Read Kissi Ɛstɛr 2 Bible Online

Ɛstɛr 2 - Kissi bible

Ɛstɛr 2

¹Dɛnnda lan hiovɔɔ, mí masaa Sɛrsɛs ɲulul kɔl, mó yiyan a dɛnɛ Vasti ndóò tosa-o, a mɛɛ sɔɛi ndíì kelun le ndu yɛ.

²O kon, mí vanaa va baalaa tosaa o ndu lo cɛinin nda dimul ndu aa: «O bɛnda mì vana nuwviaa cuavaa laandua kɛndɛ-kɛndɛa sina vɔ dɛnɛ vanapɔnɔ le-a le masaa.

³Lelan, masaa bɛnda mò hɛli vanaa dɛnɛ sinaa, mà kɔɛ o kobila lebolta co o masale ndɔlen nin-ndan kpow nin, mà kɔ hɛli cuaambɔa laandua kɛndɛ-kɛndɛa sina vɔ dɛnɛ vanapɔnɔ le-a, mà hun luei nda o cɛi mandaa n'vanlaandoo nin o kobi lebol lemasaa Suse nin, mà kɛsi nda Heke va cɛi mandaa n'vanlaandoo hɔlten-ndo o ba bɛngu. Mì ndu va nda ɲɛm cɔɔlu vana naŋɔɔ-on yɔngoo.

⁴Cua laandu hɛnannin nɔm masaa-o siŋnunnin lanɔɔ masaa o fonda Vasti-o ni». Mí sɔɛi ken hɛnan masaa, mó tosa lende.

⁵Nduyɛ, langbanɔɔ pum va Suse o kobi lebol lemasaa nin, Yuifinɔɔ o va ni, diolan Mardosee. Po Yair-o o va ni, Simei po Kis-o ndóò velu Yair kon ni, fulaa o polale Bɛnyamɛn-nden nin.

⁶O va vana pilɛ o vanaa Nebukanɛsar masaa Babilɔn, ndóò bii Yerusalem, mó kɔa a nda o biyɔɔ nin-nda tɛɛn. Yekonia masaa Yuda-a bɛɛ va o vanaa ndáà kɔɛ kan o biyɔɔ kon nin-nda tɛɛn.

⁷Mardosee kon va Hadasa mandaa ni, o ndáà veelu aa Ɛstɛr-o pɛɛn. Cua fuɲa ndɔ pɔmbɔ-o Ɛstɛr kon va ni. Vííyo Ɛstɛr va ni, ndóò nɔ lɛ fuɲa le ndóò nɔ lɛ kala le. Cuaambɔ kalaa ndóò naŋ hɔlla taw. Mɛɛ fuɲa ndɔ a kala ndɔ vi, mí Mardosee cua ndu, mó va ndu mandaa.

⁸Lɔ́ɔ́ sɔɛi masaa kelu ken mó handu ba coo-e yondan-ndo, má cuungiaa cuaambɔa laandua sɛ́lɛ́ bɛndoo o kobi lebol lemasaa Suse nin, Heke o ba bɛngu. Ɛstɛr va vana pilɛ o cuaambɔa laandua kan tɛɛn, má kɔa a ndu o cɛi mandaa n'vanlaandoo nin, má sɔaa ndu Heke va cɛi mandaa n'vanlaandu kon hɔlten-ndo o ba.

⁹Mí Ɛstɛr hɛnan Heke taw, mó ca ndu ɲia. Mó keleŋa ndu dɔ́ɔ́ ɲɛm kɛndɛn vana bɛɛndian-ndon, a ɲɛm bɛnda le balo ndɔɔ-on yɔngu. Mó yɔngu ndu vɛlɛ buɛyaa laandua felengia nda ŋɔmmɛw, à ndáà hɛli o cuaambɔa laandua va baalaa o cɛi lemasaa nin-nda tɛɛn-nda. O kon má cua Ɛstɛr a buɛyaa ndɔa laandua, má luei nda o cɛi hiow naŋɔɔ kpow o cɛi mandaa n'vanlaandoo nin-ndo nin.

¹⁰Ɛstɛr cɔm vana-mangalaa-isɔɔ súú o va-o le, o cɔm vɛlɛ yungu o fula nin-ndo le, kani mí Mardosee ndóò kuuna ndu.

¹¹Lepalaa-lepala, Mardosee va kɔlan o bɛ́ɛ̀ cɛi mandaa n'vanlaandoo nin le sinaa te Ɛstɛr va kɛndɛ a le sinaa mɛɛ nda va ndu biyɔɔ yɛ.

¹²Felengia kan ndáà bɛnda mì ndáà bɛɛndian o paagon tɔ́ a n'miun bɛngu mɛɛ ndóò sɛvan a vanlaandua o kɔɔ yɛ. O paagun ŋɔmpumun tason bɛngu, cuɛima cun kɛndɛan ndáà suinun ni. O paagun ŋɔmpumun tɔ̀un bɛngu, ɲɛla cun kɛndɛlan a ɲɛ-ɲɛ ningila vanalanɔɔ ndáà suinun ni. Te telen bɛɛndian kon ndóò hiow pɛ, cuaambɔa laandua kan, vana-vana ndóò kɔɛ o masaa lo.

¹³Te telenndo ndóò tiiya pɛ le cuaambɔ laandoo kɔlan masaa o hɔl, ɲɛ-ɲɛ cuaambɔ laandu kon ndóò yeema pɛ le kɔlan a ndu cɔnɔnndo o cɛi mandaa n'vanlaandoo nin le kɔlan o cɛi lemasaa nin, ndáà yɔngu ndu.

¹⁴Icɔl ndóò kɔa ni, diimandɔɔ idiiyo ndóò hiow o cɛi diinndɔ mandaa n'vanlaandoo nin. Vana va cɛi diinndɔ kon bollen-ndo va Saskas ni, ndu va vana bɛndu va sámáá masaa mandaa-o ni. Ndóò muungu lɛ o masaa lo le, fɔ mì yeemɛi ndɔɛi ndíì bii masaa, malan ndóò pial ndu diolan le ndu veeloo.

¹⁵Abihayil va fuɲaa Ɛstɛr ni, Abihayil kon va fuɲa pɔmbɔ Mardosee-o ni, Mardosee manda Ɛstɛr-o pɛɛn. Telen Ɛstɛr-o tiiyaa le kɔlan masaa o hɔl, o ɲuna ɲɛ-ɲɛ celen te, fɔ ɲɛ Heke va cɛi mandaa n'vanlaandu kon hɔlten-ndo cɔm ndu-o. Mí Ɛstɛr va vanaa va ndu cɔu-va kpow hɛnanndo.

¹⁶O vɔsi ŋɔmmɛwndɔɔ nin o masale Sɛrsɛs len bɛngu, o paangii tɔ́ndɔɛi nin, paangii Tebɛt-e pɛɛn, má kɔa a Ɛstɛr o cɛi lemasa ndu Sɛrsɛs-o nin.

¹⁷Mí masaa kaola Ɛstɛr hiovɔɔ vanlaandua tɔ̀a kpow coo, mó ca ndu ɲia, mó tosal ndu dɛnɛ kɛndɔɔ hiovɔɔ cuaambɔa laandua tɔ̀a sina vɔ dɛnɛ vanapɔnɔ le-a kpow coo. Mó vow ndu mɔsil lemasaa, mó siinguu ndu laa ndɔ kɔllo o fonda Vasti-o.

¹⁸Le Ɛstɛr bɛɛlen keo, mí masaa tuisi kafoo, mó veelu vanaa bɛndua va ndu o ba bɛngu-a a vanaa ndɔa baalaa. Mó faŋa tàndàlan muloo kuee, mó faandia vannda ɲɛm kɛndɛn lemasan taw.

¹⁹Lɔ́ɔ́ nda cuungiaa cuaambɔa laandua cuungiaa diinndɔɔ-o, Mardosee va baalaa o cɛi lemasaa nin.

²⁰Ɛstɛr cɔm vana-mangalaa-isɔɔ súú o va-o le, o cɔm vɛlɛ yungu o fula nin-ndo le, maa mɛɛ Mardosee ndóò dimul ndu yɛ. Mó lo sɔɛi Mardosee-e biyɔɔ maa telen o va ndu o ba bɛngu-o.

²¹O palɛi ken nin, Mardosee va baalaa tosaa o cɛi lemasaa nin. Mí Biktan nda Terɛk va diola luɛyaala cɛi lemasa cumullo-a tuu le masaa Sɛrsɛs diyɔɔ, bau ndáà tuulu kɔl a ndu.

²²Mí Mardosee tuɛi tuu nda kon, mó dimul Ɛstɛr lanɔɔ masaa, mì ndu kɔ tɛɛngul masaa sɔɔn mún o diola Mardosee lan.

²³Mí masaa yaasiaa dɛnɛ kon, mó saalun maa toɲaa o va ni. Má landu vanaa ŋiɔŋaa kan o yɔmndo. Mí dɛnɛ kon sɛvan o sɛbɛ dɛnnda lemasalan nin masaa Sɛrsɛs pila o hɔl.