Read Kissi 2Dɛnnda lemasalan 34 Bible Online

2Dɛnnda lemasalan 34 - Kissi bible

2Dɛnnda lemasalan 34

¹Yosia ndóò nɔ vɔsilan tan ŋɔmaa mó siŋnun masaa. Mó tosa masalen vɔsilan beleyaa a ò pilɛ Yerusalɛm ciee.

²Mó tosa dɛnɛ sandaa Mɛlɛka o hɔl, mó kela o nɛila David fuɲa mama ndɔlan coo, o sei o ba kɛndɛ coo le, o sei o ba mɛl coo le.

³O vɔsi ŋɔmaandɔɔ o masale ndɔlen bɛngu, o va vɔ langbanɔ felengi, mó kandu Hala David fuɲa ndɔ mamaa nuwviaa. O vɔsi tɔ́ a o diinndɔɔ, mó kandu Yuda dindio a sooluulan, sungbuma soolan, piɔmaa sialaa a piɔmaa ciliŋun teengiaa va lon a Yerusalɛm-nda tɛɛmbuuo.

⁴Mí masaa dimul vannda, má pesipesi Baalla, má cui ɲɛm-laandun va o piɔmaa kalaa coo-on, n ndáà loam ansan nin-ndon. Mó loam sungbuma soolan, piɔmnda a tuuliaala va lon-ndan. Mó kɔandu pulta lan, mó kɔ saŋ ndan o sɛila vanaa va sálàlan solio o sooluula lan-nda coo.

⁵Mó cua paala vanaa-solia-lasálàá[22], mó kɔ loam ndan o máánnda ndalan coo. Nuaa Yosia dindi Yuda a Yerusalɛm ni.

⁶O kobila Manase lan nin, o kobila Efraim-ndan nin, o kobila Simeɔn-ndan nin, kɔlan tiiyaa háá o kobila Nɛftali lan nin a o tàndàla balu lon-ndan nin,

⁷mó pesipesi máánndan, sooluulan a piɔmaa va lon-nda puɛɛ-puɛɛ. Mó pesipesi bonyun fuusan, n ndáà loam cuɛima cun kɛndɛan nin-ndon o lɛŋnde Israɛl-ten nin kpow. O kon kɔɔli, mó muungu Yerusalɛm.

⁸Vɔsi tɔ́ a o ŋɔmaandɔ o masale Yosia len bɛngu, mí ndu Yosia viam Safan po Asalia-o, Maaseya va simlacinɔ kobio-o a Yoa va vana yondaa masaa-o, po Yoahas-o pɛɛn, le lɛŋnden dindio a le Cɛi-Mɛlɛka Hala ndɔɔ mingio toosiaa.

⁹Má kɔa o Hilkiya bolle vanaa-solia-lasálàá lo, má kɔ yɔngu ndu volin vannda ndáà hin o Cɛi-Hala-o nin-ndon, volin leviaa va diola luɛyaala kobio cumullo-a ndáà biw polale Manase len, polale Efraim-nden a Israɛlaa tɔ̀a kpow o ba-on a volin ndáà sɔla polale Yuda len, polale Bɛnyamɛn-nden a vanaa va Yerusalɛm-nda o ba-on kpow.

¹⁰Má yɔngu vanaa ndáà hɛli le hɔlla landɔɔ o baalala va tosanndo o Cɛi-Hala-o nin-ndan coo-a volin mun, le vanaa baalaa va Cɛi kalaa mingio bɛɛndiaa a ndu toosiaa-a salaa.

¹¹Má yɔngu vɛlɛ vanaa cuaa layindɔa a vanaa cɔavaa lacɛiya volion le powta sialaalan, tówván a kpóŋndán piondɔɔ, le cɛila masaa Yuda ndáà mal tambei lan mingio tangullo.

¹²Mí vanaa baalaa kan tosa baalaa a kɔlta ndalan ɲɛkɛndɛi. Vanaa va nda bollen-nda yɔŋnun haa ni: Yahat nda Abdia, leviaa nda va ni fulaa o polale Merari len nin, Sakari nda Mesulam, o polale Kehat len nin nda ndáà fula ni. Mí leviaa tɔ̀a, áà caa ɲɛm-caan lɔɔ-a kpow a va hɔlten handɔɔ o baalala va tosanndo lan coo.

¹³Nda va vanaa va baalala yɛ́-yɛ́lan tosaa-a simndan laci ni, leviaa celen va lon vɛlɛ: vanaa sɛvaa, vanaa kùndàá a kpalilaa cumulaa ladioa.

¹⁴Tuma nda va volin ndáà kɛsi o Cɛi-Hala-o nin-ndon solio-o, mí Hilkiya vana-solia-lasálàá ca sɛbɛ tɔŋ Mɛlɛka-o, ò Moise ndóò yɔngu-o.

¹⁵O kon mó dimul Safan vana sɛvaa aa: «I saalun sɛbɛ tɔŋndo o Cɛi-Mɛlɛka-o nin.» Mó yɔngu Safan sɛbɛ kalaa.

¹⁶O kon, mí Safan cua sɛbɛ kon, mó yoo masaa, mó kɔ downun ndu kona aa: «Simlacia nɔmnda co baalala yɔngun nda lan kpow tosaa.

¹⁷A cii volin va o Cɛi-Mɛlɛka-o nin-ndon kpow soli, má yɔngu vanaa nda hɛli le hɔlla landɔɔ vanaa baalaa coo-a mun.»

¹⁸Mí Safan vana sɛvaa dimul masaa aa: «Mí Hilkiya, vana-solia-lasálàá yɔngu ya sɛbɔɔ pum.» O kon mí Safan dimi sɛbɛ kon masaa o hɔl.

¹⁹Mɛɛ masaa tuei sɔɔn va o sɛbɛ tɔŋndo nin-ndon, mó sɛɛsian volɔɔlan lekɔɔ.

²⁰Mó dimul Hilkiya, Ahikam po Safan-ndo, Abdɔn po Misee-o, Safan vana sɛvaa a Asaya vana baala masaa aa:

²¹«La kɔ mì la ɲuna Mɛlɛka isɔɔ o sɔɔn sɛbɛ tɔŋ nda ce hoo-o coo le ya, le vanaa tɔ̀a lo icali Israɛl a Yuda-a. Kani kɔltuw Mɛlɛka co hunɔɔ naa tolɔɔ coo-o vanin o bɔɔ! Bau fuɲaa naa mamaa bii sɔɛi ndɔɛi le, a kela mɛɛ sɔɔn sɛvan o sɛbɔɔ ho nin-ndon kpow n dimi yɛ le.»

²²O kon mí Hilkiya nda vanaa masaa ndóò hɛli-a kɔa o Hulda vanalanɔ tɛɛngaa-diom-Hala-o lo, Yerusalɛm o va icali ni, o bungɛi sɛnɛi kobio nin. Hulda kon, pɔnɔ va Salum ni, kpalilnɔɔ va volɔɔla cuɛinanndan mandaa-o Salum kon va ni, po Tokehat-o a po-imama Hasra-o o va ni. Mɛɛ nda tiiya, má soaa o ndu lo mɛɛ ndáà congun nda yɛ.

²³Mó mulul nda aa: «Diom Mɛlɛka, Hala Israɛlla dimi-o co hoo ni aa: ‹La dimul vana vem niaa o ya lo-o maa

²⁴Mɛlɛka dimi aa o co dɛnnda palaalan tuisi o fondaa ho a vanaa co lenin nda coo, o co dangala sɛvan o sɛbɛ nda dimi masaa Yuda o hɔl-lo nin-ndan kpow tuisi nda coo.

²⁵Kani a mulul ndu kɔɔ ma va sálàla cuɛima cun kɛndɛlan lomɔɔ le halaa celennda. A tɛɛmbuu ya kɔllo a dɛnnda nda co tosaa lan kpow. Lelan kɔl ni tuwvo toalnin o fondaa ho coo ni. Nduyɛ, o ɲum ndɛnin le lɔ́ɔ́-lɔ́ɔ̀ le.›

²⁶Kɛ la dimul masaa Yuda, o vem niaa le Mɛlɛka ɲunaa-o aa: ‹Diom Mɛlɛka Hala Israɛlla dimi o sɔɔn n tuei-yon o kɔɔ-o co hoo ni aa:

²⁷Le tùú sɔɛi ndu Mɛlɛka dimi a fondaa ho a á vanaa co lenin-nda o kɔɔ-e i pilan ndu masaa kɔllo, mó tuisin tootoo mɛlɛka o hɔl-lo, le tùú o tuisin tootoo mó sɛɛsian volɔɔlan lekɔɔ-o, le tùú o yaŋ vɛlɛ Mɛlɛka nilan-ndo, Mɛlɛka bɛɛ tuei ndu diom. Sɔɛi Mɛlɛka dimi-e co ken ni.

²⁸Le hee, Mɛlɛka o co ndu yɔɔ fuɲaa ndɔa coo ciee-piɔ́m, mò sɔla kumbɔɔ o kɔlɲuloo nin. O cinin dɛnɛ palaa Mɛlɛka tuisinin o fondaa ho coo a vanaa co lenin-nda coo-o a lehɔl te.›» O kon mí vanaa masaa vem kan-nda muungu, má kɔ tɛɛngul ndu diom kon.

²⁹O kon mí masaa veelu kaasoŋaa kɔlkalua Yuda a haa Yerusalɛm kpow.

³⁰Mí ndu masaa hel o Cɛi-Mɛlɛka-o nin nda vanpiaandua Yuda kpow, vanaa va icali Yerusalɛm-nda, vanaa-solia-lasálàá, leviia a vanaa tɔ̀a kpow, kandɔɔ bɛndoo kɔlan tiiyaa háá a vana óò hiow dɔɔnanndo-o. Mí ndu masaa pila dimi sɔɔn va n'sɛvaa o sɛbɛ kpemaa nin-ndon coocoo kpélén, sɛbɛ nda saalun kon o Cɛi-Hala-o nin-ndo pɛɛn.

³¹Mí masaa sim o fonda ndáà bɛɛndiaa le ndu-o, mó mingi kpemaa yii Mɛlɛka o hɔl le ndu Mɛlɛka delɔɔ kɔɔli, le tɔŋnda ndɔlan, pɛɛkula ndɔlan a silalan ndɔlan biyɔɔ a kɔl ndɔɔ kpow a le kelaa o sɔɔn va n'sɛvaa o sɛbɛ kpema kon nin-ndon kpow coo.

³²Mí masaa luei vanaa va Yerusalɛm-nda a vanaa fula o polale Bɛnyamɛn-nden nin-nda kpow o kpema kon nin. Mí vanaa va Yerusalɛm-nda tosa ɲɛ kpema Hala fuɲaa ndáà mamaa dimi-o.

³³Mí Yosia ɲumi dɛnnda nɔɔlɛila va tosanndo o lɛŋnde Israɛl-ten nin-ndan kpow. Mó baŋ vanaa va Israɛl-la le Mɛlɛka Hala ndaa biiloo. Yosia vi lende, vanaa kan faŋan ndɛ o nɛila Mɛlɛka Hala fuɲaa ndaa mamaa coo le.