Read Kissi 2Dɛnnda lemasalan 22 Bible Online

2Dɛnnda lemasalan 22 - Kissi bible

2Dɛnnda lemasalan 22

¹Mí vannda Yerusalɛm a hɛli Ahasia po lum masaa Yoram-ndo le ndu siinguuo masaa o fonda fuɲa ndɔ-o. Kani telen vanaa cɔvaa Arabua hun luɛi o dɔ́ɔ́ngɔ́ɔ̀ nin-ndo, má diw poaa tasea kpow. Nuaa Ahasia po Yoram-ndo sɔla masalen Yuda ni.

²Ahasia ndóò nɔ vɔsilan belehiɔɔlu a latiɔn mó siŋnun masaa. Nduyɛ mó tosa masalen vɔsio pilɛ Yerusalɛm. Kala ndɔ yɔŋnun Atali ni, cua Ɔmri-o.

³Mí Ahasia bɛɛ kela kela vɔɔndo hiovɔɔ yungu Akab-o, kani kala ndɔ va ndu silala vɔɔnndan yɔngoo le dɛnnda vɔɔnndan tosaa.

⁴Mó tosa ɲɛ hɛnan Mɛlɛka loo mɛɛ yungu Akab-o tosa yɛ. Fuɲa ndɔ vuo, mí poaa Akab-a kan siŋnun vanaa ndɔa silaa, má luei ndu o pɔwlan ni.

⁵Silala ndalan koni la tosa vɛlɛ ni mó kɔa nda Yoram, po Akab va masaa Israɛl-lo, le Hasaɛl masa Aramiia cɔlɔbaa Ramɔt, o tàndá Kalaad-o nin. O cɔw kon nin, mí Aramiia yɔŋul Yoram.

⁶O kon mó muungu Yisreɛl le yɔŋul nda yɔŋul ndu kon o cɔwvo Rama-o cɛwvo, cɔw tosan kon nda tɛɛn nda Hasaɛl masa Aramiia-o pɛɛn. Mí Ahasia, po Yoram va masaa Yuda-o kɔa ndu yilɔɔ, kani yɔŋullo pila ndáà yɔŋul ndu ni.

⁷Telen Ahasia kɔɛ kon Yoram yilɔɔ-o, mí Hala tosa mí ndu Ahasia sɔla piɔ́mndo. Ndóò tiiyaa dɔ́ɔ́, má kɔa Yehu, po Nimsi-o bɔŋa nda Yoram. Nduyɛ, Yehu kon Mɛlɛka ndóò hɛli le yungu Akab-o diwvo ni.

⁸Tuma Yehu va sɛɛngianndo nda yungu Akab-o-o, mó ca simlacia Yuda a poaa puapilɛa Ahasia-a, a va baalaa o masaa lo-a, mó diw nda.

⁹Mó viam vannda Ahasia nuwviaa, má kɔ saalun ndu Samari nɛɛ o va o viannanndo-a. Má hun a ndu o Yehu lo, má dii ndu, má kumbu ndu. Kani má dimi aa: «Po Yosafat-o o co ni, Yosafat va diom Mɛlɛka-o biyɔɔ a kɔl ndɔɔ kpow-vo pɛɛn.» O kon, o yungu Ahasia-o nin, vana-vana ve lɛ le óò tiwba le siŋnɔnndo masaa-o.

¹⁰Atali kalaa Ahasia cɔu maa po ndɔ vi, mó can, mó viam vannda le kɔlan poaa yungu lemasaa Yuda kpow diwvo.

¹¹Kɛ telen o va kon nda diwvo-o, mí Yehoseba cua masaa Yoram-ndo ciimbuu Yoas, po Ahasia-o, mó kɔ luei ndu nda vanalanɔ va ndu mandaa-o o cɛi kpelelan la va nin-ndo nin. Nuaa Yehoseba, cua laandu masaa Yoram-ndo, ó va lanɔɔ Yehoyada vana-solia-lasálàá-o, ó va vɛlɛ yemaa Ahasia-o cɛwcɛw Yoas Atali o ba ni. Atali nɔla ndu diyɔɔ le.

¹²Telen Atali va masalen tosaa o lɛŋnden coo-o, mí Yoas tosa vɔsilan tan ŋɔmpum nda o ba o vianaa o Cɛi-Hala-o nin.