Read Kissi 2Dɛnnda lemasalan 20 Bible Online

2Dɛnnda lemasalan 20 - Kissi bible

2Dɛnnda lemasalan 20

¹O kon kɔɔli, mí Moabua, Amɔnnda a Maoniia a hinul Yosafat a cɔwvo.

²Mí vanaa pum kɔ dimul ndu sɔɛi ken aa: «Vanaa cɔwva co nɔm hinullo sɛ́lɔ́ɔ́ taw cɔnɔnndo o mɛmma hɛlii bɛnduan kɔngɔɔ leeloo, o lɛŋnde Edɔm-nden nin, a co nihau Hasasɔn-Tamar, kobi nda veelu aa Ɛin-Kedi-o pɛɛn.»

³Mí siòònde bii Yosafat, mó kialun o kɔl le Mɛlɛka piɛiyo, mó yɔngu yondaa o Yudaa kpow lo le sumndo biyɔɔ.

⁴Mí vanaa va o kobila co o tàndá Yuda-o nin-nda kpow a fula, má cuungian nɛɛ pilɛ le Mɛlɛka piɛiyo.

⁵Mí Yosafat sim Yudaa a vanaa fula Yerusalɛm-nda tɛɛn o Cɛi-Mɛlɛka-o hɔl-ndɔ o Bɛɛ Sɛnɛiyo[7] nin,

⁶mó piɛi aa: «Mɛlɛka, Hala fuɲaa naa mamaa co o halataala-o. Vɛ̀ɛ̀ o co nɔm te co masalen tosaa o masɛi co o lɛŋnden kpow coo-e coo le? Nɔm o ba yoomuan a kpaayaa co ni. Lelan, vana-vana nɔla mò simul nɔm te.

⁷Éé Hala naa! Vɛ̀ɛ̀ o co nɔm te tow vanaa va o lɛŋnden nden nin-nda vanaa nɔmnda, Israɛlla laci, má ke cuavaa-imamaa Abraham caan nɔm-nda lɛŋnde kalalen, mì le va ɲɛ nda pɛ le?

⁸Nɔm te ke nda len haliko ma cal lenin, mà tangul Cɛi-Diandaa o diola nɔmndan te? Nɔm dimi ni aa

⁹te dɛnɛ palaa del pɛ naa coo, o va cɔw, o va nàà halima, o va mayi, n hun sim o Cɛiyo ho hɔl-ndɔ, kon co yɛ nɔm o hɔl ni, kani a co nanu, n solul nɔm diomndan le sangala naalan, o kon a mulul naa, a ciindiaa naa.

¹⁰Kɛ má cè niko mɛɛ Amɔnnda, Moabua a vanaa co o pembon Seir coo-a co naa hinullo a cɔwvo yɛ. Tuma fuɲaa naa mamaa va faŋanndo Esipte-o, nɔm Mɛlɛka, a cɛl mà kei o lɛŋnde vanaa kan nin te. A cɛl vɛlɛ mà diw nda le. Lelan nda kpakpala nda ni.

¹¹Kɛ tofa vɔ vɔ̀ngɔ̀ nda co naa hau mingullo-o, a co naa hunɔɔ tovɔɔ o lɛŋnde n ke naa kɛ́ɔ len coo.

¹²Éé Hala naa! Vɛ̀ɛ̀ a kilu nda iyama le? Kani n nɔ kpaaya le vanaa cɔvaa sɛ́lɛ́ bɛndua co naa ha hinullo-a simullo le, n sina ɲɛ naa n tosa le. Lelan naa n mulin o nɔm ndo le nɔm piɛiyo nuaa ni.»

¹³Vanpiaandua Yuda kpow, handɔɔ laandaa ndaa a á cuavaa ndaa coo a va isisi Mɛlɛka o hɔl.

¹⁴Yahasiɛl leviinɔ lo isisi vannda tɛɛn, mí Kɔl Mɛlɛka-o toal ndu coo. Yahasiɛl kon po Sakari-o o va ni, fulaa o polale Asaf len coo. Matania velu Yeiɛl ni, mí Yeiɛl vialu Benaya, mí Benaya ndu vialu Sakari velu kon Yahasiɛl-lo.

¹⁵Mí Yahasiɛl yonda aa: «Niaa vanaa fula Yuda a Yerusalɛm-nda kpow, kɛ taama-taama nɔm masaa Yosafat, la yaŋ nilan! Mɛlɛka dimi aa: ‹Siòòŋii bii niaa le, la vu n'dial le vanaa cɔvaa sɛ́lɛ́ bɛndua ha le, kani o co niaa le co cɔwvo tosa le, kɛ ya Hala niaa.

¹⁶Siɔdii, la tol, la kuel nda. A vanin pembei Hasit helɔɔ. La co nda komal o bóllo mɛɛlulan, o lɛŋnde veselɛilen Yeruɛl hɔl-ndɔ.

¹⁷O co niaa le cɔlɔbanin ndon te. Niaa niaa fula daama mì la kɔ sim, o kon la canin mɛɛ ya Mɛlɛka baŋanin niaa yɛ. Siòòŋii bii niaa le, la vu n'dial te.› Lelan, siɔdii la fula, la kɔ bɔŋa nda, Mɛlɛka vanin niaa ikɛi.»

¹⁸Mí Yosafat tundun háá lɛŋ Mɛlɛka o hɔl, mí Yudaa a vanaa fula Yerusalɛm-nda bɛɛ a deli lɛŋ kpow Mɛlɛka o hɔl, má biilu ndu.

¹⁹Mí leviia pum, fulaa o polale Kehat len a o polale Kore len nin-nda a sim, má heelu diomndan kpélén le Mɛlɛka Hala Israɛlla biiloo.

²⁰Diimandɔɔ idiiyo púŋ, mí nda kpow a can le kɔlan a kpeŋii lɛŋnde veselɛilen Tekoa. Telen kɔaa tiiyaa, mí Yosafat dimul nda aa: «Niaa Yudaa a niaa Yerusalɛmnda, la yaŋ ya nilan! La tiindan Mɛlɛka Hala niaa mì la sim yili. La kɛsi kɔltan vanaa-tɛɛngaa-diom Hala-a ndɔa coo, mì la tiwba.»

²¹Mí Yosafat cɛlan nda vannda, mó hɛli vanaa solia n'condua, mó simi nda vanaa cɔwva laci, domala ifalenndan la va nda lekɔɔ, má va Mɛlɛka sangalaa o condon nin aa: «La biilu Mɛlɛka, kani kaola ndɔɔ nɔ la mɛɛlu le.»

²²Telen nda kandu Mɛlɛka biiloo a condon-ndo, mí Mɛlɛka hiŋ Amɔnnda, Moabua a vanaa va icali o pembon coo-a hɔlla, áà hin kan le Yudaa delɔɔ coo a cɔwvo-a pɛɛn, mí nda pila muungu diuvanndo.

²³Mí Amɔnnda nda Moabua del vanaa va icali o pembon Seir coo-a coo a cɔwvo, má diw nda kpow. Ndáà ciiyo nda diwvo, mí nda pila can diuvanndo vellaa-velle.

²⁴Mɛɛ Yudaa tiiya o fonda vanáà ca lɛŋnde veselɛilen-ndo, má tofa a kpengii vanaa cɔvaa sɛ́lɛ́ bɛndua va nda hinullo-a, kɛ a ci ɲɛ-ɲɛ celen te, fɔ vanaa va ihini lɛŋ lɛ́ɛ́siɛn a vílɛ́iya-a, o kɛ́-kɛ̀ óò helun te.

²⁵O kon, mí Yosafat nda vanaa ndɔa kɔa ɲɛm vanvílɛ́iya kan cɔwviaa, má komal cɔlua a bolofaa taw-taw, volɔɔla cuɛinanndan a ɲɛm kɛndɛ-kɛndɔn nda tɛɛn. Má cɔwviaa mun taw, a nɔla kɔlan a mun kpow le. Palɛi ndii yáá, a va bolofaa cɔw kon cɔwviaa, kɛ a cii le, kani o va o bɔɔ.

²⁶O paale hiɔɔlundɔlen coo, má cuungian o bóllo Beraka nin, má mel Mɛlɛka balika. Lelan nda ke fonda kon diolan ni aa «Bóllo Beraka», kon co dimio ni aa «Ból balikaa». Diola lan o nɔ vɔ háá paalen nden ni.

²⁷Mí Yosafat sim vannda Yuda a haa Yerusalɛm laci, mí nda kpow a bii nɛiyo le muungoo Yerusalɛm a ɲaaloo, kani mí Mɛlɛka luei nda kɔlkɛndɛ bɛndoo nin le baŋa o baŋa nda yaamɔaa ndaa o ba-o.

²⁸Má luɛi Yerusalɛm ciee, má kɔa o Cɛi-Hala-o, a va bɔ̀linndan a bondomalan lɔɔ, a bululan hɔŋndo.

²⁹O masɛi va o lɛŋii celennde nin-nde nin, mɛɛ vannda tuei maa Mɛlɛka cɔlɔba yaamɔaa Israɛlla, mí siòònde bii nda.

³⁰O kon, mí masale Yosafat len le sɔla kɔlɲuloo, mí Hala luei ndu kɔlɲuloo tɛɛn a lɛŋii ndíì balu ndu-e kpow.

³¹O tàndá Yuda-o nin Yosafat va masalen tosaa ni. Ndóò nɔ vɔsilan beleyaa a laŋuɛɛnu mó siŋnun masaa, mó tosa masalen vɔsilan bidiin a laŋuɛɛnu Yerusalɛm. Asuba kala ndɔ ndóò nɔ diolan ni, cua Silhi-o.

³²Nɛila Asa fuɲa ndɔ kela coo lan koni ndu bɛɛ kela coo ni, o bindu o kɛ́-kɛ̀ le, o va dɛnɛ sandaa tosaa Mɛlɛka o hɔl.

³³Kɛ o faŋa tombun soolan te, vannda ndáà yiinun-ndɔ vɛlɛ a Hala fuɲa ndaa mamaa a kɔlta ndalan kpow le.

³⁴Sɔɔn tɔ̀un Yosafat-on, kandɔɔ a mɛɛlulan kpow, n co n'sɛvaa o sɛbɛ Dɛnnda Yehu, po Hanani-o nin, o sɛbɛ Dɛnnda lemasalan Israɛl nin pɛɛn.

³⁵O sɔɔn mún kɔɔli, mí Yosafat masaa Yuda yii canyɛi nda Ahasia va masaa Israɛl-lo, Ahasia kon ve vana kɛndɛ le.

³⁶Má cɛlan le dɛ̀ndɛ̀la mamɛnndan toosiaa le kɔlan Tarsis. Má toosiaa lan Ɛsiɔn-Kebɛr.

³⁷Kɛ mí Eliesɛr, po Dodava fula Maresa-o tɛɛngul Yosafat diom Hala-o, mó dimi aa: «Le tùú n yii canyɛi niaa Ahasia-o, Mɛlɛka co hunɔɔ baala n tosa-o tɛɛmbuu.» O kon mí dɛ̀ndɛ̀lan la tambu, la kue lɛ Tarsis le.