Read Kissi 2Dɛnnda lemasalan 29 Bible Online

2Dɛnnda lemasalan 29 - Kissi bible

2Dɛnnda lemasalan 29

¹Esekia ndóò vɔsilan bidiin a laŋuɛɛnu mó siŋnun masaa. Mó tosa masalen vɔsilan bidiin a laŋɔmahiɔɔlu Yerusalɛm ciee. Abiya kala ndɔ ndóò nɔ diolan ni, cua Sakari-o o va ni.

²Mó tosa dɛnɛ sandaa Mɛlɛka o hɔl mɛɛ David fuɲa ndɔ mama tosa yɛ.

³Paangiit tasei o vɔsi tasoo nin o masale ndɔlen bɛngu, mó mingi diola luɛyaala Cɛi-Mɛlɛka-o kumbi, mó toosiaa lan.

⁴Mó veelu vanaa-solia-lasálàá a leviia, mó bɔɔŋiaa nda o fonda va a ba paalen le can-ndo-o,

⁵mó dimul nda aa: «Niaa leviia, la yaŋ ya nilan! Sisa, la dindin mì la dindi Cɛi-Mɛlɛka-o, Hala fuɲaa niaa mamaa pɛɛn, mì la soli ɲɛm nɔɔlɛin co o Fonda-Diandaa nin-ndon kpow o bɛ́ɛ̀.

⁶Kani fuɲaa naa mamaa lo o lediom coo a Mɛlɛka Hala naa le, má tosa ɲɛ bɛnda ndu o hɔl too. Má mal ndu, má faŋal Fonda-Diandaa hɔlla, má mulul Mɛlɛka kɔɔ.

⁷Má kinda vɛlɛ diola luɛyaala Cɛi-Hala-o, má tosa mí fitinalan la ɲum. A ve Hala Israɛlla sálàla cuɛima cun kɛndɛlan, te kon te sálàla loamaalan solul o Fonda-Diandaa nin te.

⁸O kon, mí kɔltuw Mɛlɛka-o toal Yudaa a Yerusalɛmnda coo. Mí Mɛlɛka tuisi nda kɔl yulan-yulando, dɛnɛ palaa a mɔnɛi coo mɛɛ niaa co cɔu nuaa yɛ.

⁹Lelan fuɲaa naa mamaa sɔla piɔ́mndan o cɔwvo ni, má bii poaa naa, cuavaa naa laandua a laandaa naa, má kɔannun a nda.

¹⁰Ya ya, i co yiyanndo le kpemaa yiiyo a Mɛlɛka Hala Israɛlla, haliko mi kɔl ndɔ tuwvo faŋan naa coo.

¹¹Lelan sisa, niaa poaa nia, la va vanaa sáálan isɔɔ le-a le. Kani niaa Mɛlɛka hɛli ni le ndu simndan o hɔl, le ndu baalaa tosallo, le kaannden simndan laci a le ndu sálàla cuɛima cun kɛndɛlan ndu lumndo.»

¹²O kon mí leviia can le baalaa, nda yɔŋnun haa ni: Mahat po Amasai-yo a Yɔɛl po Asaria-o, fulaa o polale Kehat len nin, Kis po Abdi-o a Asaria po Yehaleleɛl-lo, fulaa o polale Merari len nin, Yoa po Simma-o a Edɛn po Yoa-o, fulaa o polale Kɛrsɔn-nden nin,

¹³Simri nda Yeiɛl, fulaa o polale Elisafan-nden nin, Sakari nda Matania, fulaa o polale Asaf len nin,

¹⁴Yehiɛl nda Simei, fulaa o polale Heman-nden nin a Semaya nda Usiɛl, fulaa o polale Yedutun-nden nin.

¹⁵Má cuungiaa puapilɛa ndaa nɛɛ pilɛ, Má dindin, má hun niko o Cɛi-Mɛlɛka-o, má dindi ndu mɛɛ Mɛlɛka ndóò dimul masaa, mí masaa tɛɛngul nda diomnda lan yɛ.

¹⁶Mí vanaa-solia-lasálàá luɛi o Cɛi-Mɛlɛka-o nin le ndu dindio lenin. Má soli ɲɛm nɔɔlɛin nda komal lenin-ndon kpow o bɛ́ɛ̀, mí leviia hun cɔwviaa mun, má soli mun o kobio kɔɔli, o bóllo Sedrɔn nin.

¹⁷Paale taselen o paangii tasei nin, má kandu ndu dindio. Paale ŋɔmaandɔlen o paangii pilɛi ken nin, má tiiya o dio luɛyaa bɛndoo. Palɛi ndii ŋɔmaa a va ndu dindio. O paale tɔ́ a leŋɔmpumndɔlen coo o paangii tasei ken nin, má siow baalaa.

¹⁸O kon kɔɔli, má kɔa o masaa Esekia lo, má dimul ndu aa: «N cii Cɛi-Mɛlɛka-o dindi kpow. N dindi fonda-loamaa-lasálàá a ɲɛm baalan ndɔn kpow, n dindi vɛlɛ tabali nda kɛsì bulula sálàlan coo-o[19] a ɲɛm ndɔn baalan kpow.

¹⁹N cii ɲɛm baalan kpow mingi mɛɛ n va yɛ, mí n dindi mun, ɲɛm baalan mun pɛɛn, n masaa Ahas ndóò nɔɔliaa telen o va kon o masale ndɔle nɔɔlɛilen coo-o. Ɲɛm mun co nihau n'kɛsiaa o fonda-loamaa-lasálà Mɛlɛka-o laci.»

²⁰Diimandɔɔ idiiyo púŋ, mí masaa Esekia cuungiaa simlacia va o kobio nin-nda, má hel o Cɛi-Mɛlɛka-o.

²¹Má kɔa a navaa tovaa nda ŋɔmmɛw, saa kóndóa nda ŋɔmmɛw, saa téndéa nda ŋɔmmɛw a cuinaa toovia nda ŋɔmmɛw le sálà co le hakio sɔlaa malɔɔ-o solio le yungu lemasaa, le Fonda-Diandaa a le Yudaa. Mí masaa dimul vanaa-solia-lasálàá, poaa Aarɔn-nda le sálàla lan solio o fonda-loamaa-lasálà Mɛlɛka-o coo.

²²O kon, má diw navaa tovaa, má haw koovan, má fasaŋiaa man o fonda-loamaa-lasálàá coo. O kon kɔɔli, má diw saa kóndóa, má fasaŋiaa kooma ndan o fonda-loamaa-lasálàá coo. Má diw saa téndéa, má fasaŋiaa kooma ndan o fonda-loamaa-lasálàá coo.

²³O kon kɔɔli, má kɔa a cuinaa toovia va le sálà co le hakio sɔlaa malɔɔ-a masaa a vannda o hɔl, má handu nda balan coo.

²⁴Mí vanaa-solia-lasálàá diw nda, má fasaŋiaa kooma ndan o fonda-loamaa-lasálàá coo le sálà co le hakio sɔlaa malɔɔ-o solio le Israɛlla kpow. Kani le Israɛlla kpow masaa ndóò dimi le sálà loamaa a le sálà co le hakio sɔlaa malɔɔ-o solio ni.

²⁵Mí masaa simi leviia o bɛ́ɛ̀ Cɛi-Mɛlɛka-o nin a kɛ́ŋndon, bɔ̀linndan a bondomalan o laba maa mɛɛ masaa David, Kad ndóò tɛɛngul masaa sɔɔn Hala-on-ndo a Natan va vana-tɛɛngaa-diom Hala-o-o ndáà dimi yɛ. Kani sɔɛi Mɛlɛka ndóò dimi a sondola vanaa-tɛɛngaa-diom ndɔɔ-a-e va ken ni.

²⁶Mí leviia sim a ɲɛm-caan David ndóò toosiaa-on o laba, mí vanaa-solia-lasálàá bɛɛ nda sim a bulula hɔŋaalan o laba.

²⁷Mí Esekia dimul vannda le sálàla loamaalan solio o fonda-loamaa-lasálàá coo. Ndáà kandɔɔ dɔ́ɔ́ sálà loamaa solio, má kandu vɛlɛ condon le Mɛlɛka biiloo a bululan hɔŋndo a á ɲɛm-caan David, masa Israɛlla ndóò toosiaa-on lɔɔ.

²⁸Telen vanaa ɲɛ-caa va condon a bululan hɔŋndo-o, mí vannda kpow a tundun piɛilen, má lo lende háá telen nda cii sálàá soli-o.

²⁹Ndáà ciiyo sálàlan solio, mí masaa a vanaa va ndu ikɛi-ya kpow a baŋ vulan, má tundu bolle háá lɛŋ.

³⁰O kon kɔɔli, mí masaa Esekia a vanaa bɛndua a dimul leviia le Mɛlɛka biiloo o condun David nda Asaf vana-tɛɛngaa-diom Hala-o ndáà toosiaa-on nin. O kon, má biilu ndu a ɲaale bɛndu-bɛndoo, má baŋ vulan, má tundun háá lɛŋ.

³¹Mí masaa Esekia cua vɛlɛ sɔɛi, mó dimi aa: «Sisa, mɛɛ niaa cii Mɛlɛka yɔngɔn nuaa yɛ, la sɔɔnguu niko mì la soli cɔlua sálà, mì la solul ndu sálàla kɔlɲululan o Cɛi-Mɛlɛka-o nin.» O kon, mí vannda hun a cɔlua sálàá, má soli sálàla kɔlɲululan. Mí vanaa ndáà nɔ kɔl ikɛndɔɔ-a a soli sálàla loamaalan.

³²Mí cɔlua vannda solul Mɛlɛka sálà loamaa-a bɛnda faw-faw: navaa tovaa belaŋɔmmɛw, saa kóndóa kɛmɛ a saa téndéa kɛmɛ lediin.

³³Má soli vɛlɛ nawva kɛmɛ leŋɔmpum sálà, má soli saa a cuinnda vàálan tan yáá (3 000) sálà.

³⁴Kɛ vanaa-solia-lasálàá ve sɛ́lɛ́ le, a nɔla cɔlua sálàá ciiyo sɔmndo kpow le. Le hee, telen a tɔ̀a va dindinndo-o, mí puapilɛa ndaa leviia va nda baala kon malaa háá má cii. Kani leviia ndáà kelun o lakɔl le dindinndo hiovɔɔ vanaa-solia-lasálàá coo ni.

³⁵Nduyɛ, sálàla loamaalan, cuɛima visin sálàla kɔlɲulon a mɔima sálàn ma va vɛlɛ sɛ́lɛ́ taw. Nuaa kaannden le muungu o Cɛi-Mɛlɛka-o nin ni.

³⁶Mí Esekia nda vannda kpow a dɔawnun ɲaale taw le sɔɔn Hala va nda tosallo-on, kani a tamala o dɛnɛ kon tosaa nin te.