Read Kissi 2Dɛnnda lemasalan 21 Bible Online

2Dɛnnda lemasalan 21 - Kissi bible

2Dɛnnda lemasalan 21

¹Yosafat vuo, má kumbu ndu o fonda ndáà kumbu fuɲaa ndɔa mamaa-o, o Kobi David-o nin. Mí Yoram po ndɔ koma sul masaa o fonda ndɔɔ.

²Yoram, po Yosafat-o ndóò nɔ puapilɛa, nda yɔŋnun haa ni: Asaria, Yehiɛl, Sakari, Asariahu, Mikaɛl a Sefatia. Nda kpow yɔŋnun poaa Yosafat va masaa o lɛŋnde Israɛl-ten coo-a ni.

³Mí Yosafat fuɲa nda ke nda bolofaa taw o volion nin, o sianion nin a ɲɛm sɔvɛɔn celen taw. Mó ke nda vɛlɛ kobila mayoomulan o tàndá Yuda-o nin. Kɛ Yoram o ke masalen ni, kani ndu va po tasoo ni.

⁴Mɛɛ Yoram koma sim yili o masalen o fonda fuɲa ndɔ-o, mó diw puapilɛa ndɔa a simlacia Israɛlla a pum a mɔɛi cɔwve.

⁵Ndóò nɔ vɔsilan beleyaa a latiɔn, mó siŋnun masaa. Mó tosa masalen Yerusalɛm vɔsilan tan ŋɔmaa.

⁶Mí ndu bɛɛ kela kela vɔɔndo maa masaa Israɛlaa tɔ̀a, maa mɛɛ yungu Akab-o kela yɛ. Kani cua Akab-o ndóò yil o nɔ̀u nin ni. Mó tosa dɛnɛ bɛnda Mɛlɛka o hɔl too.

⁷Kɛ le tùú Mɛlɛka ndóò yiilu David kpemaa-o, o cɛl le yungu ndɔɔ tɛɛmbuuo le, kani mí ndóò dimul ndu maa poaa ndɔa tosanin masalen le lɔ́ɔ́-lɔ́ɔ̀[8].

⁸Telen Yoram va kon o masalen coo-o Edɔmnda luɛi o seesiɛi a masalen Yuda ni, mí nda pila hɛlulun masaa.

⁹Mí Yoram kɔa a kuubaa ndɔa a á ɲɛla ndɔla ɲaanannda soa nan-ndon kpow. Icɔllo, mí masaa nda vanaa ndáà ɲaanun ɲɛla ɲaanannda soa nan-ndan-nda kɔ simul Edɔmaa balu nda-a.

¹⁰Cɔn a telen kon háá paalen nden, Edɔmnda cɛl lɛ le vaa o masale Yudaa bɛngu le. O telen pilɛ kon bɛngu koni vanaa va Libna-a bɛɛ simul Yoram a nila kalulan ni, le kɛɛ o kɛɛ Mɛlɛka Hala fuɲaa ndaa mamaa-o.

¹¹Mí Yoram cɔaw vɛlɛ tombun soolan o pembon Yuda coo. Mó tosa mí vannda Yerusalɛm a vannda Yuda a luɛi o laasianndo.

¹²Paale pilɛ, mí Yoram sɔla sɛbɔɔ fulaa Elii vana-tɛɛngaa-diom Hala-o o ba, mó dimul ndu aa: «Mɛlɛka Hala David fuɲa nɔm mamaa dimi maa le tùú n kɛɛ le kelaa o nɛila Yosafat fuɲa nɔmndan a o nɛila Asa masaa Yuda lan coo-o,

¹³le tùú n tosa mɛɛ masaa Israɛl tosa yɛ-o, le tùú n luei Yudaa a Yerusalɛmnda o laasianndo mɛɛ yungu Akab-o tosa a Israɛlla yɛ-o, le tùú n diw vɛlɛ puapilɛa nɔmnda, yungu fuɲa nɔmndo, a ndáà hiow kan vaa fisa a nɔm-nda-o,

¹⁴Mɛlɛka tuisinin kpundɛ bɛndoo vanaa nɔmnda, poaa nɔmnda, laandaa nɔmnda a ɲɛ-ɲɛ co nɔm o ba coo.

¹⁵Nɔm pila bɛɛ, nààla súú-súù ka la biinin nɔm, kɛ nàá o pilɛ lonin nɔm palaa lepalaa-lepala háá mì pulon fula nɔm.»

¹⁶O kon, mí Mɛlɛka luei Filistia a Arabua va icali Etiopiia macɛlu-a yiyanndo nin le Yoram delɔɔ coo a cɔwvo.

¹⁷Má kuel Yudaa, má del nda coo a cɔwvo, má poonda bolofaa va o cɛi lemasaa nin-ndo kpow, má biw vɛlɛ poaa ndaa a laandaa ndaa, má kɔannun a nda. Fɔ Yoahas, po ndɔ pɔmbɔɔ daama lo ndu masa kon o ba ni.

¹⁸O dɛnnda lan kpow kɔɔli, mí Mɛlɛka lɔaa Yoram a nàà dembe vana nɔla cɛw loo.

¹⁹Mí nàà kalaa va hiovɔɔ laci lepalaa-lepala. O vɔsi diinndɔɔ mɛɛlulan, mí pulon fulan ndu, mó sanga sangaa pila, mó vu. Kɛ vanaa ndɔa lum ansan le ndu mɛɛ ndáà tosa le fuɲaa ndaa mamaa yɛ le.

²⁰Yoram ndóò nɔ vɔsilan beleyaa a latiɔn, mó siŋnun masaa. Mó tosa masalen vɔsilan tan ŋɔmaa Yerusalɛm, mó vu. Vana-vana mɔnɛi bii le piɔ́m ndɔɔ le. Má kumbu ndu o Kobi David-o nin, kɛ o co o sɛila ndáà kumbu masaa lan nin te.