Read Kissi 2Dɛnnda lemasalan 11 Bible Online

2Dɛnnda lemasalan 11 - Kissi bible

2Dɛnnda lemasalan 11

¹Roboam tiiyaa dɔ́ɔ́ Yerusalɛm, mó cuungiaa vanaa cɔvaa caa cɔwvo taw-va o vanaa fula o polale Yuda len a o polale Bɛnyamɛn-nden nin-nda tɛɛn le kɔlan Israɛlaa va a ba luaŋ-ndo-a cɔlɔbaa, le nda minginndo ndu o ba bɛngu.

²Kɛ mí Mɛlɛka soaa o Semaya, vana-tɛɛngaa-diom Hala-o lo, mó dimul ndu aa:

³«Soo o Roboam, po Salomɔn-ndo, o co masaa Yuda-o lo a o Israɛlaa co o tàndá Yuda-o a o tàndá Bɛnyamɛn-ndo nin-nda lo, mà dimul nda aa:

⁴ɲɛ Mɛlɛka dimi-o co ni aa: ‹La kɔa puapilɛa niaa cɔlɔba le, vana-vana o niaa tɛɛn muungu o ndu lo. Kani ɲɛ-ɲɛ tosan hoo, hɛnan nuu co kon ni.›» Ndáà tueyɔɔ sɔɔn mun, má bii mun, a kuel lɛ Yeroboam a cɔwvo le.

⁵Mí Roboam cal Yerusalɛm, o kon mó tangul kobila mayoomulan o tàndá Yuda-o nin.

⁶Mó tangul Bɛtlɛhɛm, Etam, Tekoa,

⁷Bɛt-Sur, Soko, Adulam,

⁸Kat, Maresa, Sif,

⁹Adoraim, Lakis, Aseka,

¹⁰Sorea, Ayalɔn a Hebrɔn. Kobila lan, o tàndá Yuda-o a o tàndá Bɛnyamɛn-ndo nin la va ni, kobila mayoomulan la va ni.

¹¹Mí Roboam mingi kpakila ndalan toosiaa, o kon mó kɛsi masaa n'bungaa, mó tangul vɛlɛ cɛila mandaa balolan, cɛila mandaa macuɛilan a cɛila mandaala mamɔilan.

¹²Mó kɛsi kɔ̀ɔ̀la cɔwla bɛndulan a báltan o kobila lan la pilɛn-pilɛnndan nin, mó siinguu kobila lan kobila mayoomulan lekɛ́ndɛi. O kon mí kobila Yuda lan a kobila Bɛnyamɛn-ndan la lo ndu o ba bɛngu.

¹³Mí vanaa-solia-lasálàá a leviaa va o lɛŋnde Israɛl-ten nin-nda kpow a faŋan o calta ndalan le hunɔɔ o Roboam ndo.

¹⁴Kani mí leviia ndáà faŋan o fondala ndala va o kobila ndalan balɔɔ lan nin, má kɔannun Yuda a Yerusalɛm, bau Yeroboam nda poaa ndɔa ve nda cɛlɔɔ mì ndáà tosa baalaa maa vanaa-solia-lasálàá Mɛlɛka le.

¹⁵Mí Yeroboam pila siinguu vannda pum vanaa-solia-lasálàá le cuinaa toovia ndɔa a piɔmaa ndóò toosiaa maa navaa téndé le sooloo o tombun ndɔn coo-a.

¹⁶Mí vanaa fula o polama Israɛlla nin-nda, a va a ba luaŋ-ndo-a kpow, áà nɔ yiyanndo le Mɛlɛka Hala Israɛlla biiloo-a kɔannun leviia kɔɔli Yerusalɛm, le Mɛlɛka Hala fuɲaa ndaa mamaa sálàlan solullo.

¹⁷Nda tosa ni mí masalen Yuda le sɔla kpaayaa, má simi Roboam po Salomɔn-ndo yili. Vɔsilan tan yáá vannda va kelaa o nɛi David nda Salomɔn-ndo coo.

¹⁸Mí Roboam yil lanɔɔ diolan Mahalat, cua Yerimɔt po David-o o va ni. Kalaa laa ndɔ kon diolan Abihayil cua Eliab-o, Eliab kon po Yisai-yo o va ni.

¹⁹Mí Mahalat vilul ndu poaa nda yáá: Yeus, Semaria a Saham.

²⁰O kon kɔɔli, mí Roboam yil vɛlɛ lanɔɔ diolan Maaka, cua Absalɔm-ndo. Mí Maaka vilul ndu Abiya, Atai, Siisa a Selomit.

²¹Maaka, cua Absalɔm-ndo Roboam ndóò hiow kaolaa o laandaa ndɔa a o sámáá ndɔa kpow tɛɛn ni, ndóò nɔ laandua tɔ́ a à ŋɔmaa a sámáá belaŋɔmpum. Mí Roboam vialu hɔ́ɔ́a taw: poaa bidiin a ŋɔmaa a cuavaa laandua belaŋɔmpum.

²²Mí Roboam ke Abiya po Maaka-o fonda tasoo, mó siinguu ndu simlacinɔɔ puapilɛa ndɔa coo, kani ndóò yeema le ndu siinguuo masaa.

²³Mó tosa taasio, mó sɛŋi poaa ndɔa kpow o kobila vanaa cɔwva va o tàndá Yuda-o a o tàndá Bɛnyamɛn-ndo nin-ndan kpow nin, mó ke nda baloo taw, mó yil nda vɛlɛ laandua sɛ́lɛ́ bɛndoo.