Read Kissi 2Dɛnnda lemasalan 12 Bible Online

2Dɛnnda lemasalan 12 - Kissi bible

2Dɛnnda lemasalan 12

¹Lɔ́ɔ́ Roboam sim yili o masale ndɔlen nin, mó sɔla yoomuan-ndo, mó mulul tɔŋ Mɛlɛka-o kɔɔ, mí Israɛlla kpow bɛɛ a del ndu kɔɔli.

²Vɔsi Roboam suili vɔsilan laŋuɛɛnu o masalen-ndo, mí Sisak masaa Esipte kɔ del Yerusalɛm coo a cɔwvo le kɛɛ o kɛɛ lo o nɛi Mɛlɛka-o coo-o.

³Sisak ndóò nɔ ɲɛla ɲaanannda soa nan-ndan vàá pilɛ a kɛmɛ lediin, a vanaa ɲaanun o soa coo-a vaalan belaŋɔmpum, mó fula vɛlɛ Esipte a vanaa cɔwva sɛ́lɛ́ bɛndoo: Libiia, Sukiia a Etiopiia, ndáà cuu cɔm te.

⁴Mó bii kobila mayoomula va o tàndá Yuda-o nin-ndan háá tiiyaa Yerusalɛm.

⁵O kon mí Semaya vana-tɛɛngaa-diom Hala-o kɔa o Roboam nda simlacia Yuda lo, nɛɛ ndáà kɔɛ Yerusalɛm telen Sisak va sɔɔnguuo a cɔwvo-o-a, mó tɛɛngul nda diom Mɛlɛka dimi-o aa: «Le tùú niaa mulul-la kɔɔ-o, ya bɛɛ i co niaa kɔɔ mulul, mì mal niaa Sisak o ba.»

⁶Le hee, mí masaa a simlacia Israɛl a sina pɔwla ndalan, má dimi aa: «Mɛlɛka nɔ dí.»

⁷Mɛlɛka cɔu tuisin ndaa, mó dimul Semaya aa: «Le tuisin nda tuisin tootoo-o, i diw lɛnin nda le, i tembu lɛnin kɔl háá mì mal kobio Yerusalɛm Sisak o ba le ndu tɛɛmbuuo le. O lo cɔɔlu cobe mì baŋa nda.

⁸Kɛ o va bɛɛ lende, a tosalnin ndu baalaa. O kon mà sina hiyan co masaa vanndacieea baalaa tosallo a ya Hala baalaa tosallo-o tɛɛn.»

⁹Mí Sisak masaa Esipte kɔ del kobio Yerusalɛm coo. Mó cua bolofaa va o Cɛi-Mɛlɛka-o nin-ndo a bolofaa va o cɛi lemasaa nin-ndo kpow, o mɛi ɲɛ-ɲɛ le. Mó cua vɛlɛ kɔ̀ɔ̀la cɔwlan, la Salomɔn ndóò cɔw a sianion-ndan.

¹⁰Mí masaa Roboam cɔaw kɔ̀ɔ̀la cɔwlan a daɲan, mó mingi lan o fonda kɔ̀ɔ̀la cɔwla n'sianilan, mó yɔngu simlacia vanaa cɔvaa cumul diola luɛyaala cɛi lemasaa-a lan.

¹¹O kon, telen oo telen masaa ndóò va pɛ kɔlan o Cɛi-Mɛlɛka-o nin, vanaa cɔvaa va lan mandaa-a ndáà kɔ cua lan, ndáà mingi lan vɛlɛ o cɛi kpalilla nin.

¹²Le tùú Roboam ndóò tuisin tootoo-o, mí kɔltuw Mɛlɛka-o pɔlul a ndu, o tɛɛmbuu lɛ ndu kpede le. Handɔɔ o kon coo, dɛnɛ kɛndɔɔ va Yuda.

¹³Mí masaa Roboam tosa masalen Yerusalɛm, mó simi masale ndɔlen yili. Ndóò nɔ vɔsilan belehiɔɔlu a ò pilɛ, mó siŋnun masaa. Mó tosa masalen vɔsilan tɔ́ a laŋɔmmɛw Yerusalɛm ciee, kobi kon Mɛlɛka ndóò hɛli o kobila va o polama Israɛlla kpow tɛɛn-ndan ni le diola ndɔlan vaa piɔlnɔnndo lon. Naama kalaa Roboam ndóò nɔ diolan ni, Amɔnnɔɔ o va ni.

¹⁴Mí Roboam tosa dɛnɛ vɔɔndo, kani o cɛl le Mɛlɛka holnɔnndo le.

¹⁵Sɔɔn Roboam-ndon, kandɔɔ a mɛɛlulan, n co n'sɛvaa o sɛbɛ Dɛnnda Semaya vana-tɛɛngaa-diom Hala-o a Ido vana-tɛɛngaa-diom Hala-o nin. O sɛbɛ kon nin diola fuɲaa ndaa mamaa la co ni. Cɔwvo tuŋ va Roboam nda Yeroboam tɛɛn ni.

¹⁶Roboam vuo, má kumbu ndu o Kobi David-o nin. O kon mí Abiya po ndɔ koma sul masaa o fonda ndɔɔ.