Read Kissi 2Dɛnnda lemasalan 14 Bible Online

2Dɛnnda lemasalan 14 - Kissi bible

2Dɛnnda lemasalan 14

¹Mí Asa tosa dɛnɛ kɛndɔɔ a dɛnɛ sandaa Mɛlɛka Hala ndɔɔ o hɔl.

²Mó tɛɛmbuu máánndan a tombon, mó pesipesi powta sálàlan, mó koombiaa sungbuma soolan.

³Mó dimul Yudaa le Mɛlɛka Hala fuɲaa ndaa mamaa biiloo a le tɔŋndan a silala ndɔlan biyɔɔ.

⁴Mó tɛɛmbuu tombon a máánnda nda va ansan loomɔɔ coo o kobila va o tàndá Yuda-o nin-ndan kpow nin. O masale ndɔlen bɛngu, mí lɛŋnden le sɔla kɔlɲuloo.

⁵O vɔsila lan bɛngu kpede vana-vana kpeeŋiaa nda a cɔw le, a vannun o kɔlɲuloo nin, kani Mɛlɛka ndóò ke nda pɛngi kon ni. O kon, mí Asa tangul kobila mayoomulan taw o tàndá Yuda-o nin.

⁶Mó dimul Yudaa aa: «Telen lɛŋnden le co vɔ hoo naa o ba bɛngu-o, n tangulun kobilan-ndan, mì n kungan ndan pindo a kpakilan, mì n tangulun cɛila coocoolan le cumullo, mì n lueinun ndan koŋndan a sɔkɔma n'cilinndan. Kani le tùú naa n lo o lediom coo a Mɛlɛka Hala naa, mí n tosa hɛnan ndɔɔ-o, o luei naa kɔlɲuloo tɛɛn a vanaa salu pɛɛngulan a lɛŋnde naalen nda ni.» O kon, má tangul kobila mayoomulan.

⁷Asa ndóò nɔ vanaa cɔwva vaalan kɛmɛ leyáá fulaa o tàndá Yuda-o nin, áà tiwba le kɔ̀ɔ̀la cɔwla bɛndulan a bállo cuaa-a pɛɛn, a vanaa cɔwva vaalan kɛmɛ lediin a belaŋɔmaa fulaa o polale Bɛnyamɛn-nden nin, áà tiwba le kɔ̀ɔ̀la cɔwla pɔmbɔlan cuaa a kpaasiaa vuuo-a. Nda kpow, kuubaa cɔwva nda va ni.

⁸Mí Sera Etiopiinɔ kuel nda a vanaa cɔwva milionndo o pilɛ a á ɲɛla ɲaanannda soa nan-ndan kɛmɛ leyáá, mó tiiya háá Maresa.

⁹Mí Asa kɔ fulal ndu, má kɔ simulan o bóllo Sefata co Maresa ikɛi-yo nin le cɔwvo.

¹⁰Mí Asa piɛi Mɛlɛka Hala ndɔɔ aa: «Mɛlɛka, nɔm pilɛ kpé tiwba le vana nɔ mayoomu loo malaa a le vana mayoomoo cɔlɔbaa ni. Lelan, mala naa Mɛlɛka Hala naa, kani nɔm naa n tiindan ni. Nduyɛ, o diola nɔmndan naa n hinul vanaa cɔvaa sɛ́lɛ́ bɛndua ha ni. Mɛlɛka, nɔm co Hala naa ni, cɛl mì vanacieo nɔla nɔm te.»

¹¹O kon, mí Mɛlɛka koaŋ Etiopiia Asa a Yudaa o hɔl, má ɲaanun.

¹²Mí Asa a vanaa ndɔa cɔwva ɲaanun nda kɔɔli háá Kerar. Mí Etiopiia vu taw-taw, vana-vana nɔla yoomu ndɔɔ baŋa le, kani Mɛlɛka a vanaa ndɔa cɔwva diw nda ni. Mí Yudaa poonda bolofaa cɔwvo taw, má kɔannun a ndu.

¹³Má bii vɛlɛ kobiláà balu Kerar lan kpow, kani Mɛlɛka ndóò cii nin vanaa va o kobila lan nin-nda siòònde luei. Má poonda ɲɛm va lon-ndon kpow, má kɔannun.

¹⁴Má kɔ del vɛlɛ vanaa va cɔlua mandaa-a coo, má biw saa, cuinnda a ɲɔɔmɛɛa taw, má muungun Yerusalɛm a nda.