Read Kissi Ɛsdras 7 Bible Online

Ɛsdras 7 - Kissi bible

Ɛsdras 7

¹O dɛnnda lan kɔɔli, telen Artasɛrsɛs masa Pɛrsea va o masalen coo-o, mí langbanɔɔ pum fula Babilɔn diolan ndu aa Ɛsdras, po Seraya-o o va ni, fulaa o polale Aarɔn bolle vanaa-solia-lasálàá len nin. Aarɔn velu Eleasar ni, mí Eleasar vialu Pineas, mí Pineas vialu Abisua, mí Abisua vialu Buki, mí Buki vialu Usi, mí Usi vialu Seraya, mí Seraya vialu Merayɔt, mí Merayɔt vialu Asaria, mí Asaria vialu Amaria, mí Amaria vialu Ahitub, mí Ahitub vialu Sadɔk, mí Sadɔk vialu Salum, mí Salum vialu Hilkiya, mí Hilkiya vialu Asaria, mí Asaria vialu Seraya fuɲaa Ɛsdras.

⁶Ɛsdras kon, vana sɛvaa latɔŋndo o va ni, ndóò sina tɔŋ Mɛlɛka Hala Israɛlla ndóò yɔngu Moise-o taw. Mɛlɛka Hala ndɔɔ va ndu Ɛsdras ikɛi. Lelan ɲɛ-ɲɛ ndóò ɲuna pɛ masaa ndóò sɔla ndu.

⁷O vɔsi ŋɔmmɛwndɔɔ nin o masale Artasɛrsɛs len bɛngu, mí Israɛlla pum, vanaa-solia-lasálàá, leviia, vanaa ɲɛ-caa, kpalilaa cumulaa ladioa a buɛyaa va vallo o Cɛi-Hala-o nin-nda kɔa Yerusalɛm.

⁸Mí Ɛsdras kɔa nda ndaa latulu Yerusalɛm o paangii ŋuɛɛnundɔɛi nin.

⁹Mó yam lɔ́ɔ́ le cɔnɔnndo Babilɔn o paale taselen coo o paangii tasei nin. Mó tiiya Yerusalɛm o paale taselen coo o paangii ŋuɛɛnundɔɛi nin, ba ikɛndɛ Hala ndɔɔ va ndu coo.

¹⁰A toɲa, Ɛsdras ndóò yɔngun a kɔl ndɔɔ kpow le tɔŋ Mɛlɛka-o pɛiyo a le kelaa lecoo, o va vɛlɛ cuavaa Israɛlla tɔŋndan a dɛnɛ sandaa pɛɛkoo.

¹¹Tofa vɔ sɛbɛ masaa Artasɛrsɛs yɔngu Ɛsdras vana-solia-lasálàá a vana sɛvaa latɔŋndo a dɛnɛ Israɛlla o kɔɔ-o. Ɛsdras kon ndóò nɔ dɛnɛ sinaa bɛndoo o tɔŋndan a o silala Mɛlɛka lan nin. Sɔɔn va n'sɛvaa o sɛbɛ kon nin-ndon va mun ni:

¹²«Ya Artasɛrsɛs, masa hiow masaa-o sɛval nɔm Ɛsdras vana-solia-lasálàá a vana sɛvaa sina tɔŋ Hala co o halataala-o-o sɛbɔɔ ho ni.

¹³I yɔngu diomndo mí cɛl, haliko mi Israɛlla, vanaa-solia-lasálàá a leviia, a co o masale nilen nin má yeema le kɔlan Yerusalɛm-nda kpow a kɔɛ niaa ndaa latulu.

¹⁴Ya masaa a vanaa nia silaa ŋɔmmɛwva, naa n vem nɔm le kɔlan tàndá Yuda-o a kobio Yerusalɛm taasio dɔvɔɔ ni, mɛɛ tɔŋ Hala nɔmndo co yɛ, tɔŋ co nɔm o ba-o pɛɛn.

¹⁵N vem nɔm vɛlɛ le kɔlan a volion a á sianin ya masaa a vanaa nia silaa ke Hala Israɛlla a yeemɛi nɛi-yon, Hala calta ndɔlan la co Yerusalɛm-ndo.

¹⁶Handɔɔ o kon coo, ma cua vɛlɛ volion a sianin n cuungiaanin o tàndá Babilɔn-ndo nin-ndon kpow, ma kɔɛ a mun. Ma bii bolofaa Israɛlla a vanaa-solia-lasálàá yɔngunin a yeemɛi ndɛi le Cɛi-Hala ndaa Yerusalɛm-ndo, ma handu o kon coo.

¹⁷A tiiya pɛ, a pendu navaa tovaa, saa kóndóa, saa téndéa, kpeyan bɛnda le sálàá solio a nda-o a mɔima bɛnda le sálàá solio a nda-an. O kon, a soli ɲɛm mun kpow sálà o fonda-loamaa-lasálàá coo o Cɛi-Hala niaa nin Yerusalɛm.

¹⁸Le volion a sianin lonin-ndon, la cal pɛ niaa puapilɛa nɔmnda, la tosa ɲɛ bɛnda-o a mun, mɛɛ hɛnan Hala niaa co yɛ.

¹⁹Ma mingi ɲɛm diandan lekaaŋun yɔngun nɔm-ndon kɛsi Hala nɔm co Yerusalɛm-ndo o hɔl le vali lekaando tosaa a mun.

²⁰Te bɔnɔ celen fula pɛ le baalaa Cɛi-Hala nɔmndo, a vow baa o kesu lemasaa nin, a cua volin tiw le bɔnɔ kon-ndon.

²¹Niaa vanaa mandaa bolofaa co o tàndá co o peo Efrate leeloo a ba paalen le del-lo-a, ya masaa Artasɛrsɛs, i yɔngu tɔŋndo ho: la yɔngu ɲɛ Ɛsdras vana-solia-lasálàá a vana sɛvaa tɔŋ Hala co o halataala-o ɲunanin niaa-o kpede.

²²La nɔla mì la yɔngu háá le volion kilolan vaala yàá (3 000), maalon kilolan vaalan beleyaa (30 000), mɔiyan litililan vàála hiɔɔlu (4 000), cuɛiyan litililan vàála hiɔɔlu (4 000), hɛlle ndi mɛɛ o yeemanin yɛ.

²³Ɲɛ-ɲɛ Hala co o halataala-o dimi le tosaa, kon bɛnda mò tosan lende kpafii, yɔŋii o tuisi kɔltuw ndɔɔ o masale nilen a o polale nilen coo.

²⁴N co niaa vɛlɛ dimul kpendekele maa n kuuna niaa le muloo, ɲɛm solian a sala hiavaa biyɔɔ vanaa-solia-lasálàá, leviia, vanaa ɲɛ-caa, kpalilaa cumulaa ladioa, buɛyaa Cɛi-Halaa a vanaa baalaa co o Cɛi-Hala-o nin-nda kpow o ba.

²⁵Nɔm Ɛsdras yɛ, mɛɛ kɔlkalu Hala nɔmndo co yɛ, kɔlkalu co nɔm o ba-o pɛɛn, hɛli vanaa kialaa n'yamaa a vanaa toosiaa n'sɔɔa, haliko mi kan va le yaman kiolɔɔ o tàndá co o peo Efrate leeloo a ba paalen le del-lo-o kpede nin, vanaa sina tɔŋnda Hala lan-nda pɛɛn. Le vanaa sina vɔ tɔŋnda lan te-a yɛ, a bɛnda ma pɛɛku nda lan.

²⁶Vana-vana bii tɔŋ Hala nɔmndo a tɔŋ masaa kpafii le, ndu bɛnda mò sɔla yaalaa mɛɛ tɛɛmbuu ndɔɔ vanin yɛ: piɔ́mndo, tovɔɔ ndu mò faŋan o lɛŋnde ndɔlen nin, ɲɛm ndɔn poondiaa ndu o ba, te kon te malɔɔ ndu o kaasoo.»

²⁷«Biiloo co le Mɛlɛka, ó co Hala fuɲaa naa imamaa-o, ó luei masaa yiyan kɛndɔɔ o kɔl le Cɛi-Hala co Yerusalɛm-ndo bɛɛle bɛndule vaa nuaa yɔngoo-o!

²⁸Ndu Hala kon tosal-la vɛlɛ kɛndɛi ni, mí masaa, vanaa ndɔa silaa a vanaa bɛndua lelɛŋnda kpow a ca ya ɲia. Kani le tùú kpaaya Mɛlɛka-o, o co Hala nuu-o co ya coo-o, mí tiwba le simlacia Israɛlla mɔɔsiaa le heeloo latulu naa ndaa.»