Read Kissi Ɛsdras 3 Bible Online

Ɛsdras 3 - Kissi bible

Ɛsdras 3

¹Mɛɛ paangii ŋɔmmɛwndɔɛi tiiya, Israɛlla va icali o kobila ndalan nin, mí nda kpow a cuungian Yerusalɛm.

²Mí Yosue, po Yosadak-o can nda puapilɛa ndɔa, vanaa-solia-lasálàá pɛɛn, a Sorobabɛl po Sealtiɛl-lo nda puapilɛa ndɔa, má kandu fonda-loamaa-lasálà Hala Israɛlla cɔvɔɔ, le sálàla loamaalan solio lecoo maa mɛɛ o va o sɛvaa o tɔŋ Moise vana baala Hala-o nin yɛ.

³Má mingi fonda-loamaa-lasálàá cɔvɔɔ o fonda ndɔ paandoo coo. Siòònde va nda bɛɛ nuaa a vanaa va icali o lɛŋnde len nin-nda, kɛ má solul Mɛlɛka sálàla loamaalan, sálàla loamaala solin idii a icɔl-tan[1].

⁴O kon kɔɔli, má tosa kafo lakùùo maa mɛɛ o va o sɛvaa yɛ, má hiaw laci a sálàla loamaalan solio lɔ́ɔ́-lɔ́ɔ̀, mɛɛ ndóò kelun le solio lepalaa-lepala yɛ.

⁵Kon cuvɔɔ, má soli sálà loamaa solin lepalaa-lepala-o, má soli sálàla paangun sɛnɛilan a sálàla kafola co le Mɛlɛka lan, handɔɔ niko o ɲɛm vana-vana va yɔngoo a yeemɛi ndɔɛi le Mɛlɛka-on coo.

⁶Paangii ŋɔmmɛwndɔɛi ken cɔmndo dɔ́ɔ́, o paale taselen coo, má kandu Mɛlɛka sálàla loamaalan solullo, telen kon ndáà kendu vɔ Cɛi-Mɛlɛka-o kilaa le.

⁷Má ke vanaa sialaa lapowva a vanaa cuaa layindɔa volion, má yɔngu vɛlɛ Sidɔnnda a vannda Tir ɲɛm dian, má yɔngu nda ɲɛ-ɲɛ vana kol, má yɔngu nda cuɛiyan, haliko mi ndáà cua yɔmii sɛɛdrei Liban, mì ndáà hin a ndi o mɛmma ihɛllan coo háá Yopé. Siris masa Pɛrsea vem nda kon kpede tosaa ni.

⁸Vɔsi diinndɔɔ o muungu vanaa va o biyɔɔ nin-nda muungu Yerusalɛm o Cɛi-Hala-o nin-ndo kɔɔli, o paangii diinndɔɛi nin o vɔsi kon nin, mí Sorobabɛl po Sealtiɛl-lo nda Yosue po Yosadak-o kandu baalaa nda puapilɛa ndaa vanaa-solia-lasálàá, leviia a vanaa fula o biyɔɔ nin má muungu Yerusalɛm-nda kpow latulu. Leviia, áà nɔ vɔsilan bidiin a ɲɛ lecoo-a, nda va vanáà bɛnda le simndan baala Cɛi-Mɛlɛka-o laci-a ni.

⁹Yosue nda poaa ndɔa a puapilɛa ndɔa, Kadmiɛl nda poaa ndɔa, á fula o polale Yuda len nin-nda, nda nda vali ndaa va le vanaa va vali Cɛi-Hala kon tosaa-a hɔlten nɔu coo ni. Vanaa va nda malaa o vali kon nin-nda va poaa imamaa Henadad-a, poaa ndaa a vanayan ndan ni, leviia pɛɛn.

¹⁰Mɛɛ vanaa cɔavaa lacɛiya kila Cɛi-Mɛlɛka-o, má simi vanaa-solia-lasálàá lon, domala solia lasálàlan la va nda lekɔɔ, bulula hɔŋaalan la va nda o laba. Leviia nda nda, poaa Asaf-a, ndáà nɔ kɛ́ŋun comulan o laba ni le Mɛlɛka biiloo maa mɛɛ David masa Israɛlla sɛva yɛ.

¹¹Má soli condun lisan a condun malaa balikan o polalen a pilɛn-pilɛnnda le Mɛlɛka biiloo, má va dimio o condei nin aa: «Mɛlɛka naŋ bɔɔ! Vanakɛndɛyɛi ndɔɛi, i co le Israɛl le fɛɛn a fɛɛn!» O kon mí vannda kpow deŋi coocoo kpélén le Mɛlɛka lisaa le tùú nda va Cɛi biilaa ndɔɔ kilaa-o.

¹²O vanaa-solia-lasálàá tɛɛn, o leviia tɛɛn a o vanaa va bolii lapangɛi-ya tɛɛn, mí vanáà nɔ nin vɔsilan taw-va, áà ce cɛi biilaa tase Hala-o-a va caŋndo fúkpàà-fùkpàà le telen nda va Cɛi-Hala diinndɔ kon kilaa nda o hɔl-lo. Telen nda va kon caŋndo-o, vanaa tɔ̀a taw nda va yondiaalan a kɔlkɛndɛ bɛndu-bɛndoo a kponyoo.

¹³Mí ɲɔɔ bingulan kpɔ́lɔ-kpɔ̀lɔ, vanáà sina lɛ pɛɛngulan diomnda kɔlkɛndɛlan a diomnda caŋndan tɛɛn te. Vannda va deŋio taw-taw, vanáà lo nɛɛ levil mí vanáà tuei ivóólun-vóólunnde.