Read Kissi 2Dɛnnda lemasalan 28 Bible Online

2Dɛnnda lemasalan 28 - Kissi bible

2Dɛnnda lemasalan 28

¹Ahas ndóò nɔ vɔsilan bidiin, mó siŋnun masaa. Mó tosa masalen Yerusalɛm vɔsilan tɔ́ a laŋɔmpum. O kela kela kɛndɛ Mɛlɛka Hala ndɔɔ o hɔl maa David fuɲa ndɔ mama le.

²Mí ndu bɛɛ kela o nɛila masaa Israɛl coo, mó teengiaa cilinndon, mó cɔaw piɔmnda le Baal sooloo.

³Mó va sálàla cuɛima cun kɛndɛlan solio o Bóllo Hinnɔm nin. Mó loam poaa ndɔa, mó soli nda sálà maa mɛɛ dɛnnda nɔɔlɛila vanaa-mangalaa-isɔɔa Mɛlɛka tow Israɛlla laci-a la va yɛ.

⁴Mó va sálàlan solio o tombon, o pembon coo a o yɔmii puyɛi kpow bɛngu.

⁵O kon, mí Mɛlɛka Hala ndɔɔ mal ndu masa Aramiia o ba. Mí Aramiia nɔla ndu, má bii vanaa ndɔa taw, má kɔannun a nda o biyɔɔ nin Damas. Mí ndu Ahas del vɛlɛ masaa Israɛl[15] o ba, mí ndu tɛɛmbuu ndu tɛɛmbuuo pila.

⁶Le tùú Yudaa ndáà mulul Mɛlɛka Hala fuɲaa ndaa mamaa kɔɔ-o, o paale pilɛ kpé bɛngu, mí Peka, po Remalia-o diw kuubaa cɔvaa ndaa vaalan kɛmɛ a bidiin (120 000).

⁷Mí Sikri, kuubanɔ cɔw pum fula o polale Efraim-nden nin-ndo ndu dii Maaseya po masaa Asrikam va simlacinɔɔ o cɛi lemasaa nin-ndo-o, mó dii vɛlɛ Ɛlkana, vana diinndɔ va masaa ikɛi kpɛɛlun-ndo.

⁸Mí Israɛlla biw vannda vaalan kɛmɛ lediin o puapilɛa ndaa tɛɛn: vanlaandua, poaa piaandua a cuaa laandua. Má poondiaa nda vɛlɛ ɲɔɔn taw o laba, má kɔannun a mun Samari.

⁹Vana-tɛɛngaa-diom Hala-o pum va lon diolan Obɛd. Mó fula, mó kɔa vanaa cɔvaa va muungoo Samari-a bɔŋaa, mó dimul nda aa: «Le tùú Mɛlɛka Hala fuɲaa niaa mamaa ndóò tambu kɔllo a Yudaa-o o mal nda niaa o ba nuaa ni. Kɛ nduyɛ, mí la diw nda a hiilɛi mí tɔ́ɔ́ kon tiiya háá o halataala.

¹⁰La yeema vɛlɛ mì la siinguu vanpiaandua a vanlaandua niaa fula haa Yuda a Yerusalɛm-nda cɛa. Vɛ̀ɛ̀ o co dɛnɛ hakio le niaa co tosaa lende a Mɛlɛka Hala niaa le?

¹¹Lelan, la tuei-yɔ o ya co niaa dimul-lo, la mal puapilɛa niaa niaa bii haa Yuda-a, mì la mingi nda o la nda lo. Kani Mɛlɛka tuulu kɔl taw a niaa.»

¹²O kon, mí vanaa pum, Asaria po Yohanan-ndo, Berekia po Mesilemɔt-o, Esekia po Salum-ndo a Amasa po Hadlai-yo, a yɔŋnun simlacia fulaa o polale Efraim-nden nin-nda, a simul vanaa cɔvaa va kan muungoo-a,

¹³má dimul nda aa: «La hun a vanaa niaa bii haa-a nanu le, yɔŋii naa n luɛi o dɛnɛ vɔɔn bɛndu-bɛndoo nin a Mɛlɛka. Vɛ̀ɛ̀ la yeema mì la cɔɔlu vɛlɛ hakilan o tɛɛmbuula naalan coo? La co naa coo lan la co nin la bɔɔ, nduyɛ kɔltuw Mɛlɛka-o co Israɛlla coo.»

¹⁴O kon mí vanaa cɔwva mal vanaa ndáà bii kan-nda simlacia a vannda kpow o hɔl.

¹⁵Mí vanaa ndáà hɛli le baala kon tosaa-a can, má bii vanaa ndáà kɔɛnnun kan a nda o biyɔɔ nin-nda, má cuɛi nda a ɲɛm ndáà hɛlu o cɔwvo-on. Má vow vanaa va kɔɔle fondo-a volɔɔla cuɛinanndan a samtalan. Má ke nda ɲɛdiaa a mɛmma kolan, má cɛw vanaa boolun-nda. Má heelu vanaa ndáà tiwba le kɔlan te-a o sofɛlɛa coo, má mingi nda Yeriko, o puapilɛa ndaa lo, Yeriko kobi mavawvo pɛɛn. O kon kɔɔli, má muungun Samari.

¹⁶O telen kon, mí masaa Ahas viam kiilaa o masaa Asiri lo le ndu hunɔɔ malaa.

¹⁷Kani mí Edɔmnda hun del vɛlɛ Yudaa coo a cɔwvo, má biw vannda, má kɔannun a nda.

¹⁸Mí Filistia bɛɛ nda hun tiw o kobila va o dɛɛlalan nin a ba too, o tàndá Yuda-o nin-ndan nin. Má bii kobio Bɛt-Siemɛs, Ayalɔn, Kederɔt, Soko a cieon va lan o ba bɛngu-on, má bii vɛlɛ Timna, Kimso a cieon va lan o ba bɛngu-on, o kon má calnun o kobila lan nin.

¹⁹Le tùú Ahas masa Israɛlla luei Yudaa o laasianndo nin, mí ndu pila mulul Mɛlɛka kɔɔ-o Mɛlɛka tuisi nda siɛmbulan lende ni.

²⁰Mí Tilkat-Pilnesɛr[16] masaa Asiri hinul Ahas, mó hun del ndu coo, o mala ndu le[17].

²¹Kani ndu Ahas soli bolofaa va o Cɛi-Mɛlɛka-o nin-ndo ni, ó va o cɛi lemasaa nin-ndo a o va o cɛi simlacia nin-ndo kpow, mó yɔngu masaa Asiri. Kɛ a kon kpede, o sɔla mala oo mala le.

²²Hali telen ndu Ahas va kon o sangaa nin-ndo, o pɛngi Mɛlɛka kɔɔ mulullo le.

²³Mó solul halaa va Damas-a sálàlan, nduyɛ le halaa kan sangaa tol ndu coo ni. Kani o va dimio aa: «Mɛɛ halaa masaa Aram a mala nda masaa kan nuaa yɛ, ya bɛɛ i solul-lɔ nda sálàlan mà mala ya.» Kɛ mí halaa kan yɔŋnun pow boŋaa le ndu a le Israɛlla kpow[18].

²⁴Mí Ahas cuungiaa ɲɛm baalan va o Cɛi-Hala-on nin-ndon kpow, mó pesipesi mun. O kon kɔɔli, mó kiindiaa diola luɛyaala Cɛi-Diandaa Mɛlɛka-o, mó simi máánndan o sɔngila kobio Yerusalɛm kpow nin.

²⁵Mó cɔaw vɛlɛ fondala-loamaa-lasálàlan o kobila yɛ́-yɛ́la va o tàndá Yuda-o nin-ndan kpow nin le halaa celennda sálàla cuɛima cun kɛndɛlan solullo. Nuaa o tosa ni, mó tɛɛmbuu Mɛlɛka Hala fuɲaa ndɔa mamaa kɔllo.

²⁶Dɛnnda tɔ̀la Ahas lan kpow, ɲɛ-ɲɛ o tosa, kandɔɔ a mɛɛlulan, la co lasɛvaa o sɛbɛ masaa Yuda a masaa Israɛl nin.

²⁷Mí Ahas diam fuɲaa ndɔa mamaa ciee-piɔ́m, má kumbu ndu o kobio Yerusalɛm nin, kɛ a kumbu ndu o sɛila masaa Israɛl nin te. O kon mí Esekia po ndɔ koma sul masaa o fonda ndɔɔ.