Read Kissi Ɛstɛr 4 Bible Online

Ɛstɛr 4 - Kissi bible

Ɛstɛr 4

¹Mardosee ndóò sinaa dɔ́ɔ́ dɛnnda va lan yɔŋnɔnndo lan kpow, mó sɛɛsian volɔɔlan lekɔɔ, mó vownun yalala yuululan, mó vownun pultan o lebol. Mó fula kobio balɔɔ, mó va yondaa kpélén a mɔnɛi.

²Mó kɔ mɛɛlu o cɛi lemasaa sondoo, kani vana-vana óò lueì lon a volɔɔla biisilan lekɔɔ le.

³O tàndàlan kpow nin, nɛɛ-nɛɛ tɔŋ masaa ndóò yii kon-ndo ndóò tueinun pɛ, ndóò siŋnun maa dɛnɛ biisi bɛndu le Yuifia. Má kandu sumndo biyɔɔ, caŋndo a koŋullo, mí vannda taw a vownun yalalan, má va hinilan o pultan nin.

⁴Mí buɛyaa laandua Ɛstɛr-a a vanaa masaa ndóò kɛsi kɔllo coo le ndu kandaa-a kɔ cɔm ndu sɔɛi ken, mí Ɛstɛr lanɔɔ masaa laasian kɔllo kpede. Mó yɔŋ Mardosee volɔɔla cuɛinanndan, haliko mi ndóò soli yalala yuulula va ndu lekɔɔ lan, kɛ Mardosee cɛl te.

⁵O kon kɔɔli, mí Ɛstɛr veelu Hatak va vana pilɛ o vanaa masaa ndóò kɛsi kɔllo-a tɛɛn-ndo, o masaa ndóò yɔngu Ɛstɛr le ndu baalaa tosallo-o, mó viam ndu o Mardosee lo le ndu sɔɛi ken dindillo lenin a le sinaa le kɔlɔ ndóò tosa lende-o.

⁶Mí Hatak kɔ komal Mardosee isisi o bɛ́ɛ̀, o dio cɛi lemasaa sondoo.

⁷Mí Mardosee downun ndu kona a dɛnɛ yɔŋnun-ndo kpow o kɔɔ, mó dimul ndu vɛlɛ mɛɛ Haman ndóò yii kpemaa le volin bɛndon lueiyo o kesu lemasaa nin le Yuifia kpow diwvo yɛ.

⁸Mó yɔngu vɛlɛ Hatak sɛbɛ tɔŋ ndóò sɛvan kon, mí sɔɛi ndɔɛi ndíì yondan Suse le Yuifia diwvo-o, le kɔlan Ɛstɛr ndu cɔmndo a le ndu konaa downɔnndo. Mí Mardosee congun vɛlɛ maa Ɛstɛr kɔ o masaa lo, mò kɔ tɛɛlun ndu haliko mo tuinun yungu ndɔɔ iɲíí.

⁹Mí Hatak kɔ tɛɛngul Ɛstɛr sɔɔn Mardosee-on.

¹⁰O kon mí Ɛstɛr dimul Hatak maa o muungu mò kɔ dimul Mardosee aa:

¹¹«Buɛyaa masaa kpow a vanaa co o kobila lebolta lemasalan nin-nda kpede a sina maa tɔŋndo co o yiyaa le vannda kpow, maa o va vanapɔnɔ, o va vanalanɔ, vana-vana luɛi pɛ o bɛ́ɛ̀ cɛi lemasaa nin le kɔlan o masaa lo, te o co masaa pila le veelu ndu le, vana kon bɛnda mò vi. Fɔ nin mì masaa yulu tinda ndɔ n'sianio vana kon o hɔl, malan o sɔla baŋaa. Ya yɛ, o co nin hau palɛi beleyaa, i sɔla vɔ veelu le kɔlan o masaa lo le.»

¹²Mardosee tueyɔɔ sɔɔn Ɛstɛr dimi-on,

¹³mó mulul ndu aa: «Yiyan te maa dɛnɛ palaa kelun le Yuifia-o biandunin nɔm, ma lo yoomu nɔm pilɛ kpé, le tùú nɔm co o cɛi lemasaa nin-ndo.

¹⁴Taa lo pɛ tofaa ma dimi ɲɛ-ɲɛ le, pɛngio a baŋan Yuifia co hunɔɔ fula nɛɛ celen, kɛ nɔm pila a yungu nɔmndo, la sɔlanin piɔ́mndo. Nɛ̀ɛ́-nɛ̀ sina yɛ te o co le dɛnɛ vaa nuaa le n tiiya o fonda vaa nuaa o masalen nden nin te?»

¹⁵O kon mí Ɛstɛr mulul Mardosee aa:

¹⁶«Kɔ cuungiaa Yuifia co Suse-a kpow nɛɛ pilɛ, mì la bii sumndo le ya, la dia ɲɛ-ɲɛ le, la kol te, háá palɛi ndii yáá, niinoo a lɔan. Ya bɛɛ, i biinin sum pilɛ kon naa buɛyaa nia laandua. O kon kɔɔli, i kɔanin o masaa lo, hali tɔŋndo co bɛɛ o yiyaa lende. Te vu ni, i kɔ vu.»

¹⁷Mí Mardosee kɔa, mó kɔ tosa mɛɛ Ɛstɛr dimul ndu yɛ.