Read Kissi Ɛstɛr 6 Bible Online

Ɛstɛr 6 - Kissi bible

Ɛstɛr 6

¹Icɔl kon, masaa nɔla lɔan te few, mó ɲuna le ndu sɛbɛ sɔɔn paandun lemasan sɛvan nin-ndo cuuo haliko ma dimi sɛbɛ kon ndu masaa o hɔl.

²Má komal bungɛi pum lenin, nɛɛ Mardosee ndóò cɔɔmuu vanaa ŋiɔŋaa masaa ndóò kɛsi kɔllo coo le cumullo o dio luɛyaa cɛi lemasaa-a, Biktan nda Terɛs pɛɛn. Vanaa ŋiɔŋaa kan ndáà yii masaa Sɛrsɛs dúmbú le ndu diyɔɔ ni.

³Mí masaa ɲuna aa: «Yɛɛ ndáà tosa yɛ le Mardosee vɔ̀ngɔ̀ɔ́ dɔvɔɔ le dɛnɛ ndóò tosa kon-ndo? Dɛnɛ lebɛɛ yɛ̀ɛ̀ ndáà tosa yɛ le ndu?» Mí buɛyaa va baalaa o masaa lo-a muli aa: «A tosa ɲɛ-ɲɛ le ndu le.»

⁴Kɛ mí masaa ɲuna aa: «Nɛ̀ɛ́ co yɛ o bɛ́ɛ̀ lemasaa nin?» A telen kon kpafii Haman tiiya o bɛ́ɛ̀ lemasaa nin ni. Ndóò kɔɛ le masaa ɲunaa le Mardosee landɔɔ o yɔm ndóò bɛɛndiaa le ndu-o coo.

⁵Mí buɛyaa masaa mulul ndu aa: «Haman co isisi o bɛ́ɛ̀ ni.» Mí masaa dimi aa: «Mɛɛ o luɛi!»

⁶Mí Haman luɛi, mí masaa ɲuna ndu aa: «Yɛɛ vana tosa yɛ le vana masaa yeema le bɛɛlen keo-vo?» Mí Haman ɲunan o kɔl ndɔɔ nin aa: «Ɔ́ɔ̀ vana celen masaa yeema le bɛɛlen keo-vo, te o co ya le?»

⁷Mí Haman mulul masaa aa: «Te masaa yeema pɛ le vanndo bɛɛlen keo,

⁸mɛɛ a hun a doma bɛndu lemasa masaa vownun nin paandu-o, mà hin vɛlɛ a so masaa hel nin paandu coo-o, so ndáà vow nin paandu mɔsil lemasaa o lebol-lo pɛɛn.

⁹Mà yɔngu vana pilɛ o simlacia tɛɛn doma bɛndu kon a so kon, mì ndu vow vana masaa yeema kon le bɛɛlen keo-vo doma bɛndu lemasa kon, má heelu ndu o so kon coo, mà kɔɛ a ndu o falii kobio, mà kɔɛ a yondaa ndu laci aa: ‹La tofa vɔ ɲɛ vana tosà le vana masaa yeema le bɛɛlen keo-vo-o!›»

¹⁰Mí masaa dimul Haman aa: «Mɛɛ keleŋa lakɔ cɔ́-cɔ́, má kɔ cua doma bɛndoo a sow mɛɛ n dimi yɛ, mà tosa ɲɛ n dimi-o kpow le Mardosee Yuifinɔ, o co baalaa tosa o cɛi lemasaa nin-ndo. Pɔɛɛnun ɲɛ-ɲɛ le tosaa o sɔɔn n tuu-on nin te dɛ!»

¹¹Mí Haman kɔ cua doma bɛndoo a sow, mó vow Mardosee doma kon, mó heelu ndu o sow coo, mó kɔa a ndu o falii kobio, mó va dimio aa: «La tofa vɔ ɲɛ vana tosà le vana masaa yeema le bɛɛlen keo-vo-o!»

¹²O kon kɔɔli, mí Mardosee muungu o bɛ́ɛ̀ lemasaa. Mí Haman muungu a kiltan o ndu lo a mɔnɛi, a bollen le tundaa.

¹³Mó kɔ downun Serɛs laa ndɔ a caaŋaa ndɔa kpow kona a ɲɛ yɔŋnun ndu-o. Mí vanaa ndɔa silaa kan a Serɛs laa ndɔ a dimul ndu aa: «Te Yuifinɔɔ Mardosee n kandu kon siɛmbulan tolɔɔ o hɔl-lo co ni, mɛɛ a nɔlanin ndu ɲɛ-ɲɛ tosa le. Sínà maa siɛmbulan la cɔɔlunin nɔm tolɔɔ ndu o hɔl.»

¹⁴A va vɔ ndu sɔɛi ken dimullo, mí vanaa masaa kɛsi kɔllo coo-a hun le kɔlan cɔ́-cɔ́ nda Haman-gaa le ɲɛdiaa kafo Ɛstɛr lanɔɔ masaa ndóò bɛɛndiaa dioo.