Read Kissi 1Dɛnnda lemasalan 9 Bible Online

1Dɛnnda lemasalan 9 - Kissi bible

1Dɛnnda lemasalan 9

¹Má cɔm Israɛlla kpow, má sɛva nda diolan a yungula yɛ́-yɛ́lan o sɛbɛ masaa Israɛlla nin. Kɛ vanaa va Yuda-a lo o lediom coo a Hala le, lelan má kɔa a nda Babilɔn o cɛlen nin.

²Vanaa yɔŋnun vanaa tasea le muungoo o kobila ndalan nin má kɔ mingin yondola ndalan o ba-a yɔŋnun Israɛlaa tɔ̀a[20] ni. O nda kɔɔli, mí vanaa-solia-lasálàá, leviia a vanaa va baalaa o Cɛi-Hala-o nin-nda bɛɛ a muungu.

³Mí vannda pum o polale Yuda len nin, vannda pum o polale Bɛnyamɛn-nden nin, vannda pum o polale Efraim-nden nin a vannda pum o polale Manase len nin a kɔ kila caltan Yerusalɛm.

⁴Yuda velu Perɛs ni, Bani va vana pilɛ o poaa Perɛs-a tɛɛn, mí Bani kon vialu Imri, mí Imri vialu Ɔmri, mí Ɔmri vialu Amihud, mí ndu vialu Utai. Utai kon va lon.

⁵O yungu Silo-o nin, Asaya, po tase velun o yungu kon nin-ndo va lon a poaa ndɔa.

⁶O poaa Sera-a tɛɛn, Yeuɛl va lon a puapilɛa ndɔa. Faw-faw n'van kɛmɛ leŋɔmpum belaŋɔmahiɔɔlu (690) ndáà fula o polale Yuda len nin ni, mí ndáà cal Yerusalɛm.

⁷O polale Bɛnyamɛn-nden nin: Sallu po Mesulam-ndo, po imama Hodavia-o, po imama makɔɔ Hasenua-o,

⁸a Yibneya po Yeroham-ndo, Ela po Usi-o, po imama Mikri-o, Mesulam po Sefatia-o, po imama Reuɛl-lo, po imama makɔɔ Yibniya-o,

⁹handɔɔ puapilɛa ndaa, a yungula ndala yɛ́-yɛ́lan kpow nda bɛɛ va lon. Faw-faw, n'van kɛmɛ leŋɔmahiɔɔlu beleŋuɛɛnu a ŋɔmpum (956) va lon ni. Nda kpow simlacia nda va o yungula ndalan nin ni.

¹⁰O vanaa-solia-lasálàá tɛɛn, a kɔ cal lon-nda va haa ni: Yedaya, Yehoyarib, Yakin,

¹¹Asaria po Hilkiya-o, o fuɲaa ndɔa mamaa yɔŋnun Mesulam, Sadɔk, Merayɔt, a Ahitub va masaa o Cɛi-Hala-o nin-ndo,

¹²a Adaya, o fuɲaa ndɔa mamaa yɔŋnun Yeroham, Pasur a Malkia-o, a Maesai, o fuɲaa ndɔa mamaa yɔŋnun Adiɛl, Yasera, Mesulam, Mesillemit a Immɛr-o,

¹³a puapilɛa ndaa, vanaa-solia-lasálàá, a va bolii lapangɛi o yungula ndalan nin-nda kpow. Faw-faw n'van vàá pilɛ kɛmɛ leŋɔmmɛw belaŋɔmpum (1 760) nda va ni. Ndáà nɔ kpaayaa taw, má va baalalan tosaa o Cɛi-Hala-o nin.

¹⁴O leviia tɛɛn, a va lon-nda va haa ni: Semaya, o fuɲaa ndɔa mamaa va Hakub, Asrikam a Hasabia, fulaa o polale Merari len nin-nda-o,

¹⁵a Bakbakar, Herɛs, Kalal a Matania po Mika va po imama Sikri, mo va po imama makɔɔ Asaf-o-o.

¹⁶Abdia, o fuɲaa ndɔa mamaa yɔŋnun Semaya, Kalal a Yedutun-ndo, Berekia po Asa-o, po imama Ɛlkana va icali o cieon vannda Netofa nin-ndo bɛɛ a va lon.

¹⁷O kpalilaa cumulaa ladioa tɛɛn, a va lon-nda yɔŋnun haa ni: Salum, Akub, Talmɔn, Ahiman a puapilɛa ndaa. Salum va simlacinɔ ndaa ni.

¹⁸Nduyɛ háá paalen nden, a co vɔ cumullo o dio masaa, ó co a ba paalen le can-ndo-o pɛɛn. Haa yɔŋnun kpalilaa cumulaa ladioa, fulaa o dɔ́ɔ́ngɔ́la polama leviia nin ni.

¹⁹Salum po Kore-o, po imama Ebiasaf-o, po imama makɔɔ Kore-o, a puapilɛa ndɔa fula o yungu fuɲa ndɔ Kore-o nin-nda, a vanayan Kore-on va kpalilla o dio luɛyaa cɛi-kola-toandaa-labɔɔŋianndo ni, maa mɛɛ fuɲaa ndaa mamaa va cumullo o dio dɔ́ɔ́ngɔ́ Mɛlɛka-o yɛ.

²⁰Pineas, po Eleasar-o va telen pum nda bollen ni, kani Mɛlɛka va ndu ikɛi.

²¹Sakari, po Meselemia-o bɛɛ yɔŋnun kpalilnɔ cumulaa dioo o cɛi-kola-toandaa-labɔɔŋianndo sondoo.

²²Faw-faw, vanaa ndáà hɛli, mí ndáà sɛva nda diolan a cieon ndan le cumullo o keendon sondolan-nda va n'van kɛmɛ lediin tɔ́ a à ŋiɔn (212), mí David nda Samiɛl vana-tɛɛngaa-diom Hala-o luei nda o baalalan nin.

²³Nda poaa ndaa imamaa va kpalilaa cumul diola Cɛi-Mɛlɛka-o lan ni, o ndáà veelu kon aa cɛi-kola-toandaa-o pɛɛn.

²⁴Kpalilaa cumulaa ladioa va o diola va o kpengun hiɔɔlon kpow lan: a ba paalen le can-ndo, a ba le del-lo, a ba luaŋ-ndo a á ba too.

²⁵Puapilɛa ndaa tɔ̀a va icali o cieon ndan nin-nda va nda hunɔɔ cumullo malaa le palɛi ŋɔmmɛw o telenndan lapum bɛngu.

²⁶Kɛ simlacia kpeekpeiya nda hiɔɔlu va baalaa lon lɔ́ɔ́-lɔ́ɔ̀ ni, leviia pɛɛn. Nda va cɛila lenin-ndan a ɲɛm sɔlan va o Cɛi-Hala-o nin-ndon mandaa ni.

²⁷Icɔl ndáà balu Cɛi-Hala-o sɔ́, kani ndáà bɛnda le ndu cumullo a le ndu kumbio idii o idii.

²⁸Leviia pum va lon, baala ndaa va le ɲɛm lekaandon cɔmndo ni. Tuma ndáà va mun solio-o a telen ndáà va mun mingio lueiyo-o ndáà cɔm mun ni.

²⁹A tɔ̀a nda va ɲɛm baalan va le sálàlan solio-on mandaa ni. Nda koni va vɛlɛ kpeyanndo, mɔiyan, cuɛiyan, ansan a lasikɔlɔɔ mandaa ni.

³⁰Vanaa-solia-lasálàá pum va cuɛima cun kɛndɛma man toosiaa.

³¹Leviinɔ pum va lon, diolan Matitia, po tase Salum-ndo, fulaa o yungu Kore-o nin. Ndóò toosiaa fùlúfúlùla toaŋaala sálàlan ni.

³²Puapilɛa ndaa, Kehatia pum a va bulula ndáà toosiaa o palɛi pɛngiɛi yɛ́-yɛ́i coo lan bɛɛndiaa ni.

³³Leviia va vanaa n'condua, má va bolii layunguei-ya va o cɛila ndalan nin o Cɛi-Hala-o nin. Nda ve o baalala celen coo le, kani a va baala ndaa tosaa idii a icɔl.

³⁴Haa yɔŋnun vanaa lebolla o yungula leviia coo ni, mɛɛ polama ndan ma va yɛ, ma va icali Yerusalɛm.

³⁵Vana kelu kobio Kabaɔn-ndo diolan Yeiɛl, ciee lon o va icali ni. Laa ndɔ diolan Maaka.

³⁶Po ndɔ tasoo yɔŋnun Abdɔn ni. O ndu kɔɔli, mó vialu Sur, Kis, Baal, Nɛr, Nadab,

³⁷Kedɔr, Ahio, Sakari a Miklɔt.

³⁸Mí Miklɔt vialu Simeam. Mí poaa ndaa ha bɛɛ calnun puapilɛa ndaa ikɛi Yerusalɛm.

³⁹Nɛr velu Kis ni, mí Kis vialu Saul, mí Saul vialu Yonatan, Malki-Sua, Abinadab a Ɛsbaal.

⁴⁰Po Yonatan-ndo yɔŋnun Meribaal ni. Mí Meribaal vialu Misee.

⁴¹Poaa Misee-a va Pitɔn, Melɛk a Tarea ni.

⁴²Ahas velu Yaera ni, mí Yaera vialu Alemɛt, Asmavɛt a Simri. Mí Simri vialu Mɔtsa, mí Mɔtsa vialu Binea,

⁴³mí Binea vialu Refaya, mí Refaya vialu Eleasa, mí Eleasa vialu Asɛl.

⁴⁴Mí Asɛl vialu poaa nda ŋɔmpum, diola ndalan la co laan ni: Asrikam, Bokru, Ismaɛl, Searia, Abdia a Hanan, haa yɔŋnun poaa Asɛl-la ni.