Read Kissi Nehemi 6 Bible Online

Nehemi 6 - Kissi bible

Nehemi 6

¹«Mí Sanballa, Tobiya, Kesɛm Arabunɔ a yaamɔaa naa tɔ̀a a tuɛi maa tɛɛngun kpakion cuu baŋul, maa i cii kpakio mingi tangul. Telen kon yɛ, yáà hendu vɔ bɛɛ koŋndan te.

²Mí Sanballa nda Kesɛm a vim ya kiilaa le bɔŋanndo naa ndaa Kefirim o bóllo Ono nin. Nduyɛ, ndáà cii nin mɛi le ya dɛnɛ vɔɔndo tosallo.

³Mí mingul nda kiilaa le nda dimullo aa: ‹I haw bɔɔ ba, baalaa co ya taw. Lelan i tiwnin ba le tuusoo lon te. I faŋan pɛ mì tuusu nɛɛ niaa yoongu ya-a, baalaa koma tosan nin te.›

⁴Háá bɛmbɛ lehiɔɔlu, a va ya kiilaa vimndo le ya yoongu pilɛ kon, kɛ muli pilɛ kon koni ya bɛɛ va nda yɔngoo ni.

⁵O bɛmbɛ ŋuɛɛnundɔɔ, mí Sanballa sɛva sɛbɔɔ, mó yɔngu buɛi ndɔɔ, mó cuu ya sɛbɛ kon o kumbiaa.

⁶O va o sɛvaa o sɛbɛ kon nin aa: ‹O co diminndo vanaa-mangalaa-isɔaa tɔ̀a tɛɛn, Kasɛm bɛɛ peelu sɔɛi ken, maa nɔm pila a Yuifia tɔ̀a, la co bɛɛndianndo le luɛyɔɔ o seesiɛi, maa lelan nɔm co kpakio mingio tangullo ni, kani nɔm yeema ni ma siŋnun masa ndaa, lende nda co dimio ni.

⁷Maa nɔm cii nin vanaa-tɛɛngaa-diom Hala-a kɛsi le keiyo vannda dimullo Yerusalɛm maa nɔm co masaa o tàndá Yuda-o coo ni. Nduyɛ, sɔɔn mun co lo kelaa háá mi n del masaa o lani. Lelan hun mì n suukan naa niaa.›

⁸O kon mí mingul ndu Sanballa mulio ho aa: ‹Sɔɔn n co mùn dimio-on, ɲɛ-ɲɛ co toɲa lenin te, nɔm pila sii co tuuvo lende ni.›

⁹Vanaa kan kpow ndáà yeema le naa siòònde lueiyo, mì va dimio aa: ‹Bala ndalan la co sanga a baala kalaa, o kon o tosan ndɛnin te.› Lelan, yandi Hala nuu! Luei ya niko yoomuan.

¹⁰Paale pilɛ, mí kɔa o Semaya po Delaya-o, po imama Mehetabeɛl-lo lo, mí komal ndu, o va o bahavɛiyo nin. Kɛ mó dimul-la aa: ‹N kɔ bɔŋan o Cɛi-Hala-o nin, o Cɛi-Diandaa kɔllo, mì n kiindia diola Cɛi kon, kani vannda co hunɔɔ dɔ́ɔ́ a ɲumndan le nɔm diyɔɔ.›

¹¹Mí mulul ndu aa: ‹O co vanapɔnɔ ɲaanun te ya co le. O faŋan pɛ o kon kɔɔli, ɔ́ɔ̀ vana co maa ya, mò luɛi o Cɛi-Hala-o nin, mò lo yoomu-o? Lelan, i lueinin te few!›

¹²Mí sina maa o ve Hala le ndóò vem ndu le. Kɛ Sanballa nda Tobiya ndáà luɛi ndu nin a volion ni le ya diom lacòò kon dimullo.

¹³Le yɛɛ ndáà luɛi-yɛ ndu nin? Haliko mì siòònde ndíì bii ya, mì yáà tosa mɛɛ ndóò dimi yɛ, o kon mì yáà cua hakio. Yáà tosa yɛ pɛ lende, ndáà sɔla talen le ya diolan tɛɛmbuuo, mì siɛmbulan láà tol-la.

¹⁴Éé Hala! Loonun a Tobiya nda Sanballa, le dɛnnda nda tosa lan. Loonun vɛlɛ a Noadia vanalanɔ-tɛɛngaa-diom Hala-o, a vanaa-tɛɛngaa-diom Hala-a celen, áà yeema le ya siòònde lueiyo-a.

¹⁵Mí kpakio cuu cɔvɔɔ o paangii Elul nin, o paale bidiin a leŋuɛɛnundɔlen coo. O palɛi beleŋuɛɛnu a iŋiin bɛngu o cɔwnun ni.

¹⁶Lɔ́ɔ́ yaamɔaa naa kpow a tuei ken-ndo, mí siòònde bii vanaa-mangalaa-isɔaa balu naa-a, mí siɛmbulan la bii nda taw, má sina maa o hɛnan Hala naa bɛngu baalaa kalaa tosan ni.

¹⁷O telen pilɛ kon bɛngu, vanaa bɛndua Yuda a va Tobiya sɛbɛlan sɛwviallo taw, Tobiya bɛɛ ndu va nda sɛbɛlan sɛwviallo.

¹⁸Kani vanaa bɛndua bɔɔ-bɔɔ Yuda a va a yiinannda a Tobiya le ciɛ́ɔn ndáà cuel ndu-on. Bau Sekania, po Ara-o ndóò ke ndu Tobiya lanɔɔ ni. Yohanan po ndɔ ndóò yil vɛlɛ cua Mesulam, po Berekia-o o nɔ̀u nin ni.

¹⁹A va ndu sangalaa hali ya pila o hɔl, a va kɔlan sɔɔn nun ndu hivullo. Mí Tobiya va ya sɛbɛlan sɛvallo le ya vueinɔnndo.»