Read Kissi 1Dɛnnda lemasalan 29 Bible Online

1Dɛnnda lemasalan 29 - Kissi bible

1Dɛnnda lemasalan 29

¹Mí masaa David dimul vannda kpow aa: «Langbanɔ felengi nɔ vɔ taasi bɔɔ loo Salomɔn po ni co ni, o Mɛlɛka hɛli-o. Nduyɛ, baalaa co o bɔɔ, kani o co cɛi lemasa vanaciee le co tangulɔn te, kɛ Cɛi-Mɛlɛka-o ni, Hala pɛɛn.

²I kindikindin, mí bɛɛndian kpow le Cɛi-Hala-o tangullo. I cuungiaa sianion le ɲɛm bɛnda le cɔwnɔnndo a sianion-ndon, volion le ɲɛm bɛnda le cɔwnɔnndo a volion-ndon, daɲan le ɲɛm bɛnda le cɔwnɔnndo a daɲan-ndon, cilinndon le ɲɛm bɛnda le cɔwnɔnndo a cilinndon-ndon, yɔmnde le ɲɛm bɛnda le siɔlnɔnndo a yɔmnde-on. Mí cuungiaa powta onikselan a powta báà kàlàla vana bɛɛndiaa holiholi le ɲɔɔ naŋɔɔ lan, powta tiŋilan a powta súú-súù ka kunda bɛndoo taw.

³Le tùú ya kaola Cɛi-Hala nuu taw-vo, i yɔngu vɛlɛ sianin nin ya pilan a volin nin ya pilan, handɔɔ o ɲɛm yáà cii nin cuungiaa le Cɛi-Diandaa tangullo-on kpow coo.

⁴I co sianin fula Ofir-on yɔngu kilolan vaalan kɛmɛ a volin nda dindi o yin-ndon kilolan vaalan kɛmɛ belehiɔɔlu le holiholio o cìì Cɛiyo.

⁵O niaa tɛɛn, ɔ́ɔ̀ vana yɔngun niko ndu pila hau-vo? Vana kon soli niko sianion a volion le Mɛlɛka, haliko mi valta co le vanaa baalaa lan kpow la tosan, mì vanaa baalaa labaa a cɔw ɲɛla bɛnda le cɔwnɔnndo a sianion-ndan a ɲɛla bɛnda le cɔwnɔnndo a volion-ndan».

⁶O kon mí vanaa va bolii lapangɛi-ya, á va polama Israɛlla bollen-nda, á va kundala vanaa cɔvaa kundala n'van vàá-vàálan a kundala n'van kɛmɛ-kɛmɛlan bollen-nda, a vanaa va vanaa baala masaa simndan laci-a a yɔngu ɲɛm-kéan ndan a kɔlta ndalan bɛɛn-bɛɛn.

⁷Le baala Cɛi-Hala-o, má yɔngu sianion kilolan vaalan kɛmɛ belaŋɔmmɛw (170 000), sianin n'kpungban vaalan tɔ́ (10 000), volion mún hiow le kilolan vaalan kɛmɛ leyáá (300 000), daɲan va le kilolan vaalan kɛmɛ leŋɔmpum (600 000) a cilinndon kilolan milionndan tan yáá (3 000 000).

⁸Mí vanaa nɔ powta báà kàlàlan-nda a yɔngu Yehiɛl fula o polale Kɛrsɔn-nden nin-ndo lan, le lan lueiyo o bolofaa Cɛi-Mɛlɛka-o nin.

⁹Mí ɲɔɔ hɛnan vannda le ɲɛm-kéan nda yɔngu Hala a kɔlta ndalan-ndon, kani a va a ɲaaloo. Mí masaa David bɛɛ dɔawnun ɲaale taw-taw.

¹⁰Mí David mel Mɛlɛka balika vannda kpow o hɔl, mó dimi aa: «Biiloo co le nɔm, Mɛlɛka, Hala Yakɔb, fuɲa naa mamaa-o, nɔm co fuɲa naa le fɛɛn a fɛɛn ni.

¹¹Le nɔm Mɛlɛka bɔɔbɔɔyɛi, kpaayaa, biiloo, masalen a naŋɔɔ fɛɛn-fɛɛndo co ni. Kani ɲɛm co o halataala-on a mun o lɛŋnden coo n co le nɔm. Nɔm nɔ masalen ɲɔɔn kpow coo ni.

¹²Nɔm o ba bolofaa a biiloo fula ni, nɔm co masalen tosaa ɲɔɔn kpow coo ni. Nɔm o ba kpaayaa a yoomuan ma fula ni, a tiwba ma heelu vana n yeema-o, ma luei ndu yoomuan.

¹³Sisa Hala naa, n mel nɔm balika mí n lisa diola nɔmnda sɔvɛlan.

¹⁴Kani yɛɛ ya David co yɛ, yɛɛ vanaa nia a co yɛ le nɔm ɲɛm-kéan yɔngoo a kɔlta naalan nuaa? Nɔm o ba ɲɔɔn kpow n fula ni, ɲɛm mun koni naa n co nɔm vɛlɛ yɔngoo ni.

¹⁵Mɛɛ fuɲaa naa mamaa kpow a yɔŋnun yɛ, naa bɛɛ mialla a vanaa hiavannda naa n co nɔm o hɔl ni. Maa levundu palɛi nɛi i co o lɛŋnden coo ni, n nɔ tiindan kɛ́-kɛ̀ le.

¹⁶Mɛlɛka Hala naa, nɔm o ba ɲɛm naa n cuungiaa mun le nɔm Cɛiyo tengullo-on kpow n fula ni. Biiloo co le diola nɔmnda diandaalan, bau nɔm nɔ ɲɔɔn kpow ni.

¹⁷Éé Hala nuu! I sina maa o kɔltan nin di n tofa vana ni, a yeema vɛlɛ dɛnɛ sandaa. Nduyɛ, a kɔl ni sandaa ya yɔngu nɔm ɲɛm-kéan mun kpow ni. I co nihau cɔu mɛɛ vanaa nɔmaa co haa nanu-a co nɔm ɲɛm-kéan yɔngoo a ɲaaloo yɛ.

¹⁸Mɛlɛka, Hala fuɲa naa mamaa Abraham, Isaak a Yakɔb, tosa mì vanaa nɔmnda nɔ hee o kɔl le lɔ́ɔ́-lɔ́ɔ̀, mì yiyannda ndalan la va nɔm coo.

¹⁹Ke Salomɔn po ni kɔl o tiindan nɔm-ndo, mò bii tɔŋndan, pɛɛkulan a silala nɔmndan, mò kela lecoo, haliko mo tangul Cɛi-Diandaa, Cɛi ya cuungiaa ɲɔɔn mun kpow le ndu tangullo-o.»

²⁰O kon mí David dimul vannda kpow aa: «La mel Mɛlɛka, Hala niaa balika.» Mí nda kpow mel Mɛlɛka, Hala fuɲaa ndaa mamaa balika. Má tundun háá lɛŋ, Mɛlɛka a masaa o hɔl.

²¹Diimandɔɔ, má solul Mɛlɛka sálàla kɔlɲululan a sálàla loamaalan a navaa tovaa vàá pilɛ, saa kóndóa vàá pilɛ a saa téndéa vàá pilɛ. Má soli sálàla lamamɔila dema solin-ndan a sálàla celen taw le Israɛlla.

²²Paale len, mí Israɛlla dia, má kol a ɲaaloo taw Mɛlɛka o hɔl. Má yonda vɛlɛ ɲinkon yonda diinndɔɔ maa Salomɔn po David-o co masaa ni, má pɔla ndu o diola Mɛlɛka lan le siŋnɔnndo simlacinɔɔ, má pɔla vɛlɛ Sadɔk le siŋnɔnndo vana-solia-lasálàá.

²³Mí Salomɔn cal o kpɛŋɛ lemasa Mɛlɛka-o[46] nin, o fonda David fuɲa ndɔ-o. Mó fula tɔ́ɔ́, mí Israɛlla kpow a bii diom ndɔɔ.

²⁴Mí simlacia a kuubaa cɔwva kpow a muungu masaa Salomɔn o ba bɛngu, hali poaa masaa David-a bɛɛ.

²⁵Mí Mɛlɛka tosa mí Salomɔn pialnun ladio taw Israɛlla kpow o hɔl, mó ke masale ndɔlen pangeloo hiovɔɔ masaa tosa masalen ndu tase Israɛl-la kpow coo.

²⁶Mí David po Yisai-yo tosa masalen Israɛlla kpow coo.

²⁷Mó tosa masalen vɔsilan belehiɔɔlu Israɛlla kpow coo: vɔsila ŋɔmmɛw Hebrɔn, beleyaa a layàá Yerusalɛm.

²⁸Mí David sɔla yuuvɛi kɛndɛi, mó tosa palɛi taw-taw, o kon mó vu o bolofaa a o biiloo nin. Mí Salomɔn po ndɔ koma sul masaa o fonda ndɔɔ.

²⁹Dɛnnda masaa David tosa lan kpow, kandɔɔ a mɛɛlulan, la co lasɛvaalan o sɛbɛla nda veelu aa dɛnnda Samiɛl vana-tɛɛngaa-diom Hala-o, Natan vana-tɛɛngaa-diom Hala-o a Kad vana-tɛɛngaa-diom Hala-o lan nin,

³⁰o sɛbɛla lan nin, má tɛɛsiaa mɛɛ masale ndɔlen le va yɛ a cɔwla bɛndula o tosa lan, má cɔm vɛlɛ dɛnnda ndɔla ndu pilalan, dɛnnda tosalan ndu o masalen coo Israɛl-tan a dɛnnda tosalan ndu o masɛi va o lɛŋii celen nin-nde lan kpow.