Read Kissi Ɛsdras 8 Bible Online

Ɛsdras 8 - Kissi bible

Ɛsdras 8

¹«Polama vanaa va bolii lapangɛi-ya ma yɔŋnun man ni, naa ndaa cɛn latulu Babilɔn o paale masaa Artasɛrsɛs len ni, mí n heelu Yerusalɛm:

²Bolle panga fula o poaa Pineas-a tɛɛn-ndo va Kɛrsɔm ni, ó fula o poaa Itamar-a tɛɛn-ndo va Daniɛl ni, ó fula o poaa David-a tɛɛn-ndo va Hatus ni,

³ó fula o poaa Sekania-a tɛɛn-ndo, fulaa o pulun Pareɔs-on nin, ndu yɔŋnun Sakari ni. Ndu ndu, nda vanpiaandua kɛmɛ a beleŋuɛɛnu nda sɛva diolan latulu ni.

⁴Ó fula o poaa Pahat-Moab-a tɛɛn-ndo va Elioenai po Seraya-o ni, ndu va vanpiaandua kɛmɛ lediiŋaa nda sɛva latulu-a bollen ni.

⁵O poaa Sekania-a tɛɛn, po Yahasiɛl-lo nda sɛva ni, ndu va vanpiaandua kɛmɛ leyáá-a nda sɛva a ndu latulu-a bollen ni.

⁶O poaa Adin-nda tɛɛn, Ebɛd po Yonatan-ndo nda sɛva ni, ndu va vanpiaandua beleŋuɛɛnua nda sɛva a ndu latulu-a bollen ni.

⁷O poaa Elam-nda tɛɛn, Esai po Atalia-o nda sɛva ni, ndu va vanpiaandua belaŋɔmmɛvaa nda sɛva a ndu latulu-a bollen ni.

⁸O poaa Sefatia-a tɛɛn, Sebadia po Mikaɛl-lo nda sɛva ni, ndu va vanpiaandua belaŋɔmaa-a nda sɛva a ndu latulu-a bollen ni.

⁹O poaa Yoab-a tɛɛn, Abdia po Yehiɛl-lo nda sɛva ni, ndu va vanpiaandua kɛmɛ lediin tɔ́ a à ŋɔmaa-a nda sɛva a ndu latulu-a bollen ni.

¹⁰O poaa Bani-a tɛɛn, Selomit po Yosifia-o nda sɛva ni, ndu va vanpiaandua kɛmɛ belaŋɔmpumaa nda sɛva a ndu latulu-a bollen ni.

¹¹O poaa Bebai-ya tɛɛn, Sakari po Bebai-yo nda sɛva ni, ndu va vanpiaandua bidiin a à ŋɔmaa-a nda sɛva a ndu latulu-a bollen ni.

¹²O poaa Askad-a tɛɛn, Yohanan po Hakatan-ndo nda sɛva ni, ndu va vanpiaandua kɛmɛ a tɔ́a nda sɛva a ndu latulu-a bollen ni.

¹³O poaa Adonikam-nda tɛɛn, a mɛɛlaa nda sɛva ni, diola ndalan la co lan ni: Elifelɛt, Yeiyɛl a Semaya, nda va vanpiaandua belaŋɔmpumaa nda sɛva a nda latulu-a bollen ni.

¹⁴O poaa Bikvai-ya tɛɛn, Utai nda Sabud[5] nda sɛva ni, nda va vanpiaandua belaŋɔmmɛvaa nda sɛva a nda latulu-a bollen ni.»

¹⁵«Mí cuungiaa nda kpow o pee tuusu a ba Ahava-o-o kɔngɔ, mí n tosa palɛi ndii yáá lon. Mí mɛɛndian vannda kpow, mí ca vanaa tɔ̀a a vanaa-solia-lasálàá, kɛ hali leviinɔɔ ndu pilɛ i ci nda tɛɛn te.

¹⁶O kon, mí veelu simlacia ha: Eliesɛr, Ariɛl, Semaya, Ɛlnatan, Yarib, Ɛlnatan, Natan, Sakari, Mesulam a vanaa pɛɛku vannda tɔŋndo-a nda ŋiɔn: Yoyarib nda Ɛlnatan.

¹⁷Mí viam nda le kɔlan o Ido simlacinɔ va icali Kasifia-o lo, mí congun nda mɛɛ ndáà bɛnda le ndu pila a vanaa nda va baalaa latulu-a dimullo yɛ, buɛyaa va o Cɛi-Hala-o nin Kasifia-a pɛɛn, haliko mi ndáà cuu naa vanaa malaa le baalaa o Cɛi-Hala naa nin.

¹⁸Nduyɛ, mɛɛ ba Hala naa va naa coo yɛ, mí vanaa kan vim naa Serebia. Vana kendu kɔl taw o poaa Mahli-a tɛɛn-ndo Serebia kon va ni, po Levii-o a po imama Israɛllo Mahli kon va ni. Mí Serebia kon hun a poaa ndɔa a á puapilɛa ndɔa, a va n'van tɔ́ a vanaa ŋɔmaa.

¹⁹Vanaa ndáà vem nda ndaa latulu-a va Hasabia nda Esai puapilɛ ndɔ ni, fulaa o poaa Merari-a tɛɛn. Mí nda bɛɛ a hun a vanayan ndan a á poaa ndaa, vanpiaandua bidiin nda va ni.

²⁰O buɛyaa Cɛi-Hala-a David a vanaa va bolii lapangɛi-ya ndáà sɔɔ leviia o ba-a tɛɛn bɛɛ, má soli a pum ma vim naa nda. Kan nda va n'van kɛmɛ lediin a bidiin (220), nda kpede ma sɛva nda diolan a pilɛn-pilɛnnda.

²¹Nɛɛ naa n va o peo Ahava kɔngɔ-a, mí yɔngu yondaa le sumndo biyɔɔ le tuisinndo tootoo Hala naa o hɔl, haliko mi ndóò kanda naa pila, cuavaa naa a ɲɛm naan, mì náà n sɔla kɔlɲuloo o kɔlan.

²²Kani o va nin ya o lasiɛmbu le masaa ɲunaa vɛlɛ mì ndóò ke naa vanaa cɔwva a vanaa ɲaanun o soa coo-a le naa mandaa nɛi-tɛɛn le yaamɔaa naa. Bau naa n cii nin masaa dimul maa ba Hala naa co vanaa tiindan ndu-a kpow coo. Kɛ o tuisinin kɔl ndɔ tuw bɛndoo vanaa kɛɛ ndu-a coo.

²³Lelan naa n bii sumndo ni, mí n piɛi Hala naa, mó muli piɛile naalen.

²⁴O kon kɔɔli, ya Ɛsdras, mí hɛli simlacia tɔ́ a à ŋiɔn o vanaa-solia-lasálàá tɛɛn, nda va haa ni: Serebia, Hasabia a puapilɛa ndaa n'van tɔ́.

²⁵Mí tuu ɲɔɔn mun kpow nda o hɔl: volion, sianion a ɲɛm sɔvɛɔn, n masaa, vanaa ndɔa silaa a vanaa kùndàà ndɔa a Israɛlaa va Babilɔn kpow-va yɔngu le Cɛi-Hala-o-on.

²⁶Mí yɔngu nda volion kilolan vaalan bidiin (20 000), ɲɛm cɔwnun a volion-ndon kilolan vàálan tan yáá (3 000), sianion kilolan vàálan tan yáá (3 000),

²⁷taalala kólaala n'sianilan bidiin, la va le sianin kpungban vàá pilɛ (1 000), kpɛɛnɛn kɛndɛ-kɛndɛn cɔwnun a daɲan kpɔlɔkan-ndon mún miun, n va n'sɔvɛ maa kpɛɛnɛn cɔwnun a sianion-ndon.

²⁸O kon mí dimul nda aa: ‹Niaa pila cuu sálà solin le Mɛlɛka, ɲɔɔn mun bɛɛ n cuu sálà solin, volion mun a sianion mun, sálà yɔngun Mɛlɛka, Hala fuɲaa niaa mamaa-o n co ni.

²⁹La landu hɔlla ɲɛkɛndɛi o bolofaa ho coo, la manda ndu háá paale niaa kɔ tuunin ndu Yerusalɛm-nden. La tiiya pɛ lon, la tuu ndu bolii vanaa-solia-lasálàá, leviia a vanaa co bolii lapangɛi-ya o hɔl o cɛila holnun Cɛi-Mɛlɛka-o lan nin.›

³⁰Le hee, mí vanaa-solia-lasálàá a leviia cua sianin mun, volin mun a ɲɛm sɔvɛn ndáà tuu mun-ndon le kɔlan a mun Yerusalɛm o Cɛi-Hala naa nin.»

³¹«O paale tɔ́ a lediinndɔlen coo, o paangii tasei nin, mí n faŋan o peo Ahava kɔngɔ le kɔlan Yerusalɛm. O telen naa n tosa nɛi-tɛɛn-ndo kpede bɛngu, ba Hala-o va naa coo, o va naa kandaa le yaamɔɔa a le vanaa del vannda coo-a.

³²Mɛɛ naa n tiiya Yerusalɛm, mí n pɛngi palɛi ndii yáá.

³³O paale hiɔɔlundɔlen coo, mí n tuu volion, sianion a ɲɛm sɔvɛn mun o Cɛi-Hala naa nin, o kon mí yɔngu Meremɔt vana-solia-lasálàá mun, po Uri-o o va ni. Vanaa va ndu ikɛi-ya va haa ni: Eleasar po Pineas-o, Yosabad leviinɔ, po Yosue-o a Noadia po Binnui-yo.

³⁴Mí ɲɛm mun kpede n cɔmnun, mí n tuunun, mí lusul ndɔɔ kpow sɛvan o sɛbɔɔ nin.

³⁵Cɔlua vanaa fula o biyɔɔ nin má muungu-a yɔngu le sálà loamaa solio o Hala Israɛlla lo o diola vannda kpow-va yɔŋnun haa ni: navaa tovaa tɔ́ a à ŋiɔn, saa kóndóa belaŋɔmahiɔɔlu a à ŋɔmpum, saa téndéa belaŋɔmmɛw a à ŋɔmmɛw a cuinaa toovia tɔ́ a à ŋiɔn le sálà co le hakio-o. Má soli cɔlua kan kpow sálà loamaa le Mɛlɛka.

³⁶O kon kɔɔli, má tɛɛngul vanaa bɛndua a masaa n'bungaa va o tàndá va o peo Efrate leeloo a ba paalen le del-lo-a sɔɔn masa bɛndoo ndóò dimi mun-ndon. O kon, má mala niko vannda le Cɛi-Hala-o mingio tangullo.»