Read Kissi 2Dɛnnda lemasalan 7 Bible Online

2Dɛnnda lemasalan 7 - Kissi bible

2Dɛnnda lemasalan 7

¹Mɛɛ Salomɔn cii piɛilen, mí yinnden le fula o halataala, mí le toal. Mí le loam sálàla loamaalan a sálàla kɔlɲululan. O kon mí biilu Mɛlɛka-o pei Cɛi-Hala-o ca.

²Vanaa-solia-lasálàá nɔla luɛyɔɔ o Cɛi-Hala-o nin te, kani biilu Mɛlɛka-o va o piaa lenin ca.

³Mí Israɛlaa va lon-nda kpow a ca yinnden a biilu Mɛlɛka-o tolɔɔ o Cɛi-Hala-o coo, má baŋ vulan lɛŋ o fonda nda yikpa a lasoo-o coo, má tundun lɛŋ, má biilu Mɛlɛka, má dimi aa: «Éé Mɛlɛka naŋ! Kani kɛndɛi ndɔɛi cuu le lɔ́ɔ́-lɔ́ɔ̀ le.»

⁴O kon mí masaa Salomɔn nda vanaa va lon-nda kpow a solul Mɛlɛka sálàlan.

⁵Mí Salomɔn soli sálàá a nawva vaalan bidiin a latiɔn a saa vaalan kɛmɛ a bidiin. Mí masaa nda vannda kpow a tosa faleŋii kumbiaa Cɛi-Hala-o.

⁶Mí vanaa-solia-lasálàá sim o fonda ndaa, mí leviia bɛɛ sim a ɲɛm-caan masaa David ndóò toosiaa le Mɛlɛka sangalaa-on, má va Mɛlɛka biiloo mɛɛ David ndóò cɔm nda le condei solio yɛ aa: «Kani kɛndɛi ndɔɛi cuu le lɔ́ɔ́-lɔ́ɔ̀ le.» Vanaa-solia-lasálàá va isisi nda laci má va bululan hɔŋndo. Israɛlla kpow a va isisi.

⁷Mí Salomɔn sɔaa bɛ́ɛ̀ kɔl va o Cɛi-Hala-o hɔl-ndɔ-o Mɛlɛka o ba, kani o bɛ́ɛ̀ kɔl kon ndóò soli sálàla loamaalan a visin macuɛin sálàla kɔlɲululan ni, kani fonda-loamaa-lasálà n'daɲa Salomɔn ndóò cɔw-vo ve o bɔɔ le sálàla loamaalan, sálàla ɲɛm-vaalan a visin macuɛiyon lomɔɔ lecoo le.

⁸O telen pilɛ kon, mí Salomɔn tosa kafoo le palɛi ndii ŋɔmmɛw, Israɛlla kpow a va ndu ikɛi, mí vannda hun sɛ́lɛ́ bɛndoo fulaa o kobila yɛ́-yɛ́lan nin, cɔnɔnndo Hamat kɔlan tiiyaa háá o pee pɔmbɔɔ Esipte.

⁹O paale ŋɔmaandɔlen coo, má tosa bɔŋan bɛndu-bɛndoo, kani palɛi ndii ŋɔmmɛw yɛngɛsɛɛ a va o kafo kumbiaa fonda-loamaa-lasálàá coo. Má mulin, má tosa niko kafo kpeekpeiyo palɛi ndii ŋɔmmɛw.

¹⁰Paangii ŋɔmmɛwndɔɛi va malɔ bidiin a leyàá, mí Salomɔn mingi vannda o la nda lo, má kɔa o cɛila-kolala-toandaala ndalan nin a ɲaaloo a kɔlta kɛndɛlan le dɛnɛ kɛndɛ Mɛlɛka ndóò tosal David, Salomɔn a vanaa ndɔa-o, Israɛlla pɛɛn.

¹¹Lɔ́ɔ́ Salomɔn cii Cɛi-Hala-o a cɛi lemasaa tangul, mó cii ɲɛ-ɲɛ ndóò tuu le tosaa o Cɛi-Hala-o a o cɛi lemasaa nin-ndo tosa-o,

¹²mí Mɛlɛka cɔmnun ndu icɔllo, mó dimul ndu aa: «I tuei piɛile nɔmnden, i hɛli fondaa ho mó siŋnun Cɛi ni lasálàá.

¹³Telen ya kindanin halataala mì piɔɔ kɛɛ le siaa-o, telen ya tosanin mì sóónɔa tɛɛmbuu lɛŋnden-ndo, telen ya cuunin nàà halimaa vanaa nia coo-o,

¹⁴te vanaa nia diola nilan la co piɔlnɔnndo coo-a tuisin pɛ tootoo, mà piɛi, mà nuwviaa ya, taa mangala pɛ kela nda vɔɔndo, ya Mɛlɛka, i lonin o halataala mì mulul nda piɛilen, mì mal nda haki le haki ndaa, mì singi lɛŋnde ndalen.

¹⁵Kandɔɔ hau, i nɔnin hɔlten o fondaa ho coo a nilen leyaŋaa o fondaa ho.

¹⁶I hɛli Cɛiyo ho mí dindi ndu le ya Mɛlɛka, haliko mi diola nilan la va piɔlnɔnndo lenin le fɛɛn a fɛɛn. Hɔlte nilen a kɔl nuu vanin nanu le lɔ́ɔ́-lɔ́ɔ̀.

¹⁷Nduyɛ, nɔm Salomɔn, taa kela pɛ ya o hɔl mɛɛ David fuɲa nɔm kela yɛ, taa bii pɛ silala nilan a sɔɔn nun,

¹⁸i siminin masale nɔmnden yili, mɛɛ ya yiilu David fuɲa nɔm kpemaa yɛ, mí dimul ndu aa: ‹Le fɛɛn a fɛɛn, a folanin vana koma tosanin masalen o fonda nɔmndo Israɛlla coo-o o cuavaa nɔmnda tɛɛn te.›

¹⁹Kɛ te la mulul-la pɛ kɔɔ, mì la bìí tɔŋnda nilan a silala ya yɔngu niaa lan te, te la sooluu pɛ halaa celennda, mì la baŋ vulan nda o labɛngunin,

²⁰i faŋanin niaa o lɛŋnde ya ke niaa len nin, mì kɛɛ Cɛi ya dindi ho le diola nilan biiloo sɔlaa lenin-ndo, o kon mì vannda súúlan kpow a mam Israɛl, mà pɛɛsa ndu.

²¹Kɔndɔfili bɛndoo biinin vanaa sinà Cɛi bɛndu-bɛndu sɔvɛɔ ho-a, mà ɲunan aa: ‹Ko le yɛɛ nɛ Mɛlɛka tosa yɛ a lɛŋnden nden a á Cɛi-Hala-o ho nuaa?›

²²O kon vannda mululnin nda aa: ‹Le tùú nda mulul Mɛlɛka, Hala fuɲaa ndaa mamaa kɔɔ-o hee yɔŋnun nda ni, o soli nda o lɛŋnde Esipte len nin-ndo pɛɛn. A mulul ndu kɔɔ, má yiinun a halaa celennda, má baŋ vulan nda o labɛngunin, má sooluu nda. Lelan Mɛlɛka tuisi nda sangalan ndan kpow coo ni.›»