Read Kissi 2Dɛnnda lemasalan 36 Bible Online

2Dɛnnda lemasalan 36 - Kissi bible

2Dɛnnda lemasalan 36

¹Mí vanaa va o lɛŋnde len nin-nda hɛli Yoahas po Yosia-o, má suili ndu masaa Yerusalɛm o fonda fuɲa ndɔ-o.

²Yoahas ndóò nɔ vɔsilan bidiin a layàá telen o siŋnun masaa-o. Paangon mún yáá kínɛí o tosa masalen Yerusalɛm ciee ni.

³Mí masaa Esipte[23] faŋa ndu o masalen Yerusalɛm. Mó kilul tàndá Yuda-o muloo volion kilolan vàálan tan yáá a sianion kilolan beleyaa.

⁴O kon, mí masaa Esipte suili Eliakim, puapilɛ ndu Yoahas-o masaa Yudaa a Yerusalɛmnda coo. Mó mangala ndu diolan aa Yehoyakim. Mí Neko cua Yoahas, puapilɛ Yehoyakim kon, mó kɔannun a ndu Esipte.

⁵Yehoyakim ndóò nɔ vɔsilan bidiin a laŋuɛɛnu, mó siŋnun masaa. Mó tosa masalen vɔsilan tɔ́ a ò pilɛ Yerusalɛm. Mó tosa ɲɛ bɛnda Mɛlɛka Hala ndɔɔ o hɔl too.

⁶Mí Nebukanɛsar va masaa Babilɔn-ndo kuel ndu a cɔwvo, mó kɔ yii ndu yɔlɔn n'daɲan le kɔlan a ndu Babilɔn.

⁷Mó cua vɛlɛ ɲɛm baalan va o Cɛi-Mɛlɛka-o nin-ndon, mó kɔannun a mun Babilɔn. Mó kɔ kɛsi mun o cɛi lemasa ndɔɔ nin.

⁸Sɔɔn tɔ̀un Yehoyakim-ndon, dɛnnda nɔɔlɛila o tosa lan a dɛnnda kei ndu coo lan, kon kpow co sɛvaa o sɛbɛ masaa Yuda a masaa Israɛl nin. O kon, mí Yehoyakin po ndɔ koma sul masaa o fonda ndɔɔ.

⁹Yehoyakin ndóò nɔ vɔsilan tan ŋɔmaa, mó siŋnun masaa. Mó tosa masalen Yerusalɛm paangon mún yáá a palɛi tɔ́. Mó tosa ɲɛ hɛnan Mɛlɛka loo.

¹⁰Vɔsi sɛnɛiyo kandɔɔ le tiiyaa, mí Nebukanɛsar viam vannda, má hun bii ndu mó kɔa a ndu Babilɔn a ɲɛm báà kalan va o Cɛi-Mɛlɛka-o nin-ndon. Mó suili Sedekia, puapilɛ ndu Yehoyakin-ndo masaa Yudaa a Yerusalɛmnda coo.

¹¹Sedekia ndóò nɔ vɔsilan bidiin a ò pilɛ, mó siŋnun masaa. Mó tosa masalen Yerusalɛm vɔsilan tɔ́ a ò pilɛ.

¹²Mó tosa ɲɛ bɛnda Mɛlɛka Hala ndɔɔ o hɔl too. O ci sɔɔn Yeremi vana-tɛɛngaa-diom Hala-o va ndu tɛɛngullo o diola Mɛlɛka lan-ndon ɲɛ-ɲɛ le.

¹³Mó simul vɛlɛ masaa Nebukanɛsar, óò vem ndu mɛnanndo o diola Hala lan-ndo. Mó luɛi o seesiɛi, mó kindi nilan, mó kɛɛ le Mɛlɛka Hala Israɛlla muungoo o ibuŋ.

¹⁴Mí simlacia va vanaa-solia-lasálàá a vannda bollen-nda bɛɛ a luɛinun o pɔwla bɛndu-bɛndulan nin maa mɛɛ vanaa-mangalaa-isɔɔa ndáà tosa dɛnnda nɔɔlɛilan yɛ. Má luɛi dɛnnda lamààlan tosaa o Cɛi-Mɛlɛka-o nin. Cɛi kon yɛ, Mɛlɛka pila ndóò dindi ndu Yerusalɛm le ndu pila ni.

¹⁵Mɛlɛka Hala fuɲaa ndaa mamaa va nda kiilaa vimndo lɔ́ɔ́-lɔ́ɔ̀ le nda sɔɔn tɛɛngullo, kani ndóò yeema le vanaa ndɔa a Cɛi-Diandaa ndɔɔ baŋaa.

¹⁶Kɛ Israɛlla saalan kiilaa Hala-a kan te, má pɛɛsa sɔɔn Hala-on, má va vanaa-tɛɛngaa-diom Hala-a mamɔɔ, háá mí Mɛlɛka tuulu kɔllo a Israɛlaa kan, a co kan vanaa ndɔa-a pɛɛn. Ɲɛ-ɲɛ nɔ̀lá kɔltuw kon pɔlul te.

¹⁷O kon, mí Mɛlɛka viam masa va Babilɔn-ndo, mó kuel nda a cɔwvo. Mó diw langbaa felengia ndaa o Cɛi-Diandaa ndaa nin, vana-vana helun te, kandɔɔ a langbaa felengia, vanlaandua felengia, kɔlan biyɔɔ a vanaa yuuvɛiya, mí Mɛlɛka mal nda ndu o ba kpow.

¹⁸Mí Nebukanɛsar cua ɲɛm baalan va o Cɛi-Hala-o nin-ndon kpow: n'bɛndon, n'pɔmbɔn, mó cua bolofaa va o Cɛi-Mɛlɛka-o nin-ndo, ó va masaa a vanaa ndɔa kúndàá o ba-o, mó kɔannun a ndu kpow Babilɔn.

¹⁹Mí Babilɔnnda loam Cɛi-Hala-o, má komba kpakio Yerusalɛm, má loam cɛila kɛndɛ-kɛndɛlan, má tɛɛmbuu ɲɛm báà kalan va o kobi kalaa nin-ndon kpow.

²⁰Mí Nebukanɛsar bii vanaa lo yoomu-a, mó kɔannun a nda Babilɔn. Mó kɔ siinguu nda cɛa ndɔa a cɛa poaa ndɔa, má lo o cɛle len nin háá telen masalen Pɛrse le sɔla yoomuan-ndo.

²¹Kon tosan haliko mi sɔɛi Mɛlɛka ndóò dimi a sondo Yeremi, vana-tɛɛngaa-diom Hala-o-e i peelun. Sɔɛi ken yɔŋnun hee ni: «O vɔsilan belaŋɔmmɛw bɛngu, lɛŋnden le malnunnin mì le sɔla pɛngio háá mì telen léè bɛnda le pɛngi kalaa sɔlaa o vɔsila lan bɛngu-o cuu.»

²²O vɔsi tasoo nin o masale Siris masa Pɛrsea len bɛngu, mí Mɛlɛka luei ndu Siris yiyanndo nin le sɔɛi Mɛlɛka ndóò dimi a sondo Yeremi vana-tɛɛngaa-diom Hala-o-e peeloo. O kon, mí Siris sɛva sɛbɔɔ, má yonda sɔɛi ken o masale ndɔlen nin kpow aa:

²³«Nuaa Siris, masaa Pɛrse dimi ni aa: ‹Mɛlɛka, Hala co o halataala-o yɔngu ya masɛi co o lɛŋnden kpow coo-e. O vem ya le ndu Cɛiyo tengullo Yerusalɛm, o tàndá Yuda-o nin. Lelan, vanaa co vanaa ndɔa o niaa tɛɛn-nda, a hèèlú Yerusalɛm. Màá Mɛlɛka Hala ndaa va nda ikɛi!›»