Read Kissi 2Dɛnnda lemasalan 35 Bible Online

2Dɛnnda lemasalan 35 - Kissi bible

2Dɛnnda lemasalan 35

¹Mí Yosia tosa kafo-hiavaa-coo Yerusalɛm ciee le Mɛlɛka. O paangii tasei nin o paale tɔ́ a lehiɔɔlundɔlen coo, má diw cɔlua le kafo kalaa.

²Mó mingi vanaa-solia-lasálàá o baalala ndalan nin, mó luei nda vɛlɛ yoomuan le baalaa tosaa o Cɛi-Mɛlɛka-o nin.

³Mó dimul leviia, á va vannda pɛɛkoo-a, á siŋnun kan teengen le baala Mɛlɛka-o-a aa: «La kɛsi kesu kpema diandaa o Cɛi-Hala Salomɔn masaa Israɛl, po David-o tangullo nin. La kɔa lɛ a ndu o lacongú le. Sisa, la tosal Mɛlɛka, Hala niaa a vanaa ndɔa Israɛlla baalaa.

⁴La piɔvan kundalan mɛɛ niaa co a yungula niaalan a á baalala niaalan yɛ, mɛɛ David masaa Israɛl nda Salomɔn po ndɔ a sɛva yɛ.

⁵Leviia sim o Cɛi-Diandaa nin, mà tosa baalaa le puapilɛa ndaa, Israɛlla pɛɛn, maa mɛɛ yungula yɛ́-yɛ́la fuɲaa ndaa la co yɛ.

⁶La co sálà kafo-hiavaa-coo soli. Lelan, la dindin mì la toosiaa saa téndéa le puapilɛa niaa Israɛlla mɛɛ Mɛlɛka dimul niaa a sondo Moise-o le tosaa yɛ kpafii.»

⁷Mí Yosia soli saa téndéa a cuinaa téndéa vaalan beleyaa (30 000) o cɔlua ndɔa ndu pila-a tɛɛn, mó yɔngu Israɛlaa va lon-nda kpow le sálà kafo-hiavaa-coo tosaa, mó ke nda vɛlɛ nawva vàálan tan yáá (3 000).

⁸Mí simlacia va o masale ndɔlen nin-nda bɛɛ a soli ɲɛm-kéan nda pila yɔngu a yeemɛi ndɛi-yon: saa téndéa a cuinaa téndéa vàálan tan tiɔn a kɛmɛ leŋɔmpum (2 600) a nawva kɛmɛ leyáá (300) le vanaa kan keo: vanaa-solia-lasálàá a leviia pɛɛn. Mí Hilkiya, Sakari a Yehiɛl, vanaa va vanaa lebolla o Cɛi-Hala-o nin-nda a ke vanaa-solia-lasálàá saa téndéa a nawva vàálan tan tiɔn a kɛmɛ leŋɔmpum (2 600), má ke nda vɛlɛ nawva kɛmɛ leyáá (300) le sálà kafo-hiavaa-coo.

⁹Mí Konania a puapilɛa ndɔa Semaya nda Netaneɛl, handɔɔ niko Hasabia, Yeiɛl a Yosabad lecoo, á va simlacia leviia-a a ke leviia saa téndéa a cuinaa téndéa vàálan tan ŋuɛɛnu (5 000) a nawva kɛmɛ leŋuɛɛnu le kafo kalaa.

¹⁰Nuaa dɛnnda kafo kon la handun o lepola ni: Vanaa-solia-lasálàá va isisi o fondala ndalan, mí leviia bɛɛ a va o fondala ndalan a kundala ndala yɛ́-yɛ́lan mɛɛ masaa ndóò dimi yɛ.

¹¹Má diw cɔlua le kafo-hiavaa-coo. Vanaa-solia-lasálàá va kooma cɔlua leviia va nda yɔngoo-an fasaŋiaa, mí leviia nda va cɔlua sálàá siɔ́ŋndo.

¹²Má va cɔlua va le sálàla loamaalan-nda kɛsio ikɛi, le yungula yɛ́-yɛ́la Israɛlla tɔ̀a nda yɔngoo, maa mɛɛ o va o sɛvaa o sɛbɛ tɔŋ Moise-o nin yɛ. Lende koni nda tosa vɛlɛ a nawva ni.

¹³Má tuɛi visin sálà kafo-hiavaa-coo o yin mɛɛ naamoo va yɛ, má yaw sálàla diandaala tɔ̀lan o kpɛɛnɔn, o kɔɔfɛɛlan nin a o ɲɛm-laandun celen nin. O kon, má piɔw vannda mun cɔ́-cɔ́.

¹⁴Kon cuvɔɔ mí leviia yaw niko visin va le nda pila a le vanaa-solia-lasálàá-on, kani vanaa-solia-lasálàá, poaa Aarɔn-nda lo sálàla loamaala lan a visin macuɛin mun sálàlan solio háá mí ɲumndan má toal. Lelan leviia nda yaw le nda pila a le vanaa-solia-lasálàá, poaa Aarɔn-nda ni.

¹⁵Vanaa solia n'condua, poaa Asaf-a va o fondala ndalan maa mɛɛ David, Asaf, Heman a Yedutun va vana silaa masaa-o ndáà dimi yɛ. Kpalilaa cumulaa ladioa bɛɛ a va o dio oo dio. Vana-vana faŋan o fonda ndɔɔ le, kani puapilɛa ndaa, leviia va yawvo le nda.

¹⁶Nuaa baalala Mɛlɛka lan la tosan paale len le kafo-hiavaa-coo a le sálàla loamaalan solio o fonda-loamaa-lasálà Mɛlɛka-o coo ni, maa mɛɛ masaa Yosia ndóò dimi yɛ.

¹⁷Lende Israɛlaa va lon o telen kon-nda tosa kafo-hiavaa-coo a kafo bulu toosian a lɛvɛn too o palɛi ndii ŋɔmmɛw bɛngu ni.

¹⁸Kabi o paale Samiɛl vana-tɛɛngaa-diom Hala-o len, kafo oo kafo tosan ndóò tosan-ndɔ lende Israɛl te. Masa oo masa ndóò tosa vɔ kafo-hiavaa-coo súú vaa lende maa o Yosia pila, vanaa-solia-lasálàá, leviia, Yudaa, Israɛlaa va lon-nda a Yerusalɛmnda ndáà tosa kon-ndo le.

¹⁹O vɔsi tɔ́ a o ŋɔmaandɔɔ nin o masale Yosia len bɛngu kafo kalaa tosan ni.

²⁰O dɛnnda lan kɔɔli, telen Yosia cii Cɛi-Mɛlɛka-o mingi toosiaa kpow-vo, mí Neko masaa Esipte heelu Karkemis le cɔwvo, o peo Efrate kɔngɔ. Mí Yosia fula, mó simul ndu.

²¹Mí Neko vim ndu kiilaa le ndu ɲunaa aa: «Masaa Yuda, yɛɛ co yɛ naa tɛɛn naa nɔm? O co nɔm te ya hinul hinullo ho le, kɛ yungu cɔwvo co naa tɛɛn naa ndaa-o ya hinul ni. Nduyɛ, Hala dimul-la aa ya keleŋa. Hala co ya ikɛi, lelan, simul ndu le, yɔŋii o dii nɔm.»

²²Kɛ Yosia feŋan ndu kɔɔli le, mó kaandian, mó vian hɔlla, mó kɔa Neko cɔlɔba. O bii diom Neko dimul ndu fulaa Hala o sondo-o le. Mó kuel ndu o dɛɛlaa Mekido nin le cɔwvo.

²³Tuma nda saan cɔwvo-o, mí vanaa vuaa n'kɔɔ-a a via masaa Yosia, mí kɔɛi bii ndu. Mó dimul buɛyaa ndɔa aa: «La faŋa ya nanu, kani a yɔŋul-la bɔɔ.»

²⁴Mí buɛyaa ndɔa soli ndu o ɲɛ ndɔ ɲaanan soa nan-ndo nin, má luei ndu o ò pilɔɔ nin, má kɔa a ndu Yerusalɛm, mó kɔ vu lon. Má kumbu ndu fuɲaa ndɔa mamaa ikɛi. Mí Yudaa a vannda Yerusalɛm kpow a caŋ Yosia.

²⁵Mí Yeremi soli condii biisiei le Yosia. Háá hau, vanaa solia n'condua, vanpiaandua a vanlaandua kpow a co vɔ condii ken solio o biisilan coo le loonɔnndo a Yosia o kɔɔ. Mí sɔɛi ken siŋnun namoo o lɛŋnde Israɛl-ten nin. Condun mun n co n'sɛvaa o sɛbɛla condun labiision nin.

²⁶Sɔɔn tɔ̀un Yosia-on kpow, ɲɛ-ɲɛ o tosa, kandɔɔ háá a mɛɛloo, n co n'sɛvaa o «Sɛbɛ masaa Israɛl a masaa Yuda» nin, mɛɛ o yɔŋnun vana lo o lediom coo a Mɛlɛka yɛ pɛɛn.