Read Kissi 2Dɛnnda lemasalan 15 Bible Online

2Dɛnnda lemasalan 15 - Kissi bible

2Dɛnnda lemasalan 15

¹Mí Kɔl Hala-o luɛi Asaria po Obɛd-o nin,

²mó kɔa o Asa lo, mó dimul ndu aa: «La yaŋ ya nilan, nɔm Asa, Yudaa a vanaa fula o polale Bɛnyamɛn-nden nin-nda! Te la co vɔ pɛ Mɛlɛka o ibuŋ, mɛɛ ndu bɛɛ vanin a niaa. Te la nuwviaa pɛ ndu, o cɔmnunnin niaa, kɛ te la mulul pɛ ndu kɔɔ, ndu bɛɛ mululnin niaa kɔɔ.

³Telen vilɛi hiow lɔ́ɔ́ kon, Israɛlla ndáà nɔ Hala kpeekpei le, vana-solia-lasálà ve nda tɛɛn le nda pɛɛku le, ndáà nɔ vɛlɛ tɔŋ te.

⁴Kɛ o dɛnɛ nda palaa nin, má muungu Mɛlɛka Hala Israɛlla o ibuŋ, má nuwviaa ndu, mó cɔmnun nda.

⁵O telen kon nin, vana-vana ve nila ɲulu le, kani vanaa va o lɛŋnde kpow nin-nda va a kɔlta yulan-yulanndan.

⁶Vanaa-mangalaa-isɔɔa va diuvanndo vellaa-velle. Kobilan la va delnanndo coo vella-velle a cɔwvo, kani Hala va nda hiiloo a dɛnnda palaala súú-súù ka tuisio nda coo.

⁷Kɛ sisa niaa niaa, la luei yoomuan, la vu n'dial te, kani baalala niaalan la dɔawnunnin vɔ̀ngɔ̀.»

⁸Mɛɛ masaa Asa tuei sɔɔn Asaria vana-tɛɛngaa-diom Hala-o, po Obɛd-o soo-on, mó sɔla yoomuan. Mó tɛɛmbuu sooluula va o tàndá Yuda-o a o tàndá Bɛnyamɛn-ndo nin-ndan kpow, mó tɛɛmbuu vɛlɛ sooluula va o kobila ndóò bii o lɛŋnde n'pembule Efraim-nden nin-ndan. O kon kɔɔli, mó mingi fonda-loamaa-lasálà Mɛlɛka va o Cɛi-Mɛlɛka-o hɔl-ndɔ-o toosiaa.

⁹Mí Asa cuungiaa Yudaa a polale Bɛnyamɛn-nden, mó cuungiaa vɛlɛ Israɛlaa fula o polale Efraim-nden nin, o polale Manase len nin a o polale Simeɔn-nden nin mí ndáà kɔa o vionnɔnndo nin ndu o ba bɛngu-a, kani Israɛlaa bɔɔ-bɔɔ cɔu maa Mɛlɛka Hala ndɔɔ va ndu ikɛi, má del ndu kɔɔli.

¹⁰Vɔsi Asa suili vɔsilan tɔ́ a laŋuɛɛnu o masalen-ndo, o paangii yàándɔɛi nin, má cuungian Yerusalɛm.

¹¹Paale len, má cua nawva kɛmɛ leŋɔmmɛw a saa vàálan tan ŋɔmmɛw o cɔlua ndáà poonda yaamɔaa ndaa o ba o cɔwvo-a tɛɛn, má solul Mɛlɛka sálàlan.

¹²Má yii kpemaa le Mɛlɛka, Hala fuɲaa ndaa mamaa holnɔnndo a kɔlta ndalan a á yoomula ndalan kpow.

¹³Vana-vanáà kɛɛ pɛ le sɔɔn Mɛlɛka Hala Israɛlla biyɔɔ a kɔl ndɔɔ kpow, o va cuaambɔ o va kaasonɔ, o va vanapɔnɔ o va vanalanɔ, vana kon ndóò sɔlanin piɔ́mndo.

¹⁴Má cua ciɛ́ɔn coocoo kpélen o Mɛlɛka lo, má va yoondiaalan, bululan a leela saalan hɔŋndo.

¹⁵Mí Yudaa kpow a dɔawnun ɲaale le kpema ndáà yii kon-ndo, kani a kɔlta ndalan kpow nda mɛnan ni. Mí ɲɔɔ hɛnan vana-vana le Mɛlɛka holnɔnndo a kɔl ndɔɔ kpede. Nduyɛ, mí Mɛlɛka cɔmnun nda, mó luei nda kɔlɲuloo tɛɛn a lɛŋii salu pɛɛngulan a lɛŋnde ndalen-nde.

¹⁶Mí masaa Asa faŋa vɛlɛ Maaka mama ndɔ[5] bolle vanlaandua le tùú Maaka ndóò sɛl piɔmndo le hala laandoo Asera-o. Mí Asa pesipesi sungbule len, mó loam-nden o pee pɔmbɔɔ Sedrɔn kɔngɔ.

¹⁷Asa ndóò kaola Mɛlɛka a kɔl ndɔɔ kpow, kɛ o vi lende o faŋa tombun soolan Israɛl te.

¹⁸Mó luei ɲɛm fuɲa ndɔ a n ndu pila siinguu teengen le Mɛlɛka-on o Cɛi-Hala-o nin. Ɲɛm mun yɔŋnun mun ni: volion, sianion a ɲɛm súú-súù ka.

¹⁹Háá mí Asa suili vɔsilan beleyaa a laŋuɛɛnu o masalen, cɔw del te.