Read Kissi 2Dɛnnda lemasalan 13 Bible Online

2Dɛnnda lemasalan 13 - Kissi bible

2Dɛnnda lemasalan 13

¹Vɔsi Yeroboam suili vɔsilan tɔ́ a laŋɔmaa o masalen coo-o, mí Abiya sul masaa Yuda.

²Mó tosa masalen vɔsilan tan yáá Yerusalɛm. Kala ndɔ diolan Mikayahu, cua Uriɛl fula Kibea-o o va ni. Cɔwvo tuŋ va Abiya nda Yeroboam tɛɛn ni.

³Mí Abiya tiŋ Yeroboam a cɔwvo a kuubaa cɔvaa kpeekpeiya vaalan kɛmɛ lehiɔɔlu. Mí Yeroboam bɛɛ bɛɛndian le ndu cɔlɔbaa a kuubaa cɔvaa kɛndɛ-kɛndɛa vaalan kɛmɛ leŋɔmaa.

⁴Mí Abiya sim o pembei Semaraim coo, í co o tàndá n'pembu co o tàndá Efraim-ndo nin-nde, mó yonda aa: «La yaŋ ya nilan, nɔm Yeroboam a Israɛlla kpow.

⁵Vɛ̀ɛ̀ la co sina maa David nda cuavaa ndɔa imamaa le Mɛlɛka Hala Israɛlla yɔngu masalen Israɛlla coo le fɛɛn a fɛɛn te? O cii ndu kpema vana nɔla hiiluu loo yiilul.

⁶Nduyɛ, Yeroboam po Nebat-o, buɛi Salomɔn po David-o-o o va ni. Kɛ mó tosa seesiɛi a vana ndɔ bɛndoo.

⁷Mí vanaa fondoa a diɔmnda cuungian, má sim ndu Yeroboam kɔɔli, má nɔla Roboam po Salomɔn-ndo. Roboam ndóò dɔɔnan-ndɔ, ndóò nɔla vɔ ɲɛ-ɲɛ dimi a ɲɛ-ɲɛ tosa a ba ndɔ le. Le hee, mí yoomuan ma fula ndu nda o hɔl.

⁸Nihau, la nɔ o lakɔl maa la co masale Mɛlɛka ke poaa David-a len simul? La co sɛ́lɛ́ taw, la nɔ navaa téndéa cɔwnun a sianion-nda, á Yeroboam cow niaa ma va halaa niaa-a o ba.

⁹Vɛ̀ɛ̀ o co niaa le tow vanaa-solia-lasálàá Mɛlɛka-a, a co poaa Aarɔn-nda-a a leviia, mí niaa pila hɛli a niaa, maa mɛɛ vanaa co o lɛŋii celen nin-nda a tosa yɛ le? Vana-vana ndóò hin pɛ a naw tova téndóó o pilɛ, saa kóndóa a ŋɔmmɛw, mó yɔngun le siŋnɔnndo vana-solia-lasálàá, la siinguu dɔ́ɔ́ vana kon vana-solia-lasálàá le ɲɛ co Hala loo.

¹⁰Naa naa, Mɛlɛka co Hala naa ni, kabi n mulul ndu kɔɔ le. Vanaa-solia-lasálàá co o baala Mɛlɛka-o nin-nda co poaa Aarɔn-nda ni, leviia co vɛlɛ baalaa tosaa ɲɛkɛndɛi.

¹¹Idii a icɔl, a co Mɛlɛka sálàla loamaalan solullo mà va ansan lomɔɔ. A co bulula sálàla co le Hala lan kɛsio o tabali diandaa coo, a co fitinala co o ɲɛ kɛsiaa lafitina n'sianio coo lan mɛndullo. N co tɔŋnda Mɛlɛka Hala naa lan peeloo. Kɛ niaa niaa, la cii ndu kɔɔ mulul.

¹²Sisa, Hala a vanaa ndɔa baalaa co naa isisi laci, vanaa-solia-lasálàà ndɔa co naa ikɛi nanu, a co bɛɛndianndo le bululan hɔŋndo mì n del niaa coo a cɔwvo. Lelan niaa Israɛlla, la cɔ́lɔ̀ba Mɛlɛka Hala fuɲaa niaa mamaa le, kani la tiwnin ba le.»

¹³Tuma kon, Yeroboam ndóò cii nin kunda vanaa cɔwva pum vionɔɔ le nda kiolɔɔ a makɔɔ. Tuma ndóò hinulnin Yudaa-o, vanaa kan bɛɛ ndáà fulal nda a makɔɔ.

¹⁴Telen Yudaa mulin-ndo, má ca maa yaamɔɔa balu nda kundalan latiɔn: yaamɔɔa pum va nda laci, a pum va vɛlɛ nda a makɔɔ. O kon má solul Mɛlɛka diomndan le nda malaa, mí vanaa-solia-lasálàá hɔŋ bululan.

¹⁵Mí vanaa cɔwva Yuda yonda yonda cɔwvo. Ndáà yondaa dɔ́ɔ́, mí Mɛlɛka lɔaa Yeroboam a Israɛlla kpow masaa Abiya nda vannda Yuda o hɔl.

¹⁶Mí Israɛlla ɲaanun vanaa cɔwva Yuda, mí Hala mal nda Yudaa o ba.

¹⁷Mí Abiya nda vanaa ndɔa cɔwva koaŋ nda koŋɔɔ pila, má diw vanaa cɔvaa Israɛlla vaalan kɛmɛ leŋuɛɛnu.

¹⁸Mí siɛmbulan la bii Israɛlla biyɔɔ pila, mí vanaa cɔwva Yuda nɔla nda, kani Mɛlɛka, Hala fuɲaa ndaa mamaa ndáà tiindan ni.

¹⁹Mí vanaa cɔvaa Abiya-a kuel vanaa cɔvaa Yeroboam-nda, má hialu kobilan Betɛl, Yesana a Efrɔn, a cieon va lan o ba bɛngu-on kpow nda o ba.

²⁰Abiya cii nin masale ndɔlen lende, Yeroboam sɔla lɛ kpaaya le. O mɛɛlulan, mí Mɛlɛka lɔaa ndu, mó vu.

²¹Kɛ mí Abiya ndu sɔla kpaayaa taw o masale ndɔlen nin, mó yil laandua tɔ́ a à hiɔɔlu, mó vialu poaa bidiin a ŋiɔn a cuavaa laandua tɔ́ a à ŋɔmpum.

²²Sɔɔn tɔ̀un Abiya-on kpow, ɲɛ-ɲɛ o tosa a sɔɔn o dimi-on kpede n co n'sɛvaa o Sɛbɛ loonan Ido vana-tɛɛngaa-diom Hala-o nin.

²³Abiya vuo, má kumbu ndu o Kobi David-o nin. O kon mí Asa po ndɔ koma sul masaa o fonda ndɔɔ. Vɔsilan tɔ́ po ndɔɔ tosa o masalen ni, o telen kon bɛngu kpede, lɛŋnden le va o kɔlɲuloo nin.