Read Kissi 2Dɛnnda lemasalan 32 Bible Online

2Dɛnnda lemasalan 32 - Kissi bible

2Dɛnnda lemasalan 32

¹Dɛnnda tosan ndan o sakpoyei nin-ndan hiovɔɔ, mí Sennakerib va masaa Asiri-o hinul masalen Yuda. Mó tiila kobila va lakungaalan a kpakilan-ndan le lan delɔɔ coo a cɔwvo. Mó dimul vanaa ndɔa le kpakilan buuluuo.

²Mɛɛ Esekia ce maa Sennakerib hin le Yerusalɛm delɔɔ coo a cɔwvo,

³mó kennan kɔlkalulan nda simlacia va ndu o ba bɛngu-a a kuubaa ndɔa cɔwva le soonnda mamɛnnda va o kobio kɔɔli lan baŋullo. Mí kan cɛl ndu diom.

⁴O kon mí vannda cuungian sɛ́lɔ́ɔ́ taw, má baŋul soonnda lan kpow a pee pɔmbɔ mɛnndan ma va fulaa nin mí ma va keiyo o lɛŋnde len tɛɛn-ndo. Kani a va dimulanndo aa: «O bɛnda mì masaa Asiriia komal mɛnndan taw-taw telen nda hunnin-ndo le.»

⁵Mí Esekia fula diallon, mó mingi tɛɛngun va o kpaki kobio-on baŋul. Mó tangul cɛila coocoola cumulaalan lecoo, mó tangul kpaki celen a makɔɔ. Mó mingi fonda nɔ diolan aa Millo-o toosiaa o Kobi David-o nin, mó cɔaw ɲɛm cɔwvon a kɔ̀ɔ̀la cɔwlan taw.

⁶Mó suili simlacia vanaa cɔwva vannda coo, mó cuungiaa nda o fonda va o dio luɛyaa kobio hɔl-ndɔ-o, mó luei nda yoomuan a sɔɔn mun aa:

⁷«La sim yili mì la fula diallon! Siòòŋii bii niaa le, la ɲííyà masaa Asiri a vanaa cɔvaa sɛ́lɛ́ bɛndua co ndu haa kɔɔli-a o hɔl te. Kani vana co naa ikɛi-yo hiow o co ndu ikɛi-yo kpaayaa.

⁸Ndu ndu, kpaaya vanndacieea co ndu o ba ni, kɛ naa naa, Mɛlɛka Hala naa co naa ikɛi ni le naa malaa a le cɔwvo tosaa le naa.» Mí sɔɔn Esekia masaa Yuda dimi mun-ndon luei vannda yoomuan.

⁹O kon kɔɔli, Sennakerib masaa Asiri nda vanaa ndɔa cɔwva kpow a va o kobio Lakis hɔl-ndɔ, nɛɛ ndáà tiila kobi kalaa-a. A lo lon, mí ndu Sennakerib viam vanaa ndɔa baalaa pum Yerusalɛm o Esekia masaa Yuda a vanpiaandua Yuda lo, le nda dimullo aa:

¹⁰«Ɲuna Sennakerib masaa Asiri ɲuna-o co hoo ni aa: ‹Yɛɛ nɛ niaa tiindan yɛ le koma lou icali Yerusalɛm, kobi naa n tiila hoo-o pɛɛn?

¹¹Vɛ̀ɛ̀ o co yɛɛvɔɔ le Esekia co niaa dɔvɔɔ ho nuaa le niaa diwvo a yiaan a á bolola vesɛilan te? O co niaa dimullo aa: Mɛlɛka Hala naa baŋanin naa masaa Asiri o ba.

¹²Vɛ̀ɛ̀ o co ndu Esekia le tɛɛmbuu sooluulan a máánnda ndɔlan te? Vɛ̀ɛ̀ o co ndu Esekia le dimul Yudaa a Yerusalɛmnda aa a báŋ vulan o fonda-loamaa-lasálàá ndu pilɛ kpé hɔl-ndɔ, mà lom ansan o kon ndu pilɛ kpé coo le?

¹³Vɛ̀ɛ̀ la sina ɲɛ fuɲaa nia mamaa a ya pila tosal vanaa súúla yɛ́-yɛ́a o lɛŋii yɛ́-yɛ́i nin-ndo le? Vɛ̀ɛ̀ halaa vanaa-mangalaa-isɔaa kan a nɔla pá lɛŋii ndɛi baŋa ya o ba?

¹⁴O vanaa-mangalaa-isɔɔa fuɲaa nia mamaa tɛɛmbuu kan-nda tɛɛn kpow, ɔ́ɔ̀ a halaa ndaa baŋa nda ya o ba-a? Vɛ̀ɛ̀ Hala niaa ndu nɔla yɛnin niko niaa soli ya o ba?

¹⁵Lelan, la cɛl mì Esekia fɛɛla niaa mò luei niaa o pɔwlan nin te! La láálan ndu le! Kani hala vanaa-mangalaa-isɔɔa súú-súù, te kon te, hala masɛi kɛ́-kɛ̀ tiwba vanaa ndɔa baŋa ya o ba, te kon te fuɲaa niaa mamaa o ba le. Halaa niaa bɛɛ nɔlanin niaa baŋa ya o ba le.›»

¹⁶Mí kiilaa Sennakerib vem kan-nda va sɔɔn vɔɔnndon dimio a Mɛlɛka Hala a á vana ndɔ baalaa Esekia.

¹⁷Mí Sennakerib sɛva sɛbɔɔ, mó dimi diomnde tanalen a Mɛlɛka Hala Israɛlla o sɛbɛ kon nin aa: «Mɛɛ halaa vanaa-mangalaa-isɔaa co o lɛŋii yɛ́-yɛ́i nin-nda bumba vanaa ndaa baŋa ya o ba yɛ, lende koni Hala Esekia-o bɛɛ bumbanin vanaa ndɔa baŋa ya o ba ni.»

¹⁸Mí vanaa Sennakerib vem kan-nda deŋul vanaa va o kpakio Yerusalɛm coo-a o hebrei nin le nda vueinɔnndo a le nda siòònde lueiyo, haliko mi ndáà bii kobio.

¹⁹Má dimi sɔɔn a Hala Yerusalɛmnda o kɔɔ mɛɛ ndáà dema mun dimi a halaa vanaa-mangalaa-isɔaa tɔ̀a yɛ, halaa kan yɛ nda, vanndacieea cɔw nda ni.

²⁰O kon mí masaa Esekia nda Esai vana-tɛɛngaa-diom Hala-o, po Amɔt-o a piɛi Hala le sɔɛi ken.

²¹Mí Mɛlɛka viam mɛlɛkanɔɔ o dɔ́ɔ́ngɔ́ masaa Asiri nin, mó diw kuubaa cɔwva, simlacia vanaa cɔwva a vanaa a vanaa kùndàá kpow. Mí siɛmbulan la bii masaa Asiri, mó muungu o lɛŋnde ndɔlen nin. Ndóò luɛyɔɔ o cɛi hala ndɔɔ nin, mí poaa ndɔa dii ndu lon a mɔɛi cɔwve.

²²Nuaa Mɛlɛka ciindiaa Esekia a vanaa va Yerusalɛm-nda ni, mó baŋa nda Sennakerib masa va Asiri-o o ba a yaamɔaa ndaa tɔ̀a o ba. Mó luei nda kɔlɲuloo tɛɛn nda vanaa ndáà balu nda-a kpow.

²³O kon, mí vanaa bɔɔ-bɔɔ a yoo Mɛlɛka sálàlan Yerusalɛm, má yoo vɛlɛ Esekia va masaa Yuda-o ɲɛm-kéan taw. Kandɔɔ o telen kon, mí Esekia siŋnun vana vanaa-mangalaa-isɔɔa kpow a ke bɛɛlen-ndo.

²⁴O telen kon, mí Esekia del a nàá, mó can piɔ́mndo. Mó piɛi Mɛlɛka, mí Mɛlɛka mulul ndu, mó tosal ndu Esekia dɛnɛ kɔndɔfillo.

²⁵Kɛ Esekia yɔŋnun vana sinaa ikɛndɛ le dɛnɛ kɛndɛ ndóò sɔla Mɛlɛka o ba-o le, kani mí kɔl yongaa luɛi ndu nin. O kon mí kɔltuw Mɛlɛka-o toal ndu pila coo, Yudaa coo a Yerusalɛmnda coo.

²⁶Telen Esekia va yoomu-o, mí ndu Esekia nda Yerusalɛmnda tuisin tootoo le yonga ndɔ kon, o kon mí kɔltuw Mɛlɛka-o faŋan nda coo.

²⁷Mí Esekia sɔla bolofaa a biiloo taw-taw. Mó sɔla volion, sianion, powta báà kàlàlan, ansan, kɔ̀ɔ̀la cɔwlan a ɲɛm kɛndɛ-kɛndɔn kpow.

²⁸Mó tangul cɛila kondalan le maalon, mɔiyan a cuɛiyan mandaa lenin. Mó tangul vɛlɛ kùùlan le cɔlua súú-súù ka a hèélan le cɔlua bana-banaa.

²⁹Mó tangul kobilan le ndu pila, mó sɔla vɛlɛ cɔlua pɔmbɔa a à bana-banaa taw, kani Hala ndóò ke ndu bolofaa taw.

³⁰Ndu Esekia óò baŋul vɛlɛ soondo Kihon ni, mɛmma va fulaa a maluaŋ-ndan pɛɛn, mó mingi man hɔlla a ba too, ba paalen le del-lo, o Kobi David-o nin. Ɲɛ-ɲɛ Esekia va tosaa va ndu bɛndaa o ba.

³¹Kɛ nduyɛ, telen simlacia Babilɔn a vem kiilaa le ndu ɲunaa a dɛnɛ kɔndɔfili óò tosan o lɛŋnde len nin-ndo o kɔɔ-o, mí Hala mal ndu le ndu tɔɔndanndo, haliko mo sina yiyan va Esekia o kɔl-lo kpow.

³²Sɔɔn tɔ̀un Esekia-on a baalala o tosa o sakpoyɛi nin-ndan kpow, sɔɔn mun co n'sɛvaa o sɛbɛ sɔɔn cɔɔmuan Esai, vana-tɛɛngaa-diom Hala-o nin, Esai po Amɔt-o pɛɛn, a o sɛbɛ masaa Yuda a masaa Israɛl nin.

³³Esekia vuo, má kumbu ndu o pembei coo nɛɛ sɛila poaa David-a la va-a, mí Yudaa a vannda Yerusalɛm kpow a sangala ndu o biisi ndɔɔ coo. O kon, mí Manase po ndɔ koma sul masaa o fonda ndɔɔ.