Read Kissi 2Dɛnnda lemasalan 33 Bible Online

2Dɛnnda lemasalan 33 - Kissi bible

2Dɛnnda lemasalan 33

¹Manase ndóò nɔ vɔsilan tɔ́ a latiɔn, mó siŋnun masaa. Mó tosa masalen vɔsilan beleŋuɛɛnu a laŋuɛɛnu Yerusalɛm ciee.

²Mó tosa ɲɛ hɛnan Mɛlɛka loo, mó luɛinun o dɛnnda bɛɛtambɛila vanaa-mangalaa-isɔɔa Mɛlɛka ndóò tow Israɛlla laci-a va tosaa lan nin.

³Mó mingi tombun Esekia fuɲa ndɔ ndóò pesipesi-on tangul, mó cɔaw fondala-loamaa-lasálàlan le Baalla, mó cɔaw yɔmii soolɛi maa mɛɛ Akab va masaa Israɛl-lo ndóò tosa paandu yɛ. Mó baŋ vulan ɲɛm pangelen co o halataala-on o labɛngunin, mó sooluu mun.

⁴Mó cɔaw máánndan o Cɛi-Hala-o nin, nduyɛ mí Mɛlɛka ndóò dimi a Cɛi kon o kɔɔ maa o kobio Yerusalɛm nin diola ndɔlan la vanin piɔlnɔnndo le lɔ́ɔ́-lɔ́ɔ̀ ni.

⁵Mó cɔaw máánndan o bɛ́ɛ̀la tiɔnnda Cɛi-Hala-o nin le ɲɛm pangelen co o halataala-on kpow biiloo.

⁶Mó soli poaa ndɔa sálà, mó loam nda o yin o bóllo Bɛn-Hinnɔm nin. Mó vow balan o yavalan vomɔɔ, mó va kɔlan vanaa suukan a vanvílɛ́iya-a a mandea luɛyɔɔ coo, mó vow balan o cɔw-lekueiyo nin. Lende o va hiovɔɔ laci a dɛnnda nɛinun Hala lan tosaa ni, mí Hala tuulu kɔllo a ndu.

⁷Má sel ndu piɔmndo, mó cua piɔm sialaa kon, mó kɔ luei ndu o Cɛi-Hala-o nin. Nduyɛ mí Mɛlɛka ndóò dimul David nda Salomɔn po ndɔ aa: «O Cɛiyo ho a o kobio Yerusalɛm nin ya vanin le lɔ́ɔ́-lɔ́ɔ̀ ni. Kobio ho ya hɛli o kobila polama Israɛlla tɛɛn ni, lon ya vanin vannda cɔmnɔnndo lɔ́ɔ́-lɔ́ɔ̀ ni.

⁸Te Israɛlla bii pɛ sɔɔn ya dimul nda-on kpow, taa bii pɛ tɔŋnda nilan a silala nilan, mà va kelaa o nɛila Moise vana ni baalaa pɛɛku nda lan kpow coo, mɛɛ i soli lɛnin nda o lɛŋnde ya ke fuɲaa ndaa mamaa len nin te.»

⁹Kɛ, mí Manase luei Yudaa a vanaa va Yerusalɛm-nda o pɔwlan nin, má tosa dɛnɛ vɔɔndo hiovɔɔ dɛnɛ vɔɔn vanaa-mangalaa-isɔɔa Mɛlɛka ndóò diw Israɛlla laci-a tosa-o coo.

¹⁰Mí Mɛlɛka soaa o Manase lo a o vanaa ndu Mɛlɛka-a lo, kɛ a tui ndu diom te.

¹¹O kon, mí Mɛlɛka viam simlacia vanaa cɔvaa masaa Asiri-a, má del nda coo a cɔwvo, má bii Manase. Má vow ndu ciliŋun tundanndon, má yii ndu a yɔlɔn n'daɲan, má kɔa a ndu Babilɔn.

¹²Manase lo o sanga bɛndu kon nin, mó kindin le Mɛlɛka Hala ndɔɔ kɔllo ɲulullo, mó sɔlɔlan hakila ndɔlan Hala fuɲaa ndɔa mamaa o hɔl,

¹³mó piɛi ndu. Mí ɲííye bii Mɛlɛka, mó mulul ndu, mó mingu ndu Yerusalɛm a o masale ndɔlen nin. O kon, mí Manase sina maa Mɛlɛka co Hala ni.

¹⁴O kon kɔɔli, mí Manase cɔaw kpakio o Kobi David-o kɔɔli, mó heelu ndu ningo-ningo, cɔnɔnndo o peo Kihon a ba paalen le del-lo o bóllo Sedrɔn nin, háá tiiyaa o Dio-n'suwvo, mó balu pembei Ofɛl sɔ́ a kpaki kon. Mó kɛsi vɛlɛ simlacia vanaa cɔwva o kobila va o tàndá Yuda-o nin-ndan nin kpow.

¹⁵Mó soli halaa celeŋaa a va o Cɛi-Mɛlɛka-o nin-nda a piɔm sialaa ndóò luei lon-ndo, mó pesipesi vɛlɛ máánnda ndóò cɔw o pembii Cɛi-Mɛlɛka-o coo lan, a la ndóò cɔw Yerusalɛm-ndan kpow, mó kɔ viaw lan o kobio kɔɔli.

¹⁶Mó mingi fonda-loamaa-lasálà Mɛlɛka-o tangul, mó soli sálàla kɔlɲululan a sálàla malaa balika lan. O kon, mó dimul Yudaa le Mɛlɛka, Hala Israɛlla baalaa tosallo.

¹⁷Kɛ nduyɛ, vannda va vɔ sálàlan solio o sooluulan, kɛ le Mɛlɛka Hala ndaa nda va lan soli kon ni.

¹⁸Dɛnnda tɔ̀la Manase lan, piɛile o piɛi Hala ndɔɔ len a sɔɔn vanaa-tɛɛngaa-diom Hala-a dimul ndu o diola Mɛlɛka Hala Israɛlla-on kpow, sɔɔn mun co n'sɛvaa o sɛbɛ masaa Israɛl nin.

¹⁹Piɛile ndɔlen, mingin Mɛlɛka mingin ndu o ibuŋ-ndo, hakila ndɔlan kpow, kɛɛ o kɛɛ lou o lediom coo-o, fondala ndóò tangul sooluulan telen pá mó tuisin Mɛlɛka o labɛngunin-ndan a nɛɛ ndóò kɛsi yɔmii soolɛi a sooluulan-nda kpede la co lasɛvaalan o sɛbɛ Hosai-yo nin.

²⁰Mɛɛ Manase dem fuɲaa ndɔa mamaa ciee-piɔ́m, má kumbu ndu o ndu lo cɛinin. O kon, mí Amon po ndɔ koma sul masaa o fonda ndɔɔ.

²¹Amon ndóò nɔ vɔsilan bidiin a latiɔn, mó siŋnun masaa. Mó tosa masalen Yerusalɛm vɔsilan latiɔn.

²²Mó tosa ɲɛ hɛnan Mɛlɛka loo mɛɛ Manase fuɲa ndɔ va tosaa yɛ. O va piɔmaa fuɲa kon ndóò toosiaa kpow-va sálàlan solullo, mó va nda sooloo.

²³Kɛ, ndu Amon cɛl le Mɛlɛka bɛɛlen keo maa Manase fuɲa ndɔ le, mó tosa hakilan hiovɔɔ la fuɲa ndɔ tosa lan coo.

²⁴Mí buɛyaa ndɔa yii ndu dúmbú, má dii ndu o ndu lo cɛinin.

²⁵Kɛ, mí vanaa va o lɛŋnde len nin-nda diw vanáà yii kan ndu dúmbú-a kpow. O kon kɔɔli, má suili Yosia po ndɔ masaa o fonda ndɔɔ.