Read Kissi 2Dɛnnda lemasalan 5 Bible Online

2Dɛnnda lemasalan 5 - Kissi bible

2Dɛnnda lemasalan 5

¹Mɛɛ Salomɔn cii baalala tangulaa Cɛi-Mɛlɛka-o lan kpow, mó cua volion, sianion a ɲɛm súú-súù ka, n David fuɲa ndɔ ndóò siinguu teengen le Mɛlɛka-on, mó luei mun o cɛi mandaa bolofaa Cɛi-Hala-o nin.

²O kon, mí Salomɔn cuungiaa kaasoŋaa kɔlkalua Israɛlla, bolii lapangɛi a bolii layungui cuavaa Israɛlla kpow Yerusalɛm ciee le kesu kpema Mɛlɛka-o cuaa o Kobi David-o nin, o nda veelu vɛlɛ aa Siɔn-ndo, le ndu yɔɔ o Cɛi-Hala-o nin.

³Mí Israɛlla kpow cuungian masaa ikɛi le kafo paangii ŋɔmmɛwndɔɛi tosaa.

⁴Lɔ́ɔ́ kaasoŋaa kɔlkalua Israɛlla kpow a cuu tiiya-o, mí leviia siilun kesu kpemaa.

⁵Mí leviaa-solia-lasálàá cua kesu kon, cɛi-kola-toandaa-labɔɔŋianndo a ɲɛm baalan diandan va o cɛi-kola-toandaa nin-ndon kpow.

⁶Mí masaa Salomɔn a Israɛlla kpow a sim kesoo o hɔl-ndɔ. Má soli saa a navaa celulaa taw sálà, vanáà tiwba le nda cɔmndo le, vanáà nɔla sinaa mɛɛ nda va sɛ́lɛ́ yɛ le few.

⁷Mí vanaa-solia-lasálàá luei kesu kpema Mɛlɛka-o o Cɛi-Hala-o nin, má kɛsi ndu o fonda ndáà bɛɛndiaa le ndu-o, o Fonda Diandaa-Diandaa nin, o kumbannda mɛlɛkaa kanda ɲɛm Hala-on-nda bɛngu.

⁸Kumbannda mɛlɛkaa kan la va lapɛɛngaalan o fonda kesoo coo, mí la kumbu kesoo a kpɔlɔnnda va le ndu cuaa lan.

⁹Le tùú kpɔlɔnndan láà bandu-o, vanáà va pɛ kesu kpemaa a dio luɛyaa tɛɛn, vanáà nɔla mì vanáà ce lan bolle, kɛ vanáà ve o bɛ́ɛ̀ mì vanáà ce lan te. Kpɔlɔnnda lan la co lon háá paalen nden.

¹⁰Powta yɛndɛlan tan tiɔn daama la va o kesoo nin ni, Moise ndóò vow lan lenin telen o va Horɛb mí Mɛlɛka yii kpemaa nda Israɛlla o faŋan ndaa Esipte kɔɔli-o ni.

¹¹Mí vanaa-solia-lasálàá kpow a fula o Fonda-Diandaa nin. Mí a va lon-nda kpow a dindin, hɛli yɔŋnun a lakunda o lepola le.

¹²Kolala keesela fɛtufɛtulan la va leviaa va vanaa condaa-a kpow lekɔɔ: Asaf, Heman, Yedutun, poaa ndaa a puapilɛa ndaa. Má sim o fonda-loamaa-lasálàá ikɛi a ba paalen le can-ndo a kɛ́ŋndon, bɔ̀linndan a á bondomalan o laba. Mí vanaa-solia-lasálàà kɛmɛ bidiiŋaa va nda ikɛi vɛlɛ-a va bululan hɔŋndo.

¹³O kon mí nda kpow a cuungian nɛɛ pilɛ le Mɛlɛka biiloo a le ndu sangalaa. Tuma nda va condei a bululan hɔŋndo, kɛ́ŋndon a ɲɛm-caan celenndon lɔɔ-o, má va dimio aa: «Éé Mɛlɛka naŋ! Kani kɛndɛi ndɔɛi cuu le lɔ́ɔ́-lɔ́ɔ̀ le.» O telen kon, mí Cɛi-Hala-o pia cá a kumnde.

¹⁴Vanaa-solia-lasálàá tiwba lou lon le baala ndaa tosaa le, kani kumii biilu Mɛlɛka-o i va i piaa lenin ca.