Read Kissi Nehemi 9 Bible Online

Nehemi 9 - Kissi bible

Nehemi 9

¹O paale bidiin a lehiɔɔlundɔlen coo o paangii pilɛi ken nin, mí Israɛlla cuungian le sumndo biyɔɔ. Má vownun volɔɔla yuululan, má suinun vɛlɛ loolio o lebol.

²Má Israɛlla sɛyan a vanaa co N'Yuifi le-a, má cal nda daama, má sɔlɔlan hakila ndala nda pila lan a hakila fuɲaa ndaa mamaa.

³Mí nda kpow a lo isisi o fondala ndalan, má va nilan yaŋɔɔ o sɛbɛ tɔŋ Mɛlɛka ndaa, háá lɛɛlɛlan tan yáá. Má mulin vɛlɛ, má tosa lɛɛlɛlan tan yáá, a va vula baŋaa Mɛlɛka Hala ndaa o labɛngunin, le ndu ɲɔɔloo haliko mo mal nda haki.

⁴Mí Yosue, Bani, Kadmiɛl, Sabania, Buni, Serebia, Bani a Kenani sim o bando leviia coo, má heelu diomndan le Mɛlɛka Hala ndaa piɛiyo.

⁵O kon kɔɔli mí leviia: Yosue, Kadmiɛl, Bani, Hasabnia, Serebia, Hodia, Sabania a Petahia dimi aa: «La cɔn mì la mel Mɛlɛka Hala niaa balika. La mel ndu balika le fɛɛn a fɛɛn.» «Màá diola nɔmnda tɔ́ɔ́lan la sɔla biiloo, kani diola hiow naŋɔɔ lan la co ni.

⁶Nɔm pilɛ kpé co Mɛlɛka ni. Nɔm tosa halataala bɛndoo a loeon kpow ni, nɔm cɔw lɛŋnden a ɲɛm co lecoo-on kpow ni, mɛmma ihɛllan a ɲɛm co lenin-ndon kpow bɛɛ nɔm toosiaa ni. Nɔm yɔngu ɲɛm cɔwnun-ndon kpow yoomoo ni. Ɲɛm cɔwnun coocoo o halataala-on kpow n co vulan baŋɔɔ nɔm o labɛngunin.

⁷Mɛlɛka Hala, nɔm hɛli Abram ni. Má soli ndu Ur o lɛŋnde Kaldea nin, má ke ndu diolan aa: Abraham.

⁸Má ca maa kɔl ndɔɔ sandu nɔm o hɔl, má yiilu ndu kpemaa, má yɔngu ndu lɛŋnde Kanannda, Hitiia, Amɔnnda, Perisiia, Yebusiia a Kirkasiia, mì cuavaa ndɔa va icali lenin. Nduyɛ, má lo o lediom coo, kani vana sandaa n co ni.

⁹Má ca sanga fuɲaa naa imamaa Esipte, má tuɛi vɛlɛ nda nɔm veeloo le nda malaa, nɛɛ nda va isisi o mɛmma ihɛlma makpɛ̀ndɛ̀an kɔngɔ-a.

¹⁰Má tosa dɛnnda kɔndɔfilta bɛndulan le Faraɔnnɔɔ cɔlɔbaa, le langbaa ndɔa kɛsun kálàá a vanaa va o lɛŋnde ndɔlen nin-nda kpow cɔlɔbaa, kani nɔm sina mɛɛ nda bii fuɲaa naa imamaa a yongaa yɛ. Mí diola nɔmndan la sɔla tɔ́ɔ́ bɛndoo, tɔ́ɔ́ kon co vɔ háá hau.

¹¹Má tɛnda mɛmma ihɛllan Israɛlla laci, mí Israɛlla taŋ man a pelon n'vesɛi sɛɛn. Kɛ nɔm, má miisuu vanaa va nda tovɔɔ-a maa pow o lumii mɛmma bɛnduei nin.

¹²Nɔm Mɛlɛka, a va vanaa nɔmnda simndan laci ipala o tindile ikumnden nin, icɔl o tindile leyinnden nin le nɛi ndaa teengiaa.

¹³Má can o halataala, má tɔal le sɔɛi o nda lo o pembei Sinai coo. Má tiiyal nda silala sɔvɛlan, pɛɛkula toɲaalan a tɔŋnda diandaalan.

¹⁴Má viam Moise vana nɔm baalaa, mó cɔm nda paale nɔmnde pɛngiaale diandaalen, o kon má pɛɛku nda sɔɔn a tɔŋnda celen.

¹⁵Má ke nda ɲɛdiaa fula o halataala-o le yima va nda nɛiyo-an, má soli mɛnndan o pow kpovaa nin le bolola vesɛila va nda lan. Má viam nda le nda lɛŋnde nɔm óò yiilu nda kpemaa le nda yɔngoo len hiɔlɔɔ.

¹⁶Kɛ mí fuɲaa naa imamaa tosa yongaa, má kɛɛ nɔm diom, a yeŋ nilan o tɔŋnda nɔmndan te.

¹⁷Má kɛɛ diom nɔmndo biyɔɔ, má pɔɛɛnun dɛnnda kɔndɔfilta bɛndula n tosal nda lan, má kindi nilan, má dimi le muungɔnndo Esipte o cɛle ndalen nin. Kɛ nɔm, a mel nda le, kani Hala mal vana haki-o n co ni, Hala nɔ ɲííye a kɛndɛi-yo. A biwnùn, a pɛ a dɛnɛ kɛndɔɔ.

¹⁸Hali lɔ́ɔ́ nda teengiaa cilinndon, má cɔaw naw téndóó a mun, má dimi aa: ‹Hala naa co hoo ni, o soli naa Esipte-o›, telen nda tosa kon dɛnnda nɔɔlɛilan-ndo,

¹⁹nɔm, a kaola nɔm nɔ lamɛɛlu loo, a mel nda o lɛŋnde veselɛilen nin te few! Tindile ikumnden le va nda vɛlɛ simndan laci, le va nda nɛiyo cɔmndo ipala, le faŋan nda ikɛi le, vundule leyinnden bɛɛ le va nda nɛiyo teengiaa laci icɔl o kɔlan.

²⁰Má tosal nda kɛndɛi, má ke nda kɔlkaloo. Má va nda manne yɔngoo lɔ́ɔ́-lɔ́ɔ̀ le dioo, a mɛnndan le kolɔɔ.

²¹Má manda nda o vɔsilan belehiɔɔlu bɛngu. Lɔ́ɔ́ nda va kon o lɛŋnde veselɛilen nin-ndo, ɲɛ-ɲɛ bii nda lepɛŋ te. Domala ndalan la siɔŋ te, pelun hiinduu nda le.

²²Má mal masɛi a vanaa súúla celennda nda o ba, má ke nda lɛŋii balu nda-e kɛ́ɔ, lɛŋnde Sihon masaa Hɛsbɔn-nden a lɛŋnde Ɔk masaa Basan-nden.

²³Má ke nda cuawva sɛ́lɛ́ bɛndoo maa loeon o halataala. Má kɔa a nda o lɛŋnde Kanaan-nde nɔm óò vem fuɲaa ndaa mamaa le len hiɔlɔɔ len nin.

²⁴Mí poaa ndaa puu lɛŋnde len, má cal lenin. Má mal Kanannda nda o ba, haliko mi Kanannda va nda o ba bɛngu. Mí vanaa nɔmnda tosa ɲɛ hɛnan nda-o a masaa a á vanaa va o lɛŋnde len nin-nda.

²⁵Má bii kobila mayoomulan, má hialu ɛŋii naŋ tɔlɔɔlan-nde, cɛila bolofaa va nin taw lan, soonnda kólaala ndáà tow lan, nakɔla n'rɛsɛnndan, nakɔɔla olivieelan, a tɔlɔɔla celen taw. O kɛndɛi nɔmii bɛnduei bɛngu, má dia mɛɛ ndáà hɛnan yɛ, má pum kúkúú, má vannun o dɛnɛ kɛndɛ ɲaale bɛndoo nin.

²⁶Kɛ a kon kpow, a bii sɔɛi nɔmnde le, má tosa nila kalulan a nɔm, má mulul nɔm kɔɔ, má diw vanaa-tɛɛngaa-diom Hala-a nɔmnda, á va nda tolɔɔ kɔɔli le muungoo nɔm o ibuŋ-nda, má tosa dɛnnda nɔɔlɛilan taw.

²⁷O kon, nɔm Mɛlɛka, má mal Israɛlla yaamɔaa ndaa o ba, mí yaamɔaa kan saangiaa nda. Má koŋul nɔm o lani le sanga nda va kon-ndo, má tuɛi nda diom nɛɛ n co o halataala dí-a. A ɲíí nɔmii bɛndui nɔ lamɛɛlu lei, má viam vannda le nda solio o cɛlen nin yaamɔaa ndaa o ba.

²⁸Kɛ ndáà fulaa dɔ́ɔ́ o cɛle len nin, má kandu vɛlɛ hakilan tosaa a nɔm. Nɔm Mɛlɛka, má mal nda vɛlɛ yaamɔaa ndaa o ba. O kon kɔɔli, má koŋul vɛlɛ nɔm o lani, má tuɛi vɛlɛ nda diom nɛɛ n co o halataala-a, o ɲíí nɔmii bɛnduei nin, má baŋa nda bɛmbɛlan taw.

²⁹Má baŋ nda le tɔŋ nɔmndo biyɔɔ, kɛ má tosal nɔm nila kalulan, a yeŋ nilan o tɔŋnda nɔmndan te, má kɛɛ le silala nɔmndan biyɔɔ. Nduyɛ, silala lan, la co vanaa co lan biyɔɔ-a ciindiaa. Má tosal nɔm yongaa a nila kalulan, má kɛɛ le nɔm yaŋnɔnndo few-few.

³⁰A manda nda o vɔsilan taw bɛngu, mí vanaa-tɛɛngaa-diom Hala-a nɔmnda, à kɔl nɔmndo va nin-nda, va nda sɔɔn nɔmndon tɛɛngullo, kɛ a yeŋnun te. O kon nɔm bɛɛ mal nda vanaa súúla celen o ba.

³¹Kɛ hali a kon, a kaola nɔm nɔ lamɛɛlu loo, a cii nda le, a kɛɛ nda le, kani Hala iɲííyo a Hala nɔ kɛndɛi-yo n co ni.

³²Nɔm Hala naa, a co o bɔɔ, Hala kpaayaa a kpúlúnkùmaa n co ni. Nɔm manda kpema n yii a naa-o ni, má lo o lediom coo. Yandi, yiyan sangala vanaa nɔmnda sɔla lan coo, sangala masaa naa, simlacia naa, vanaa-solia-lasálàà naa, vanaa-tɛɛngaa-diom Hala-a naa, fuɲaa naa imamaa a sangala naa pila n sɔla lan pɛɛn, kandɔɔ o telen masaa Asiri-o háá hau.

³³O dɛnnda tosalan naa lan kpow nin, má yɔŋnun vana sandaa, má lo o lediom coo, kɛ naa n yɔŋnun vanaa lo o lediom coo le.

³⁴Masaa naa, simlacia naa, vanaa-solia-lasálàà naa a fuɲaa naa imamaa bii tɔŋnda nɔmndan te. Má mal tɔŋnda nɔmndan a sɔɔn nɔm óò sila nda-on.

³⁵Hali a bolofaa bɛndu nɔm óò ke nda o masale ndalen nin-ndo kpow, a kɛsi nɔm óò kɛsi nda o lɛŋnde bɛndulen a o lɛŋnde naŋ tɔlɔɔlan-nden nin-ndo bɛɛ, a cɛl le nɔm baalaa tosallo le. A cɛl le kela nda vɔɔndo mangalaa le few.

³⁶Má cè naa niko hau o cɛlen nin! Cɛa naa n co o lɛŋnde n ke fuɲaa naa imamaa len nin ni, lɛŋnde n ke nda le ɲaaloo dɔwnɔnndo lenin a le kulun kɛndɛ-kɛndɔn dioo nin-nden.

³⁷Lɛŋnde len le co hau masaa n kɛsi naa coo-a bolofaa lueiloo nuaa ni, masaa naa n co a vɔngulaa o ba o cɛlen nin le hakila naalan-nda pɛɛn. Masaa kan co hɛnan ndaa tosaa a naa a á cɔlua naa. N co bɔɔ sangaa mbɔ̀!»