Read Kissi 2Dɛnnda lemasalan 23 Bible Online

2Dɛnnda lemasalan 23 - Kissi bible

2Dɛnnda lemasalan 23

¹O vɔsi ŋɔmmɛwndɔɔ, mí Yehoyada kialun o kɔl le cɛlanndo nda simlacia va vanaa cɔvaa kundala n'van kɛmɛ-kɛmɛlan bollen-nda. Vanaa kan va haa ni: Asaria po Yeroham-ndo, Ismaɛl po Yohanan-ndo, Asaria po Obɛd-o, Maaseya po Adaya-o a Elisafat po Sikri-o.

²Má kei o kobila va o tàndá Yuda-o nin-ndan nin, má cuungiaa leviia a vanaa va bolii lapangɛi o yungula Israɛlla nin-nda kpow. Ndáà tiiyaa Yerusalɛm,

³mí nda kpow a yii diomnden nda masaa-aa o Cɛi-Hala-o nin. O kon, mí Yehoyada dimul nda aa: «Má cè po masaa! Ó tosanin masalen mɛɛ Mɛlɛka dimi a poaa David-a o kɔɔ yɛ-o pɛɛn.

⁴Ɲɛ niaa tosanin-ndo co hoo ni: te vanaa-solia-lasálàá a leviia co baalaa tosaa o diola luɛyaala Cɛi-Hala-o o paale pɛngiaalen coo-a piɔwnun pɛ kundalan layàá,

⁵kundaa pilɛ bɛnda mò cumul cɛi lemasaa, mì kundaa pilɔɔ ndu cumul dio luɛyaa kobio Yesɔd. O kon vannda kpow a vanin o bɛ́ɛ̀la Cɛi-Mɛlɛka-o nin.

⁶Vana-vana lúɛì o Cɛi-Hala-o nin te, fɔ vanaa-solia-lasálàá a leviia co baalaa-a daama: nda tiwba mà luɛi, kani a co a diandaa. Kɛ vanaa tɔ̀a nda tosa baala cumulaa Mɛlɛka yɔngun nda-o,

⁷mì leviia pila a balu masaa sɔ́, o kɛ́-kɛ̀ a ɲɛm cɔwvon o ba. O kon, vana-vana luɛi pɛ o Cɛi-Hala-o nin, la dii ndu. Nɛɛ-nɛɛ masaa va pɛ kɔlan, la kɔɛ niaa ndaa.»

⁸Mí leviia a Yudaa kpow a tosa ɲɛ-ɲɛ Yehoyada, vana-solia-lasálàá ndóò dimul nda le tosaa. Mí nda kpede, vana-vana cua vanaa ndɔa, vanaa va baalaa kandɔɔ o paale pɛngiaalen coo-a a vanaa va ndu siowvo o paale len coo-a, kani Yehoyada ndóò ke kunda oo kunda pɛngi le.

⁹O kon, mó cua kɔɔn a kɔ̀ɔ̀la cɔwla bɛndulan a la pɔmbɔlan, mó yɔngu simlacia va vanaa cɔvaa kundala n'van kɛmɛ-kɛmɛlan bollen-nda, la masaa David ndóò nɔ o Cɛi-Hala-o nin-ndan pɛɛn.

¹⁰Mó simi vannda kpow o fonda-loamaa-lasálàá a Cɛi-Hala-o ikɛi, má balu masaa sɔ́, vana-vana a ɲɛm cɔwvon o ba, kandɔɔ o Cɛi-Hala-o a ba too kɔlan háá a ba luaŋ-ndo.

¹¹Mí Yehoyada a poaa ndɔa soli masaa, má vow ndu mɔsil lemasaa, má yɔngu ndu vɛlɛ sɛbɛ tɔŋndo. Má suili ndu masaa. Má pɔla ndu, má dimi aa: «Màá masaa viow si!»

¹²Atali tueyɔɔ vanaa va ndu masaa ɲaanɔnndo kɔɔli a ndu sangalaa-a diom, mó kɔa nɛɛ nda va o Cɛi-Hala-o-a.

¹³Ndóò mɛɛndianndo, mó ca masaa isisi o sungbulen ikɛi nɛɛ o dema isisi o dioo sondoo-a. Simlacia a vanaa hɔŋaa labulua va isisi masaa ikɛi kpɛɛlun. Vanaa va lon-nda kpow a va a ɲaaloo, vanaa hɔŋaa labulua va bululan hɔŋndo, vanaa solia n'condua va condon solio a ɲɛm-caan. Le hee, mí Atali sɛɛsian volɔɔlan lekɔɔ, mó yonda aa: «A yii ya dúmbú! A yii ya dúmbú fɔ́!»

¹⁴Mí Yehoyada, vana-solia-lasálàá dimul simlacia vanaa cɔvaa kundala n'van kɛmɛ-kɛmɛa va nda bolle-a aa: «La soli Atali niaa tɛɛn, mì la kɔɛ a ndu. Vana dem pɛ niaa, la dii vana kon.» Kani mí vana-solia-lasálàá ndóò dimi aa: «A díì Atali o Cɛi-Mɛlɛka-o nin te.»

¹⁵O kon, má kɔa a ndu a kpengii bɛɛ masaa. Ndáà tiiyaa o Dio-soa, má dii ndu lon.

¹⁶Mí Yehoyada yii kpemaa Mɛlɛka, masaa a vannda tɛɛn, haliko mi vanaa kan ndáà lo Mɛlɛka o ibuŋ.

¹⁷Mí sɛ́lɔ́ɔ́ kɔ luɛi o máán Baal-lo nin, má tɛɛmbuu ndu, má pesipesi fondala-loamaa-lasálàlan a piɔmaa va lon-nda kpow, má bii Matan, vana-solia-lasálà Baal-lo, má dii ndu o fondala-loamaa-lasálàlan hɔl-ndɔ.

¹⁸Mí Yehoyada ndu sɔaa Cɛi-Hala-o leviaa-solia-lasálàá o ba le ndu hɔlla landɔɔ coo, a David ndóò piɔw o cɛi kon nin le Mɛlɛka sálàla loamaalan solullo-a pɛɛn, maa mɛɛ o co o sɛvaa o tɔŋ Moise-o nin yɛ. Mí David dimul nda le baala kon tosaa a ɲaaloo a á condon.

¹⁹Mí Yehoyada kɛsi kpalilaa cumulaa ladioa o diola luɛyaala Cɛi-Hala-o sondoo yɔŋii vanaa nɔɔlɛiya súúlan kpow ndáà luɛi.

²⁰Mó cuungiaa simlacia va vanaa cɔvaa kundala n'van kɛmɛ-kɛmɛlan bollen-nda, vanaa ndáà ke bɛɛlen-nda, vanaa va masalen tosaa vannda coo-a a vanaa va o lɛŋnde len nin-nda kpow, mí nda kpow a liila masaa. Cɔnɔnndo o Cɛi-Hala-o, má kei o cɛi lemasaa o dio luɛyaa bɛndoo, má kɔ kɛsi masaa o kpɛŋɛ lemasaa coo.

²¹Mí vanaa va o lɛŋnden nin-nda kpow a dɔawnun ɲaale, mí kobio lonnun nila ɲulu. Atali yɛ ndu má dii ndu.