Read Kissi 2Dɛnnda lemasalan 31 Bible Online

2Dɛnnda lemasalan 31 - Kissi bible

2Dɛnnda lemasalan 31

¹Kafoo cuvɔɔ, mí Israɛlaa va lon-nda kpow a kɔa o kobila va o tàndá Yuda-o nin-ndan nin, má pesipesi powta sálàlan a sooluula va lon-ndan. Má tɛɛmbuu tombon a máánnda va o lɛŋnde len nin-ndan, a la va o tàndá Bɛnyamɛn-ndo nin-ndan kpow. Má pesipesi vɛlɛ la va o tàndá Efraim-ndo nin a o tàndá Manase-o nin-ndan kpow. O kon kɔɔli, má muungun o kobila ndalan nin, vana-vana o ndu lo.

²Mí Esekia mingi vanaa-solia-lasálàá a leviia kɛsi a kundulan mɛɛ nda va a piɔvaa yɛ, mó cɔm vana-vana baala ndɔ: vanaa-solia-lasálàá a leviia le sálàla loamaalan a la kɔlɲululan solio, le baala lekaando tosaa a le condon solio o diola luɛyaala va o dɔ́ɔ́ngɔ́ Mɛlɛka-o lan sondoo.

³Mí masaa yɔngu ɲɛ-sɔlaa ndɔɔ o tiŋ le sálàla loamaala nda va solio idii a icɔl-tan, le sálàla nda va solio o palɛi pɛngiɛi coo lan, le sálàla paangun sɛnɛilan a le sálàla nda va solio o kafola celen coo mɛɛ o va o sɛvaa o tɔŋ Mɛlɛka-o nin yɛ lan kpow.

⁴Mó dimul vannda Yerusalɛm kpow le vanaa-solia-lasálàá a leviia ɲɛ ndáà bɛnda le sɔlaa-o yɔngoo, haliko mi ndáà tiwba le baalala sɛvan o tɔŋ Mɛlɛka-o nin-ndan tosaa ɲɛkɛndɛi.

⁵Sɔɛi ken diminndo dɔ́ɔ́, mí Israɛlla yɔngu ɲɛm tasen nda sɔla o tɔlɔɔlan nin-ndon taw: maalon, mɔiyan, cuɛiyan, lɛan a ɲɛm vaan celen. Má hun vɛlɛ a o-tɔ́ndɔ ɲɛ-ɲɛ ndáà sɔla kpow.

⁶Mí Israɛlaa va vɛlɛ o kobila va o tàndá Yuda-o nin-ndan nda bɛɛ a yɔngu o-tɔ́ndɔ cɔlua ndaa bana-banaa a o cɔlua pɔmbɔa. Má faŋa vɛlɛ o-tɔ́ndɔɔ o ɲɛm diandan ndáà siinguu teengen le Mɛlɛka Hala ndaa-on coo má yɔngu. Má dii ɲɛm mun kundalan taw.

⁷Ndáà kandɔɔ ɲɛm mun diwvo kundalan o paangii yàándɔɛi nin, má siow o paangii ŋɔmmɛwndɔɛi.

⁸Mɛɛ Esekia nda vanaa bɛndua hun cɔ kundala lan, má mel Mɛlɛka a vanaa ndɔa balika.

⁹Mí Esekia ɲuna vanaa-solia-lasálàá a leviia le kɔlɔ ndáà dii kundula lan-ndo,

¹⁰mí Asaria va bolle vanaa-solia-lasálàá-o, o fula o polale Sadɔk len nin-ndo mulul ndu aa: «Kabi vannda kandu hunɔɔ a ɲɛm-kéan ndan o Cɛi-Mɛlɛka-o nin, n co dioo mì n va pumndo ca, o naa n co demaa-o co lou taw-taw, kani Mɛlɛka dɔw vanaa ndɔa duaa. Ɲɛm tɔ̀un co lou-von co kundaa nuaa ni.»

¹¹Mí Esekia dimul vannda le cɛila kondalan toosiaa o Cɛi-Mɛlɛka-o ikɛi.

¹²Má hun a ɲɛm mun mɛɛ ndóò kelun yɛ kpafii: o-tɔ́ndɔɔ a ɲɛm-kéan diandan va le Hala-on. Konania leviinɔ va ɲɛm mun mandaa ni, vana va ndu ikɛi-yo yɔŋnun puapilɛ ndɔɔ Simei ni.

¹³Vanaa va ɲɛm mun hɔlla landɔɔ coo-a yɔŋnun haa ni: Yehiɛl, Asasia, Nahat, Asaɛl, Yerimɔt, Yosabad, Eliɛl, Yismakia, Mahat a Benaya. Nda va Konania nda Simei o ba bɛngu ni, lende masaa Esekia nda Asaria va simlacinɔɔ o Cɛi-Hala-o nin-ndo ndáà dimi ni.

¹⁴Kore, po Yimna va leviinɔɔ-o, ó va kpalilnɔɔ o dio luɛyaa va a ba paalen le can-ndo-o va ɲɛm-kéan vannda va Hala yɔngoo a yeemɛi ndɛi-yon hɔlla landɔɔ coo ni. Ndu va vɛlɛ ɲɛm-kéan diandan va siŋnɔnndo teengen le Mɛlɛka-on a ɲɛm celen piɔwvo ni.

¹⁵Vanaa va baalaa Kore o ba bɛngu lɔ́ɔ́-lɔ́ɔ̀, má va o kobila vanaa-solia-lasálàá nin-nda a va haa ni: Edɛn, Miniamin, Yosue, Semaya, Amaria a Sekania. Nda ndáà hɛli ni le puapilɛa ndaa, kaasonnda a cuaambɔa ɲɛdiaa piɔwvo mɛɛ nda va a kundalan yɛ.

¹⁶Vanaa nda va ɲɛdiaa kon piɔwvo-a yɔŋnun vanpiaandua ndáà sɛva diolan-nda ni, poambɔa, áà nɔ vɔsilan kandɔɔ layàá-a a vanaa-vanaa va hunɔɔ luɛyɔɔ lepalaa-lepala o Cɛi-Mɛlɛka-o nin, le baalala ndala yɛ́-yɛ́lan tosaa mɛɛ nda va a kundalan yɛ.

¹⁷Má sɛva vanaa-solia-lasálàá diolan mɛɛ yungula fuɲaa ndaa la va yɛ. Leviia yɛ, má sɛva kan diolan kandɔɔ a áà nɔ nin vɔsilan bidiin-nda a vanaa ndáà hiow nin vɔsilan bidiin coo-a coo, mɛɛ ndáà nɔ baalalan yɛ a mɛɛ nda va a piɔvaa a kundalan yɛ.

¹⁸Má sɛva nda diolan a vanaa va o yungula ndalan nin-nda kpow: cuavaa ndaa, laandaa ndaa, poaa ndaa a cuavaa ndaa laandua. Kani ndáà bɛnda le dindinndo le baalaa tosaa o Fonda-Diandaa.

¹⁹Vanaa ndáà sɛva diolan-nda va o kobi oo kobi nin le vanaa-solia-lasálàá, poaa Aarɔn-nda ɲɛdiaa ndaa piɔwvo, a va icali o cieon pɔmbɔn balu kobila solia lasálàlan-ndon nin-nda pɛɛn. Lende koni o va vɛlɛ le leviia diola ndalan la va lasɛvaa o sɛbɔɔ nin-nda ni.

²⁰Ɲɛ Esekia tosa o tàndá Yuda-o nin-ndo yɔŋnun kon ni, mó tosa ɲɛ bɛnda-o, dɛnɛ sandaa a toɲaa Mɛlɛka Hala ndɔɔ o hɔl.

²¹O dɛnnda o va tosaa le baala Cɛi-Hala-o, le Tɔŋ Hala-o a le silala Hala lan-ndan nin kpow, mó va Hala ndɔɔ nuwviaa a kɔl ndɔɔ kpow. Ɛ̀ɛ̀ nduyɛ, mí la bɛnda ndu o ba.