Read Kissi 2Dɛnnda lemasalan 4 Bible Online

2Dɛnnda lemasalan 4 - Kissi bible

2Dɛnnda lemasalan 4

¹Mó cɔaw fonda-loamaa-lasálàá a daɲan, bandei dunndo bidiin, buo dunndo bidiin, helɔɔ dunndo tɔ́.

²Mó cɔaw fɛngɛ bɛndu tiwvo a daɲan, o va bandei kpengeí a kpengeí dunndo tɔ́, helɔɔ dunndo leŋuɛɛnu, pindo-pindoo dunndo beleyaa.

³Tuuliaala navaa tovaa la va balɔɔ sɔ́ o fɛngɛ bɛndu mamɛnndo bɛngu, o polan man miɔn coo. O tiŋndo bandei dunndo lepilɛ coo, navaa tovaa a va tɔ́. Telen o va fɛngɛ kalaa cɔvɔɔ-o o tuuliaa navaa tovaa kan ni.

⁴Fɛngɛ kalaa va o kɛsiaa o navaa tovaa n'daɲaa tɔ́ a à ŋiɔn coo, mí a yaa ndáà muli hɔlla a ba luaŋ-ndo, a yaa a ba paalen le del-lo, a yaa a ba too, mí a yaa mɛɛlaa a muli hɔlla a ba paalen le can-ndo. Má bɔɔŋiaa tumndan lenin nɛɛ pilɛ o fɛngɛ kalaa bɛngu.

⁵Cɔcɔn fɛngɛ kalaa n va buo baa piasaa lepilɛ, vanáà ce mun pɛ aa cɔcɔn taala kólaa ni, velanndo a peengela tɔlɔɔ lii. Vanáà vow litililan háá le vaalan kɛmɛ bidiin[1] o fɛngɛ kalaa nin.

⁶Mó cɔaw fɛngɛla letùúla n'daɲalan tɔ́, mó kɛsi laŋuɛɛnu o Cɛi-Hala-o, o ba kɛndɔɔ coo, laŋuɛɛnu lan la piltan o ba mɛllo coo le dindinndo. O fɛngɛla lan nin ndáà tɔaa cɔlua ndáà soli sálàla loamaalan-nda ni. A mɛmma va o fɛngɛ bɛndoo nin-ndan vanaa-solia-lasálàá ndáà dindin ni.

⁷Mó cɔaw ɲɛla-kɛsiaa-lafitinala n'sianilan tɔ́, mɛɛ ndáà sɛva le lan toosiaa yɛ, mó kɛsi lan o cɛi lenin bɛndu Cɛi-Hala-o nin, laŋuɛɛnu o ba kɛndɔɔ coo, laŋuɛɛnu o ba mɛllo coo.

⁸Mó cɔaw tabalilan tɔ́, mó kɛsi lan o Cɛi-Hala-o nin, laŋuɛɛnu o ba kɛndɔɔ coo, laŋuɛɛnu o ba mɛllo coo. Mó cɔaw vɛlɛ hɛngɛila n'sianila va le fuusaa lan kɛmɛ.

⁹Mó toosiaa bɛ́ɛ̀ vanaa-solia-lasálàá a bɛ́ɛ̀ bɛndu celen, a diola luɛyaalan, a daɲan ndóò yikpa koŋnda lan ni.

¹⁰Mó kɛsi fɛngɛ bɛndoo o Cɛi-Hala-o o sɔngilen ikɛi o ba kɛndɔɔ coo a ba too, ba paalen le can-ndo.

¹¹Mó cɔaw vɛlɛ bombola kɔandaa lapultan, peelelan a bonyun fuusan. Nuaa Hiram siow baalala masaa Salomɔn ndóò yɔngu ndu le tosaa le Cɛi-Hala-o lan kpow ni. Ɲɛm o cɔw-von yɔŋnun mun ni:

¹²sungbuan man miɔn, kumbula kilanndan tan tiɔn le kuumbuuo o sungbuan bolle, yalala lɔaalan lapum tan tiɔn le kuumbuuo o kumbula kilannda va o sungbuan bollen-ndan coo,

¹³krenadeon kɛmɛ lehiɔɔlu le tomboliaa o yalala tiɔnndan, krenadeon polan man miɔn ma va o yala oo yala va o kuumbuaa o kumbula va o sungbuan bollen-ndan coo ni.

¹⁴Mó cɔaw vɛlɛ ɲɛla ɲaanannda soa nan-ndan a fɛngɛla letùúlan o ɲɛla ɲaanannda lan coo,

¹⁵bonyii bɛndui tiilannde ipilɛ o navaa tovaa tɔ́ a à ŋiɔn coo,

¹⁶bombola kɔandaa lapultan, peelelan a cukanila n'ciŋndan le vision dioo. A daɲan diandian Hiram-Abi toosiaa ɲɛm masaa Salomɔn ndóò vem ndu toosiaa-on kpow ni.

¹⁷Mí masaa viam vannda mun teengiaa o puulu cɔavaa n'kpɛɛnɔɔ nin o dɛɛlaa Yurdɛn nin, Sukɔt a Sereda tɛɛn.

¹⁸Ɲɛm Salomɔn ndóò vem mun vannda cɔvɔɔ-on n va sɛ́lɛ́ taw-taw, vanáà tiwba le lusul daɲan luɛi o ɲɛm mun cɔwva nin-ndon sinaa le.

¹⁹Mí Salomɔn cɔaw vɛlɛ ɲɛm baalan Cɛi-Hala-on kpow, mun yɔŋnun mun ni: fonda-loamaa-lasálàá cɔwnun a sianion-ndo, tabalilan le bulula sálàla ndáà ke Hala lan kɛsio lecoo,

²⁰ɲɛla-kɛsiaa-lafitinalan a fitinala ndɔla cɔwnun a sianin diandan-ndan, lan ndáà mɛndul o Fonda Diandaa-Diandaa hɔl-ndɔ mɛɛ o va o sɛvan yɛ ni,

²¹peengelan, fitinalan a kpaɲalan le ɲɛla-kɛsiaa-lafitinala ndáà cɔw a sianin diandan-ndan,

²²ɲɛla ɲumiaa lafitinalan, bonyun fuusan, taalala kólaalan, bonyun pɔmbɔn nda cɔw a sianin diandan-ndon, a diola luɛyaala Cɛi-Hala nda cɔw a sianin diandan-ndan, diola luɛyaala Fonda Diandaa-Diandaa a diola luɛyaala cɛi lenin bɛndoo.