaa masaa ni.