Read Kissi 1Dɛnnda lemasalan 28 Bible Online

1Dɛnnda lemasalan 28 - Kissi bible

1Dɛnnda lemasalan 28

¹Mí David yoongu simlacia Israɛlla kpow le cuungianndo Yerusalɛm ciee, simlacia kan yɔŋnun haa ni: vanaa va bolii lapangɛi o polama Israɛlla coo-a, kuubaa va kundala vanaa cɔvaa va baalaa tosaa masaa ikɛi-ya bollen-nda, kuubaa va kundala n'van vàá-vàálan a kundala n'van kɛmɛ-kɛmɛlan bollen-nda, simlacia vanaa va bolofaa a cɔlua va le masaa a le poaa ndɔa-a mandaa-a, langbaa kɛsun kálàá va o cɛi lemasaa nin-nda, kuubaa cɔvaa mayoomua a vanaa tɔ́ɔ́ bɛndua kpow.

²Mí masaa David can, mó dimul nda aa: «Puapilɛa nia a vanaa nia, la yaŋ ya nilan! Yáà nɔ o kɔl le Cɛiyo tangullo le kesu kpema Mɛlɛka-o kɛsio lenin, mí ndóò va ɲɛ kɛsiaa n'pelu Hala naa. Yáà cii nin toosianndo kpow le ndu tangullo.

³Kɛ mí Hala dimul-la aa: ‹O co nɔm te tangulnin Cɛiyo le ya le, kani kuubanɔ cɔwvo n co ni, a diw vanndacieea taw.›

⁴Nduyɛ, o yungu fuɲa nuu nin kpow, ya Mɛlɛka, Hala Israɛlla hɛli ni mì va masaa Israɛl coo le lɔ́ɔ́-lɔ́ɔ̀. Kani mó hɛli polale Yuda len le simlacilen tosaa. O polale Yuda len nin, mó hɛli fuɲa nuu, o poaa fuɲa nuu tɛɛn, mó naŋ kɔl le ya siinguuo masa Israɛlla kpow.

⁵Mɛlɛka ke ya cuawva taw. O cuavaa nia tɛɛn, mó hɛli Salomɔn po ni, haliko mo kɛsi ndu o kpɛŋɛ ndɔ lemasaa coo, mò tosa masalen Israɛlla coo.

⁶Mó dimul-la aa: ‹Salomɔn po nɔm tangulnin Cɛi nuu a bɛ́ɛ̀la ndɔlan n. Kani ndu ya hɛli ni, o vanin poo le ya, mì ya va fuɲaa le ndu.

⁷Te o bii pɛ tɔŋnda nilan a silala nilan kpáŋ mɛɛ o co lan hau biyɔɔ nuaa yɛ, i siminin masale ndɔlen yili mì le va le lɔ́ɔ́-lɔ́ɔ̀[45].›

⁸Nihau, ɲɛ ya co niaa dimul Israɛlla, vanaa cuungian Mɛlɛka o hɔl-la kpow a Hala naa co hoo naa diomndo tueyɔɔ-o o hɔl-lo co hoo ni: la bii tɔŋnda Mɛlɛka Hala niaa ɲɛkɛndɛi, haliko mi la sɔla lɛŋnde kɛndɛlen nden kɛ́ɔ, mì la mel poaa niaa len le fɛɛn a fɛɛn.

⁹Nɔm Salomɔn po ni yɛ, sina Hala fuɲa nɔmndo. Tosal ndu baalaa a kɔl nɔmndo a á yoomu nɔmndo kpow, kani ɲɛ co vanacieo o kɔllo nin di-o Mɛlɛka tofa ni. O sina yiyannda vannda kpow. Taa nuwviaa ndu pɛ, o cɔmnunnin nɔm, kɛ taa mulul ndu pɛ kɔɔ, o malnin nɔm le lɔ́ɔ́-lɔ́ɔ̀.

¹⁰Sina nihau maa Mɛlɛka cii nɔm hɛli, haliko ma tangul Cɛiyo, ó vanin Cɛi-Diandaa-o. Luei niko yoomuan mà tosa vallo.»

¹¹Mi David yɔngu Salomɔn po ndɔ tuula Cɛi-Hala-o a cɛila pɔmbɔla ndɔlan, cɛila mandaa bolofaalan, cɛila coocoolan, cɛila leninndan a cɛi lenin va le kesu kpemaa-o.

¹²Mó yɔngu ndu tuula Kɔl-Hala-o ndóò tuu le tangullo lan kpow, le bɛ́ɛ̀la Cɛi-Hala-o a le cɛila pɔmbɔláà balu ndu lan kpow, cɛilan le bolofaa Cɛi-Hala-o mandaa lenin a cɛilan le ɲɛm diandan Hala-on mandaa lenin.

¹³Mó yɔngu ndu sɛbɛ diola vanaa-solia-lasálàá a leviia va nin-ndo, mó cɔm ndu baalala va le tosaa o Cɛi-Hala-o nin-ndan kpow a ɲɛm lekaaŋun va le baalaa tosaa a mun o Cɛi kon nin-ndon.

¹⁴Mó cɔm ndu mɛɛ sianion n bɛnda mì n va lusullo yɛ le ɲɛm vallon pilɛn-pilɛnndon cɔvɔɔ a mun mɛɛ baalala yɛ́-yɛ́lan la vanin yɛ. Mó cɔm vɛlɛ ndu mɛɛ volion n bɛnda mì n va lusullo yɛ le ɲɛm vallon pilɛn-pilɛnndon cɔvɔɔ a mun mɛɛ baalala yɛ́-yɛ́lan la vanin yɛ.

¹⁵Mó cɔm ndu mɛɛ sianion mún bɛnda lusullo le ɲɛ kɛsiaa lafitinaa a fitinala ndɔlan cɔvɔɔ a mun yɛ, mɛɛ ɲɛ kɛsiaa lafitina oo ɲɛ kɛsiaa lafitina a fitinala ndɔlan láà bɛnda le lusullo nɔu yɛ. Mó cɔm vɛlɛ ndu mɛɛ volion mún bɛnda le lusullo nɔu le ɲɛla-kɛsiaa-lafitinalan a fitinala ndalan cɔvɔɔ a mun yɛ. Ndóò bɛnda mì ndóò cɔw lan mɛɛ ɲɛ kɛsiaa lafitina kɛ́-kɛ̀ ndóò nɔ baalaa yɛ.

¹⁶Mó cɔm ndu mɛɛ tabalila n'sianila ndáà vanin bulula sálàlan kɛsio coo lan láà bɛnda le lusullo nɔu yɛ. Mó cɔm ndu vɛlɛ mɛɛ tabalila ndáà toosiaanin a volin humbon-ndan láà bɛnda le lusullo nɔu yɛ.

¹⁷Mó cɔm ndu lusul cukanila n'ciŋndan, taalala vanin le fuusaa lan a sianila toosiannin a sianin diandan-ndan, lusul hɛngɛila cɔawnunnin a sianion-ndan a hɛngɛila cɔawnunnin a volin humbon-ndan,

¹⁸a lusul fonda-loamaa-lasálà cɔawnunnin a sianin diandan-ndo. Mó yɔngu ndu vɛlɛ tuu ɲɛ ɲaanan soa nan-ndo, lusul mɛlɛkaa cɔawnunnin a sianion-nda, á kumbannda ndalan la vanin kan lapɛɛngaa o kesu kpema Mɛlɛka-o coo-a pɛɛn.

¹⁹Mí David dimi aa: «Kon kpow co o sɛvaa o sɔɔn Mɛlɛka pila dimul-la-on nin, o tɛɛsial-la kpow mɛɛ vana kei ma tosa tuula lan yɛ.»

²⁰O kon, mí David dimul Salomɔn po ndɔ aa: «Lueí yoomuan, sim yili ma tosa baalaa. Yɔŋ isiòòn te, vu n'dial te. Kani Mɛlɛka Hala nuu co nɔm ikɛi. Háá mi baala Cɛi ndɔɔ kpow cuu, o melnin nɔm te, o faŋannin nɔm ikɛi le.

²¹Vanaa-solia-lasálàá a leviia vanin nɔm ikɛi le baala oo baala co le tosaa o Cɛi-Hala-o nin. Le baalala tɔ̀la vanin le tosaa lan yɛ, vanaa yɔngun nda pila-a kpow a vanaa caa baalala súú-súù ka-a a vanin nɔm ikɛi. Simlacia a vannda kpow a tuɛinin nɔm diom.»