Read Kissi 2Dɛnnda lemasalan 27 Bible Online

2Dɛnnda lemasalan 27 - Kissi bible

2Dɛnnda lemasalan 27

¹Yotam ndóò nɔ vɔsilan bidiin a laŋuɛɛnu, mó siŋnun masaa. Mó tosa masalen Yerusalɛm ciee vɔsilan tɔ́ a laŋɔmpum. Yerusia kala ndɔ ndóò nɔ diolan ni, cua Sadɔk-o.

²Mó tosa ɲɛ bɛnda Mɛlɛka o hɔl-lo, mó kela mɛɛ Osias fuɲa ndɔ ndóò kela yɛ kpafii. Kɛ ndu luei o Cɛi-Hala-o nin te[14]. Kɛ a kon kpede, vannda va a laasiannda tuŋ.

³Ndu Yotam tangul dio luɛyaa lecoo Cɛi-Mɛlɛka-o ni, mó tosa tangultan taw o kpakio nin o pembei Ofɛl coo.

⁴Mó tangul vɛlɛ kobilan o tàndá n'pemboo Yuda nin, mó tangul cɛila mayoomulan a cɛila coocoolan o bundɛlan nin.

⁵Mó tosa cɔwvo nda masaa Amɔnnda, mó nɔla nda. Mí Amɔnnda mal muloo vɔsi kon volion kilolan vaala yàá, maalon kilolan vàá pilɛ, ɔrse kilolan vàá pilɛ. Má va vɛlɛ mulu pilɛ kon malɔɔ vɔsila tiɔn o kon kɔɔli.

⁶Mí Yotam sɔla kpaayaa taw, kani o va kela kɛndɔɔ Mɛlɛka Hala ndɔɔ o hɔl.

⁷Dɛnnda tɔ̀la Yotam-ndan, cɔwla o nɔla lan a ɲɛ-ɲɛ o tosa kpow, la co lasɛvaa o sɛbɛ masaa Israɛl a masaa Yuda nin.

⁸Ndóò nɔ vɔsilan bidiin a laŋuɛɛnu, mó siŋnun masaa, mó tosa masalen Yerusalɛm ciee vɔsilan tɔ́ a laŋɔmpum.

⁹Yotam vuo, má kumbu ndu o sɛi fuɲaa ndɔa mamaa nin, o Kobi David-o nin. Mí Ahas po ndɔ koma sul masaa o fonda ndɔɔ.