Read Kissi 2Dɛnnda lemasalan 17 Bible Online

2Dɛnnda lemasalan 17 - Kissi bible

2Dɛnnda lemasalan 17

¹Mí Yosafat po Asa-o koma sul masaa o fonda Asa fuɲa ndɔ-o. Mó sɔla kpaayaa taw o masale ndɔlen nin le masale Israɛlla simullo.

²Mó kɛsi kundala vanaa cɔwva o kobila mayoomula va o tàndá Yuda-o nin-ndan kpow nin. Mó kɛsi vɛlɛ vanaa cɔwva o lɛŋnde len nin a o kobila Asa fuɲa ndɔ ndóò hɛlu polale Efraim-nden o ba lan nin.

³Mɛlɛka va Yosafat ikɛi, kani nɛila David, fuɲa ndɔ mamaa kela paandu coo lan koni ndu bɛɛ va kelaa coo ni. O cɛl le Baal sooloo le.

⁴Kɛ mó kindikindin le Hala fuɲa ndɔ mamaa sinaa a le silala ndɔlan biyɔɔ. O del dɛnnda vanaa tɔ̀a va tosaa Israɛl-tan kɔɔli le.

⁵Le hee, mí Mɛlɛka luei masale ndɔlen yoomuan. Mí Yudaa kpow a va ndu ɲɔɔn yɔngoo, mó sɔla bolofaa a biiloo taw.

⁶Mó kialun o kɔl nin le kelaa o nɛila Mɛlɛka lan kpow coo. Mó tɛɛmbuu tombon a sooluula va o tàndá Yuda-o nin-ndan.

⁷O vɔsi yàándɔɔ o masale ndɔlen nin, mó viam vanaa ndɔa kúndàá pum le vannda pɛɛkoo o kobila va o tàndá Yuda-o nin-ndan nin, nda yɔŋnun haa ni: Bɛn-Hail, Abdia, Sakari, Netaneɛl a Mikaya.

⁸Mó viam leviia pum nda ndaa latulu: Semaya, Netania, Sebadia, Asaɛl, Semiramɔt, Yonatan, Adoniya, Tobiya, Tob-Adoniya a vanaa-solia-lasálàá nda ŋiɔn: Elisama nda Yoram.

⁹Má cua sɛbɛ tɔŋ Mɛlɛka-o, má va ndu vannda kpow keiyo pɛɛkoo o kobila va o lɛŋnde len nin-ndan nin.

¹⁰Mí siòònde bii masɛi balu tàndá Yuda-o-e kpow a Mɛlɛka, vana-vana hinul-lɛ Yosafat a cɔw le.

¹¹Mí Filistia yoo ndu ɲɛm-kéan a volion le muloo, mí Arabua bɛɛ yoo ndu saa kóndóa vàálan tan ŋɔmmɛw a kɛmɛ leŋɔmmɛw (7 700) a cuinaa toovia vàálan tan ŋɔmmɛw a kɛmɛ leŋɔmmɛw (7 700).

¹²Mí Yosafat hiaw laci a kpaayaa sɔlaa. Mó tangul calta vanaa cɔwva a cɛila mandaala bolofaa lan o tàndá Yuda-o nin.

¹³Baloo va ndu o ba taw o kobila va o lɛŋnde len nin-ndan nin. Mó kɛsi kuubaa cɔwva Yerusalɛm ciee.

¹⁴Má sɛva nda diolan mɛɛ nda cɛn tum o yungula ndalan nin yɛ, nda yɔŋnun haa ni: o yungu Yuda-o nin, vannda vaalan kɛmɛ leyáá (300 000), Adna va simlacinɔ ndaa ni.

¹⁵Vanaa va ndu ikɛi kpeelun-nda yɔŋnun haa ni: Yohanan, ndu va simlacinɔ kuubaa cɔwva vaalan kɛmɛ lediin a belaŋɔmaa (280 000),

¹⁶Amasia po Sikri-o yɔngun ndu pila le baala Mɛlɛka-o tosaa-o va kuubaa cɔwva vaalan kɛmɛ lediin bollen (200 000).

¹⁷O polale Bɛnyamɛn-nden nin, simlacinɔ lebollo o simlacia vanaa va kundala n'van vàá-vàálan tɛɛn-nda yɔŋnun Eliada ni, ndu va vanaa cɔvaa ndáà nɔ kpaasiaalan a kɔ̀ɔ̀la cɔwlan-nda bollen ni.

¹⁸Vana va ndu ikɛi-yo yɔŋnun Yehosabad ni, vanaa cɔvaa o va bollen-nda a va vannda vaalan kɛmɛ belaŋɔmaa (180 000), kuubaa cɔvaa ndáà nɔ ɲɛm cɔwvon-nda pɛɛn.

¹⁹Haa yɔŋnun vanaa baalaa masaa ni, handɔɔ o vanaa ndóò kɛsi o kobila mayoomulan nin o tàndá Yuda-o nin-ndan coo.