Read Kissi 2Dɛnnda lemasalan 30 Bible Online

2Dɛnnda lemasalan 30 - Kissi bible

2Dɛnnda lemasalan 30

¹Mí Esekia viam kiilaa o lɛŋnde Israɛl-ten nin a o tàndá Yuda-o kpow nin. Mó sɛval vɛlɛ polale Efraim-nden a polale Manase len sɛbɛlan le hunɔɔ o Cɛi-Mɛlɛka-o nin Yerusalɛm, le kafo-hiavaa-coo tosaa, le Mɛlɛka Hala Israɛlla biiloo.

²Mí ndu masaa, vanaa bɛndua va ndu o ba bɛngu-a a vannda kpow a bii bɔŋanndo Yerusalɛm ciee le kɔlkalulan kennanndo le kafo-hiavaa-coo tosaa o paangii diinndɔɛi nin.

³A tiwba ndu tosaa o telen ndáà dema ndu tosa-o le, kani vanaa-solia-lasálàá, áà dindin-nda ve vɔ sɛ́lɛ́ le, vannda kpow ndáà cuu vɔ vɛlɛ cuungian Yerusalɛm ciee le.

⁴Mí sɔɛi ken hɛnan masaa a vannda kpow.

⁵Má yiyan le diom kon keiyo balɔɔ yondaa o lɛŋnde Israɛl-ten nin kpow, kandɔɔ Bɛɛr-Seba háá Dan, haliko mi vannda hin Yerusalɛm ciee le kafo-hiavaa-coo tosaa le Mɛlɛka Hala Israɛlla biiloo. Kani vanaa bɔɔ-bɔɔ ve lɛ Kafo kalaa tosa mɛɛ ndóò sɛvan yɛ le.

⁶Mí kiilaa kɔa a sɛbɛla masaa nda vanaa bɛndua va ndu o ba bɛngu-a ndáà handu lan pondalen coo lan, má balu lan dimio o lɛŋnde Israɛl-ten nin a o tàndá Yuda-o nin mɛɛ masaa ndóò dimi yɛ aa: «Niaa Israɛlaa hɛlun haa masaa Asiriia-a, la muungu Mɛlɛka Hala Abraham-ndo, Hala Isaak-o a Hala Israɛl-lo o ibuŋ. O kon, ndu bɛɛ muungunin niaa o ibuŋ.

⁷La tosa maa fuɲaa niaa a puapilɛa niaa le. Kani nda, a lo o lediom coo a Mɛlɛka Hala fuɲaa ndaa mamaa le. Lelan mí Hala luei nda mɔnɛi mɛɛ niaa co cɔu nuaa yɛ.

⁸La tosà nila kalulan maa fuɲaa niaa mamaa kan te. La tuisin tootoo Mɛlɛka o hɔl. La muungu o Fonda-Diandaa o dindi le lɔ́ɔ́-lɔ́ɔ̀-o nin. La tosál ndu Mɛlɛka Hala niaa baalaa, haliko mi kɔl ndɔ tuw bɛndoo faŋan niaa coo.

⁹Te la muungu pɛ Mɛlɛka o ibuŋ, vanaa kɔɛ a puapilɛa niaa a á poaa niaa o biyɔɔ nin-nda tuinunnin nda iɲíí, mà mal nda, mà muungu o lɛŋnden nden nin. Kani Mɛlɛka Hala niaa nɔ kɛndɛi, o nɔ vɛlɛ ɲííye. Te la muungu pɛ ndu o ibuŋ, o faŋanin hɔlla niaa coo le.»

¹⁰Mí kiilaa balu o kobila yɛ́-yɛ́la va o tàndá Efraim-ndo nin a o tàndá Manase-o nin-ndan nin, kɔlan háá o tàndá Sabulɔn-ndo nin. Kɛ mí vannda muungu nda mamɔɔ, a saalan sɔɛi ndɛi le.

¹¹Kɛ nduyɛ, mí vanaa pum, fulaa o polama Asɛr, Manase a Sabulɔn-ndan nin a tuisin, má kɔa Yerusalɛm.

¹²O tàndá Yuda-o nin vɛlɛ, mí Hala tosa ɲɛ vannda o lakɔl, mí nda kpow a cɛl ɲɛ ndu Mɛlɛka sɔɔ masaa a vanaa bɛndua va ndu o ba bɛngu-a o lasondo le nda dimullo-o.

¹³O paangii diinndɔɛi, mí sɛ́lɛ́ bɛndu-bɛndoo cuungian Yerusalɛm le kafo bulu toosian a lɛvɛn too tosaa.

¹⁴Má can, má faaŋiaa fondala-loamaa-lasálàla va Yerusalɛm-ndan a fondala-loamaa-lasálàla ndáà loam sálàla cuɛima cun kɛndɛan coo lan, má viaw lan o bóllo Sedrɔn nin.

¹⁵O paale tɔ́ a lehiɔɔlundɔlen coo, o paangii diinndɔɛi ken nin, má diw cɔlua le sálà kafo-hiavaa-coo. Mí siɛmbulan la bii vanaa-solia-lasálàá a leviia, má dindin, má soli sálàla loamaalan o Cɛi-Mɛlɛka-o nin.

¹⁶Má muungu o baala ndaa nin maa paandu, mɛɛ tɔŋ Moise, vana baala Hala-o co yɛ. Mí vanaa-solia-lasálàá va kooma leviia va cɔlua sálàá solio-an biyɔɔ nda o ba, má va man fasaŋiaa[20].

¹⁷Nduyɛ, vanaa bɔɔ-bɔɔ ndáà dindin vannda tɛɛn te. Le hee, mí leviia va cɔlua sálà kafo-hiavaa-coo-a diwvo le vanaa ndáà dindu le cɔlua kan diwvo le Mɛlɛka biiloo le-a.

¹⁸Vanaa bɔɔ-bɔɔ fulaa o polama Efraim, Manase, Isakar a Sabulɔn-ndan nin ndáà dindin te, kɛ má dia ɲɛdiaa kafo-hiavaa-coo, nduyɛ o ve o sɛvan lende le. Kɛ, mí Esekia piɛi le nda, mó dimi aa: «Màá Mɛlɛka, o co vana kɛndɔɔ-o

¹⁹mal vanaa co kindinndo a kɔlta ndalan le Hala, o co Mɛlɛka-o nuwviaa-a haki, Hala fuɲaa ndaa mamaa pɛɛn! Hali a co bɛɛ a diandaa nuaa le, kɛ màá o mal nda haki!»

²⁰O kon, mí Mɛlɛka muli piɛile Esekia len, o tuisi nda sanga coo le.

²¹Palɛi ndii ŋɔmmɛw, Israɛlaa va Yerusalɛm-nda va kafo bulu toosian a lɛvɛn too tosaa a ɲaale bɛndoo. Lepalaa-lepala, leviia nda vanaa-solia-lasálàá va Mɛlɛka biiloo a ɲɛm-caan diom bɛndun va le ndu Mɛlɛka biiloo-on.

²²Mí Esekia soaa o leviaa ndáà nɔ yiyan kɛndɔɔ o lakɔl le baalaa Mɛlɛka-o tosaa-a lo kpow, mó luei nda yoomuan. Palɛi ŋɔmmɛw, a va ɲɛdiaa kafoo dioo, a va sálàla kɔlɲululan solio, a va vɛlɛ Mɛlɛka Hala fuɲaa ndaa mamaa biiloo.

²³Mí vannda kpow a cɛlan le kafoo tosaa o palɛi celen ndii ŋɔmmɛw bɛngu. Palɛi ndii ŋɔmmɛw vɛlɛ a va kafoo a ɲaaloo.

²⁴Kani navaa tovaa vàá pilɛ (1000) a cɔlua letùúa[21] vàálan tan ŋɔmmɛw (7000) Esekia va masaa Yuda-o ndóò ke nda ni. Mí vanaa bɛndua nda nda ke nda navaa tovaa vàá pilɛ (1000) a cɔlua pɔmbɔa vaalan tɔ́ (10 000). O kon mí vanaa-solia-lasálàá taw-taw a dindin.

²⁵Mí vannda Yuda kpow, vanaa-solia-lasálàá a leviia a dɔawnun ɲaale. Mí mialaa fula o masale Israɛl-ten nin mí ndáà hun le kafo kon-nda a vanaa vannun nin icali lon-nda bɛɛ kpow a dɔawnun ɲaale.

²⁶Vanaa va Yerusalɛm-nda va a ɲaaloo taw. Kani kabi o palɛi Salomɔn, po David va masaa Israɛl-lo-e bɛngu, kafo súú vaa lende yɔŋnun Yerusalɛm te.

²⁷O mɛɛlulan, mí leviaa-solia-lasálàá can, má dɔaw vannda duaa. Mí Hala tuɛi nda diom, mí piɛile ndalen le tiiya háá o halataala, o Calta diandaala Mɛlɛka lan pɛɛn.