Read Kissi Nehemi 4 Bible Online

Nehemi 4 - Kissi bible

Nehemi 4

¹«Lɔ́ɔ́ Sanballa, Tobiya, Arabua, Amɔnnda a Asdɔdea tuei maa baala kpakio Yerusalɛm co nin lándán, mí tɛɛngon va baŋulɔnndo-o, má cɔɔlu kɔltan itambu taw-taw.

²Má cɛlan le hunɔɔ delɔɔ Yerusalɛm coo, le ndu tɛɛmbuuo.

³O kon mí n piɛi Hala naa, mí n kɛsi kpalilla le ipala a le icɔl, yɔŋii nda va naa palaa a cɔwvo.

⁴Nduyɛ vannda Yuda va dimio aa: ‹Vanaa baalaa fula yoomuan, Puuloo co o bɔɔ! N nɔlanin kpakio ho mingio cɔvɔɔ le.›

⁵Yaamɔaa naa nda va dimio aa: ‹A biinin ɲɛ-ɲɛ bila le, a cinin ɲɛ-ɲɛ le, háá mì n tiiya nda tɛɛn. O kon, n diwnin nda, mì baalaa kon tambu.›

⁶Nduyɛ, Yuifia va icali nda tɛɛn-nda ndáà hin pɛ, ndáà dimul háá bɛmbɛ tɔ́ aa ‹Nɛɛ-nɛɛ nda co icali, a co heelu le hunɔ̀ɔ̀ delɔɔ naa coo[3].›

⁷Lelan, mí kɛsi vannda lebɛngu o bóllo nin o kpakio kɔɔli, a nɛɛ kpakio ndóò cownun ndɔ le-a, mí kɛsi nda mɛɛ yungula ndalan la va yɛ. Mɔɔn cɔwvon, báltan a kpaasiaalan la va nda o laba.

⁸Yáà ciiyo sɔɔn mun mɛɛdianndo kpow, mí dimul vanaa bɛndua, vanaa kialaa n'yamaa a vanaa tɔ̀a kpow aa: ‹Siòòŋii bii niaa a nda le! La loonun maa Mɛlɛka co o bɔɔ, ndu co kpúlúnkùmaa ni. La cɔlɔba le puapilɛa niaa, le poaa niaa, le cuavaa niaa laandua, le laandaa niaa a le cɛila niaalan.›

⁹Mí yaamɔaa naa tuei maa n sina tuu ndaa, maa Hala tɛɛmbuu tuu nda kon. Mí naa kpow vana-vana muungu o kpakio, vana-vana o baala ndɔɔ nin.

¹⁰Kandɔɔ telen kon, mí piɔw vanaa nia baalaa kundalan tan tiɔn: kunda tasoo va baalaa, mì kunda diinndɔɔ ndu sim a volɔɔla cɔwlan o ba: báltan, kɔ̀ɔ̀la cɔwlan, kpaasiaalan a domala cɔwlan o ba. Vanaa bɛndua kpow a va Yudaa simndan kɔɔli.

¹¹Vanaa va kpakio cɔvɔɔ-a, a va volɔɔlan vilio-a a á va vannda volɔɔlan siloo-a, vana-vana va baalaa tosaa a baa ndu pilɛ, ɲɛ cɔwvo va ndu o baa pilɔɔ.

¹²Vanaa cɔavaa cɛiya, vana-vana va baalaa tosaa a mɔɛi cɔwve i lanndande o caŋ. Vana hɔŋaa buloo va isisi ya ikɛi kpɛɛlun.

¹³Mí dimul vanaa bɛndua, vanaa kialaa n'yamaa a vanaa tɔ̀a kpow aa: ‹Baalaa co o bɔɔ, o tongu naa o ba taw. Nduyɛ n co a sɛŋiannda kpede o kpakio coo. N connan lándán-lándán.

¹⁴Nɛɛ-nɛɛ niaa tuei pɛ buloo diom, la cɛn o fonda niaa co và-o, la komal naa lon. Hala naa tosanin cɔwvo le naa.›

¹⁵Vannda táláá pilɔɔ kpow ndáà nɔ báltan o laba kandɔɔ a paale siaalen háá mi loeon fula icɔllo, lende naa n va baalaa ni.

¹⁶O telen pilɛ kon bɛngu, mí dimul vɛlɛ vannda aa: Niaa kpow, vana-vana bɛnda mò lɔl Yerusalɛm nda vana ndɔ baalaa, haliko mì n vannun cumullo icɔl, mì vannun baalaa ipala.

¹⁷Ya pila, puapilɛa nia, vanaa nia baalaa a vanaa va cumullo-a kpow, vana-vana ve volɔɔla ndɔlan solin lekɔɔ le, vana-vana óò nɔ ɲɛ ndɔ cɔwvo o ba[4].»