Read Kissi 2Dɛnnda lemasalan 26 Bible Online

2Dɛnnda lemasalan 26 - Kissi bible

2Dɛnnda lemasalan 26

¹Osias[12] ndóò nɔ vɔsilan tɔ́ a laŋɔmpum, mí vannda Yuda kpow a hɛli ndu, má suilu ndu masaa o fonda Amasia fuɲa ndɔ-o.

²Masaa Amasia vuo, mí Osias mingi kobio Ɛilɔt[13] tangul, mó mingi ndu o masale Yuda len bɛngu.

³Osias ndóò nɔ vɔsilan tɔ́ a laŋɔmpum, mó siŋnun masaa, mó tosa masalen vɔsilan beleŋuɛɛnu a latiɔn Yerusalɛm. Kala ndɔ diolan Yekolia, Yerusalɛm ndóò fula ni.

⁴Mí Osias tosa ɲɛ bɛnda Mɛlɛka o hɔl-lo maa mɛɛ Amasia fuɲa ndɔ ndóò tosa yɛ.

⁵Telen Sakari, vana va ndu pɛɛkoo a sɔɛi Hala-e o kɔɔ-o va yoomu-o, Osias va kelaa o hɛnan Mɛlɛka-o coo. Le hee, mí Hala va kpekula ndɔlan nɛŋio.

⁶Mó kuel Filistia a cɔwvo, mó tɛɛmbuu kpakio Kat, kpakio Yabne a kpakio Asdɔd. O kon kɔɔli, mó mingi kobilan tangul o tàndá Asdɔd-o nin a o lɛŋnde Filistia nin.

⁷Mí Hala mala ndu, mó cɔlɔba Filistia, Arabua va icali Kur-Baal-la a Maoniia.

⁸Amɔnnda va muloo malɔɔ Osias o ba. Mí tɔ́ɔ́ ndɔɔ kɔa háá o pɛɛngulan a lɛŋnde Esipte len, kani o va hiovɔɔ laci a kpaaya sɔlaa tuŋ.

⁹Mí Osias tangul cɛila coocoolan Yerusalɛm, o dio luɛyaa Lesɔngio, o dio luɛyaa Bóllo a nɛɛ kpakio ndóò luei sɔngilen-nda, mó kunga cɛila coocoola lan a kpakilan.

¹⁰Mó tangul vɛlɛ cɛila coocoolan o lɛŋnde veselɛilen nin, mó toaw soonnda mamɛnndan taw, kani ndóò nɔ cɔlua taw o dɛɛlalan nin a o dɛngbɛlan nin. Ndóò nɔ vɛlɛ vanaa vàá a vanaa tɔalaa n'rɛsɛnnda o pembon coo a o tàndá Karmɛl-lo nin, kani ndóò yeema bɔɔ vali yondoo.

¹¹Vanaa cɔvaa Osias ndóò nɔ-a ndáà caa cɔwvo taw. Ndáà va pɛ kɔlan o cɔwvo, a kundalan ndáà kɔa ni, mɛɛ Hanania va vana pilɛ o simlacia lemasaa tɛɛn-ndo ndóò vem Yeiɛl vana sɛvaa a Maaseya vana bɛndoo nda diolan sɛvaa yɛ.

¹²Ndáà cɔmndo nda, mí kuubaa cɔvaa va bolii lapangɛi o yungula ndalan coo-a bɛnda faw-faw vannda vàálan latiɔn kɛmɛ leŋɔmpum (2 600).

¹³Vanaa cɔvaa va kuubaa cɔvaa kan o ba bɛngu-a va kpow-kpow, vannda vaalan kɛmɛ leyáá a laŋɔmmɛw a vannda kɛmɛ leŋuɛɛnu (307 500). Ndáà caa cɔwvo, ndáà nɔ vɛlɛ kpaayaa. Nda kpow a va masaa kandaa le yaamɔɔa ni.

¹⁴Telen oo telen ndáà va pɛ kɔlan o cɔwvo, Osias ndóò ke nda kɔ̀ɔ̀la cɔwlan, báltan, mɔsilta kálà-kálàlan, domala cɔwla nda toosiaa a cilinndon-ndan, kpaasiaalan a powta fáàndalan.

¹⁵Mí Osias cɔaw ɲɛm cɔvun bɛndon pum Yerusalɛm, n vana sumnɔɔ pum ndóò toosial ndu-on. Mó kɛsi mun o cɛila coocoolan coo a o sɔngilan le kɔɔn a powta celulaalan vuuo a mun. Mí Hala mala Osias taw, mí tɔ́ɔ́ ndɔɔ kɔa nɛɛ-nɛɛ ka, mó siŋnun vana kpaayaa.

¹⁶Kɛ mɛɛ Osias sɔla kon kpaayaa lende, mí yongaa luɛi ndu o kɔl, mó mulul Mɛlɛka Hala ndɔɔ kɔɔ. Paale pilɛ, mó luɛi o Cɛi-Mɛlɛka-o nin le sálàla cuɛima cun kɛndɛlan lomɔɔ o fonda-loamaa-lasálàá coo.

¹⁷Mí Asaria va bolle vana-solia-lasálàá-o nda vanaa-solia-lasálàá belaŋɔmaa a veesiaa hɔlla, má luɛi ndu kɔɔli lon,

¹⁸má kɔ simul ndu, má dimul ndu aa: «Osias sei, a nɔ dí mì nɔm pila solul Mɛlɛka sálà cun kɛndɔɔ le. Vanaa di kon kennun-nda co vanaa-solia-lasálàá ni, poaa Aarɔn-nda, nda siŋnun teengen le baala kon tosaa ni. Lelan, fula o Fonda-Diandaa ho nin, kani a del kasi. O co dɛnɛ lebɛɛ le co kon le nɔm Mɛlɛka Hala o hɔl te.»

¹⁹Nduyɛ, Osias ndóò cua nin bonyii fuusɛi o ba le sálà cuɛima cun kɛndɔɔ lomɔɔ. Mó tuulu kɔllo a vanaa-solia-lasálàá. Fɔ́ɔ́fɔ̀, mí nàà siaŋaa fula ndu o itendu nda o hɔl o Cɛi-Mɛlɛka-o nin, nɛɛ o va isisi o fonda-loamaa-lasálàá ikɛi-ya.

²⁰Mí Asaria va bolle vanaa-solia-lasálàá-o a vanaa-solia-lasálàá kpow a tofa ndu, má ca nàà kon ndu o itendu. Má keleŋa ndu soli o bɛ́ɛ̀, mí Osias pila bɛɛ fula cɔ́-cɔ́ le dɛnɛ palaa Mɛlɛka ndóò tuisi kon ndu coo-o.

²¹Mí masaa Osias lo a nàà siaŋaa lende, má yàà ndu lándán o cɛiyo pum nin ndu pilɛ kpé, ndóò nɔ lɛ di mì ndóò luɛi o Cɛi-Mɛlɛka-o nin te. O lo a nàà kon háá mó vu. Tuma o va kon a nàà-o, mí Yotam po ndɔ, ó va simlacinɔɔ o cɛi lemasaa nin-ndo siŋnun tofa lelɛŋndoo vannda o lɛŋnde len nin coo.

²²Vana sɛva sɔɔn tɔ̀un Osias-on-ndo, kandɔɔ háá o mɛɛlulan, ndu yɔŋnun vana-tɛɛngaa-diom Hala-o Esai, po Amɔt-o ni.

²³Osias vuo, má kumbu ndu o sɛila fuɲaa ndɔa ikɛi nɛɛ ndáà kumbu masaa-a, kani nuaa vannda va dimio ni aa: «Vana nàà siaŋaa o co ni.» O kon mí Yotam po ndɔ koma sul masaa o fonda ndɔɔ.