Read Kissi 2Dɛnnda lemasalan 24 Bible Online

2Dɛnnda lemasalan 24 - Kissi bible

2Dɛnnda lemasalan 24

¹Yoas ndóò nɔ vɔsilan tan ŋɔmmɛw, mó siŋnun masaa. Mó tosa masalen Yerusalɛm vɔsilan belehiɔɔlu. Sibia kala ndɔ ndóò nɔ diolan ni, fulaa Bɛɛr-Seba.

²O palɛi Yehoyada, vana-solia-lasálàá-e bɛngu kpow, Yoas va ɲɛ bɛnda Mɛlɛka o hɔl-lo tosaa.

³Mí Yehoyada yil laandua nda ŋiɔn le Yoas, mí Yoas vialu hɔ́aa piaandua a à laandua.

⁴Tumaa pum tiiyaa o kon kɔɔli, mó sɔla yiyanndo le Cɛi-Hala-o mingio toosiaa.

⁵Mó veelu vanaa-solia-lasálàá a leviia, mó dimul nda aa: «La kɔ o kobila co o tàndá Yuda-o nin-ndan nin, mì la kɔ bii Israɛlla volin nda nɔ le solio vɔsi oo vɔsi-on o laba, mì la toosiaa Cɛi-Hala niaa. La tamale dɛ!» Kɛ leviia yala saalan te.

⁶O kon, mí masaa veelu Yehoyada va bolle vanaa-solia-lasálàá-o, mó ɲuna ndu aa: «Le kɔlɔ yɛɛ n co yɛ kɛɔ leviia baŋɔɔ le muloo biyɔɔ vannda Yerusalɛm a haa Yuda o laba maa mɛɛ Moise, vana baala Mɛlɛka-o ndóò kelu le yɔngoo le Cɛi-Hala-o toosiaa yɛ?»

⁷Kani mí Atali cua kɔlvesɛi kon nda poaa ndɔa a mal Cɛi-Hala-o tambei, má cua ɲɛm diandan va lenin-ndon kpow le piɔmndo Baal.

⁸O kon mí masaa Yoas dimul vannda le kesoo toosiaa, mà kɛsi ndu o dio luɛyaa Cɛi-Hala-o ikɛi, o bɛ́ɛ̀.

⁹Má yonda o tàndá Yuda-o nin a o kobio Yerusalɛm nin maa vannda cùú Mɛlɛka muloo, mulu Moise vana baala Mɛlɛka-o ndóò kilul Israɛlla le solio telen nda va o lɛŋnde veselɛilen nin-ndo-o pɛɛn.

¹⁰Mí ɲɔɔ hɛnan simlacia a vannda kpow. A lo hunɔɔ a volion le vowvo o kesoo nin tei, mí kesoo pia cá.

¹¹Telen oo telen ndáà yɛɛ pɛ kesoo o leviia lo, mì ndáà ce volion lenin taw, ndáà kɔɛ a ndu, o kon vana sɛvaa masaa a vanaa va bolii vanaa-solia-lasálàá-a ndáà soli ɲɛ va lenin-ndo, ndáà mingi kesoo o fonda ndɔɔ. Lende ndáà tosa lepalaa-lepala ni háá má sɔla volion taw-taw.

¹²Mí masaa nda Yehoyada a yɔngu vanaa va baalala Cɛi-Hala-o hɔlla landɔɔ coo-a volin mun. Mí nda nda va vanaa va Cɛi kalaa toosiaa le ndu mingio tangullo-a salaa a mun: vanaa sialaa lapowva a vanaa cuaa layindɔa. A mun koni nda va vɛlɛ vanaa toosiaa n'cilinnda a vanaa caa baalaa a daɲan-nda salaa ni.

¹³Mí vanaa ndáà ke baalaa-a kandu ndu tosaa, mí baala kalaa va hiovɔɔ laci ɲɛkɛndɛi. Má mingi Cɛi-Hala-o toosiaa mɛɛ o va yɛ, má simi ndu yili.

¹⁴Lɔ́ɔ́ nda cii baalaa-o, má cuu masaa Yoas nda Yehoyada volin tɔ̀un. Má cɔaw ɲɛm ndaa tosa baalaa o Cɛi-Hala-o nin-ndon a mun: ɲɛm ndáà solin kpeku le sálàla loamaalan solio-on, taalala kólaalan a ɲɛm celeŋun nda cɔw a sianion a á volion-ndon. O palɛi Yehoyada-e kpow nin, vannda va sálàla loamaalan solio o Cɛi-Hala-o nin tuŋ.

¹⁵Yehoyada yuuvaa taw, mó vu o yuuvɛiyo kudɛɛ-kudɛɛ. O cii yoomu vɔsilan kɛmɛ a beleyaa malan o vu.

¹⁶Le tùú o tosa dɛnnda kɛndɛlan Israɛl a o Cɛi-Hala-o nin le Hala bɛɛlen keo-vo, má kumbu ndu o Kobi David-o nin nɛɛ ndáà kumbu masaa-a.

¹⁷O piɔ́m Yehoyada-o kɔɔli, mí simlacia Yuda a hun tuisin masaa Yoas o labɛngunin. O kon, mí masaa yaŋ nda nilan.

¹⁸Má mulul Cɛi-Mɛlɛka Hala fuɲaa ndaa mamaa kɔɔ, má muungu yɔmii soolɛi a piɔmnda sooloo. Le hee, mí kɔltuw Hala-o toal vanaa va o tàndá Yuda-o nin-nda a á vanaa va Yerusalɛm-nda coo.

¹⁹Mó vim nda vanaa-tɛɛngaa-diom Hala-a le nda kanalanndo haliko mi ndáà muungu ndu o ibuŋ. Kɛ a yeŋ nda lani le.

²⁰O kon mí Kɔl-Hala-o luɛi Sakari, po Yehoyada vana-solia-lasálàá-o nin, mó sim vannda o hɔl, mó tɛɛngul nda sɔɔn Hala dimul ndu-on aa: «Le yɛɛ niaa co yɛ silala Mɛlɛka lan kɛɔ biyɔɔ? La sɔlanin tɔnɔ oo tɔnɔ le, kani la cii Mɛlɛka kɔɔ mulul, lelan ndu bɛɛ mululnin niaa kɔɔ.»

²¹O kon mí vannda yii Sakari dúmbú, mí masaa dimul nda le ndu viiyo a powtan o bɛ́ɛ̀ Cɛi-Hala-o nin.

²²Masaa Yoas loonun kɛndɛi Yehoyada, fuɲaa Sakari tosal ndu-e le, mó dii po ndɔɔ. Tuma pá mí Sakari malnun kɔl, mó dimi aa: «Màá Mɛlɛka cɔ ɲɛ yɔŋnun-ndo, mò sala nɔm mɛɛ n tosa yɛ.»

²³O vɔsio ndu pilɛ bɛngu, mí vanaa cɔvaa Aramiia kuel Yoas, má del tàndá Yuda-o a kobio Yerusalɛm coo a cɔwvo, má diw simlacia vanaa kan kpow. Má yoo masa nda va Damas-o ɲɛm nda poondiaa o cɔwvo-on kpow.

²⁴Vanaa cɔvaa Aramiia ndáà kue sɛ́lɛ́ le, kɛ mí Mɛlɛka mal vanaa cɔvaa sɛ́lɛ́ bɛndua fula Yuda-a nda o ba. Kani Yudaa kan ndáà mulul Mɛlɛka Hala fuɲaa ndaa mamaa kɔɔ ni. Sanga Yoas sɔla-o yɔŋnun kon ni.

²⁵Aramiia ciiyo ndu yɔŋullo, má mɛi ndu somisominndo, má kɔannun. O kon mí simlacia va baalaa ndu o ba bɛngu-a yii ndu dúmbú le diyɔɔ o dii po Yehoyada, vana-solia-lasálàá-o. Má dii ndu o kpele ndɔ hinia coo. Má kumbu ndu o Kobi David-o nin, kɛ a kumbu ndu o sɛila ndáà kumbu paandu masaa lan nin te.

²⁶Vanaa yii Yoas dúmbú-a yɔŋnun haa ni: Sabad po Simeat vuɛɛn Amɔnnɔ-o a Yosabad po Simrit vuɛɛn Moabunɔ-o.

²⁷Diola poaa Yoas-a, sɔɔn Mɛlɛka-n nda tɛɛnguu a ndu o kɔɔ-on a mɛɛ o mingi Cɛi-Hala-o tangul-lɛ co n'sɛvaa o sɛbɛ «Dɛnnda lemasalan» nin. Vana koma sul masaa o fonda ndɔɔ-o yɔŋnun Amasia po ndɔ ni.