Read Kissi Ɛsdras 4 Bible Online

Ɛsdras 4 - Kissi bible

Ɛsdras 4

¹Mɛɛ yaamɔaa yungu Yuda-o a yungu Bɛnyamɛn-ndo a tuei maa vanaa fula o biyɔɔ nin-nda co Cɛi-Hala-o mingio tangullo le Mɛlɛka, o co Hala Israɛlla-o,

²mí yaamɔaa kan hun o Sorobabɛl-lo a o vanaa va bolii lapangɛi-ya lo, má dimul nda aa: «N yeema mi n mala niaa Cɛi-Hala-o ho mingi tangul, kani Hala pilɛ kon koni naa n co biiloo naa niaa ni, o co lɛ hau le naa n co ndu sálàlan solullo le, kabi o paale Asarhadɔn masaa Asiri len, o cuu naa nanu-o.»

³Kɛ mí Sorobabɛl, Yosue a vanaa va bolii lapangɛi Israɛlla-a mulul nda aa: «O co naa niaa le n bɛnda le Cɛiyo tangullo le Hala naa le! Kɛ naa pila kínɛí n bɛnda le Cɛiyo tangullo le Mɛlɛka, o co Hala Israɛlla-o ni, maa mɛɛ masaa Siris, o co masa Pɛrsea-o vem naa le tosaa yɛ.»

⁴O kon, mí vanaa va o lɛŋnde len nin-nda kandu Yudaa yoomuan solio a nda siòònde lueiyo, haliko mi ndáà mal tangullo.

⁵Mí yaamɔaa kan luɛi vanaa silaa nin a volion, haliko mi ndáà simul nda, mì ndáà tɛɛmbuu nda vallo o ba. Má lo dɛnɛ kon tosaa kandɔɔ o paale Siris masaa Pɛrse len háá o paale Darius masaa Pɛrse len.

⁶O masale Sɛrsɛs[2] len kandɔɔ, mí yaamɔaa kan sɛval ndu Sɛrsɛs sɛbɔɔ le vanaa va o tàndá Yuda-o nin-nda a vanaa va Yerusalɛm ciee-a lɔlɔɔ.

⁷O masale Artasɛrsɛs len bɛngu bɛɛ, mí Bislam, Mitredat, Tabeɛl a caaŋaa ndaa tɔ̀a sɛval Sɛrsɛs masa Pɛrsea sɛbɔɔ. O aramei nin a o sɛva Aramiia nin ndáà sɛva ndu ni.

⁸Mí Rehum, ó va masa ibungaa-o a Simsai, ó va vana sɛvaa-o a sɛval masaa Artasɛrsɛs sɛbɔɔ le Yerusalɛmnda lɔlɔɔ, má dimi o sɛbɛ kon nin aa:

⁹«Rehum masa ibungaa, Simsai vana sɛvaa, a caaŋaa ndaa fula Din-nda, a fula Afarsatak-a, a fula Tarpɛl-la, a fula Afaras-a, a fula Erɛk-a, a fula Babilɔn-nda, a fula Suse-a, a fula Deha-a, a fula Elam-nda,

¹⁰handɔɔ o vanaa súúla celeŋaa Ɔsnapar masa tɔ́ɔ́ bɛndoo bii o cɛlen nin, mó kɛsi nda o kobila Samaria nin a o lɛŋii celen nin o peo Efrate leeloo a ba paalen le del-lo a.»

¹¹Sɔɔn sɛvan o sɛbɛ kon nin-ndon va mun ni aa: «Masaa Artasɛrsɛs, buɛyaa nɔmaa co o tàndá co o pee bɛndoo Efrate leeloo a ba paalen le del-lo-a co sɔɛi nuaa ni.

¹²Masaa, n yeema mà va o sinaa nin maa Yuifia cɛn o nɔm ndo má tiiya naa tɛɛn Yerusalɛm-nda co kobi lanila kalu kon a kobi laasian kon mingio tangullo, a cii kpakila ndɔlan kila ma kandu lan cɔvɔɔ.

¹³Le hee, màá masaa va o sinaa nin, maa te kobi kon muungu pɛ tangulɔn, mì kpakila ndɔlan la bɛɛndian, vanaa vanin lenin-nda mel-lɛnin mulu le, a yɔngu lɛnin ɲɛm kelun-ndon a sala hiavaa le. Ken tosan yɛ pɛ lende, mɛɛ bolofaa lemasaa kuinin te dɛ!

¹⁴Lelan, le tùú naa n co tɔnɔ lemasaa dioo-o, n nɔla mì n lo tofaa mì vana tɛɛndan nɔm masaa le. Le kɔlɔ kon naa n co nɔm sɔɔn mun cɔmndo ni,

¹⁵haliko mi vana yaasiaa o sɛbɛla pandula vanaa tosa masalen nɔm laci-a nin. Nɔm pila saalunnin o sɛbɛla masindɛla lan nin, mà bii bila maa kabi sindɛ háá hau, kobi bolle kalaa kobi kon co ni. O co masaa a tàndàla o co nin-ndan cunulɔnndo kabi sindɛ. Vanaa co icali lenin-nda co pɛngi masaa simullo le. Le kɔlɔ kon kobi kalaa piɔl nuaa ni.

¹⁶Lelan naa n co nɔm masaa dimullo ni maa taa cɛl pɛ mì kobi kon muungu tangulɔn, mì kpaki ndɔɔ bɛɛndian, mɛɛ sina niko maa o lo cɔɔlu cobe, vanaa kan o peo Efrate leeloo a ba paalen le del-lo a ve lɛnin sumialii nɔm te.»

¹⁷Mí masaa mulul nda aa: «Le Rehum masa ibungaa, le Simsai vana sɛvaa a le caaŋaa niaa tɔ̀a kpow, á co icali Samari-a a á co icali o lɛŋii co Efrate leeloo a ba paalen le del-lo-e nin-nda kpow. I yil niaa kpede.

¹⁸Sɛbɛ niaa sɛva mí la yɔŋ naa-o tiiya, mɛɛ nda cii ndu hivi (o sɔɛi nii mangalɛi nin), má dimul-la lavàà lenin mɛɛ o sɛvan yɛ kpafii.

¹⁹Mí viam vannda le yaasiaa o sɛbɛla paandulan nin, má saalun lekɛ́ndɛi maa kabi masindɛ kobi kon bii sɔɛi masaa le, maa sɔngɔlan a seesiɛi vanaa co lon-nda tosa lɔ́ɔ́-lɔ́ɔ̀ ni.

²⁰Masaa nɔ kpaayaa taw-va kei Yerusalɛm, mí masale ndalen le pɛngɛlan o lɛŋii va Efrate leeloo a ba paalen le del-lo-e kpow coo, vannda va nda muloo malɔɔ o ba, a va ɲɛ kelun-ndo yɔngoo, a va sala hiavaa yɔngoo.

²¹Lelan, la handu tɔŋndo mì la dimul vanaa kan maa a mal tangul kon, a bɛnda lɛ mà yɛɛ baa o vali kon te, háá telen ya pila dimul nda le ndu tosaa-o.

²²La cua sɔɛi ken balan tan tiɔn, la tosa lamamɔɔ a ndi le, yɔŋii dɛnɔɔ hiow laci a tambei mì tɔnɔ kon hɛlun vanaa bɛndua lelɛŋnda.»

²³Mɛɛ sɛbɛ masaa Artasɛrsɛs sɛva-o dimin dɔ́ɔ́ Rehum, Simsai a caaŋaa ndaa o hɔl, má kɔa cɔ́-cɔ́ Yerusalɛm, má komal Yuifia, má kuuna nda tangul kon a paa-kala.

²⁴Kandɔɔ ɲinkon, baala tangulaa Cɛi-Hala kon tosan ndɛ le, mó lo lende háá o vɔsi diinndɔɔ nin o masale Darius masa Pɛrsea len bɛngu.