Read Kissi Ɛstɛr 7 Bible Online

Ɛstɛr 7 - Kissi bible

Ɛstɛr 7

¹Mí masaa nda Haman a kɔa le dioo o Ɛstɛr lanɔɔ masaa lo.

²O paale diinndɔle len bɛɛ, ndáà ciiyo dioo, mí masaa ɲuna vɛlɛ Ɛstɛr aa: «Ɛstɛr laa ni, yɛɛ nɛ n yeema yɛ mì yɔngu nɔm? Ɔ́ɔ̀ bahavɛi nɔmndo? Hali o va bɛɛ aa masalen táláá pilɔɔ n yeema ni, i yɔngunin nɔm.»

³Mí Ɛstɛr lanɔɔ masaa muli aa: «Masaa, màá cɔ ya ɲia, mà cɛl sɔɛi ya co nɔm dimul-le. I yeema mà baŋa yoomu nuu. Hee ya yeema nɔm o ba ni. Handɔɔ o kon coo, i yeema mà baŋa yoomu vanaa nia. Piɛile nilen le co len ni.

⁴Kani vanaa nia a ya pila kpow, a cii naa pisi le naa diyɔɔ, le naa tɛɛmbuuo a le naa ciiyo selemenden. Te ndóò va pɛ maa le siŋnɔnndo cɛa piaandua a cɛa laandua ndáà pisi naa ni, i ve ɲɛ-ɲɛ dimi le, kani dɛnɛ palaa kon ndu ndóò tosanin mì vana óò kpeeŋiaa nɔm masaa le[1].»

⁵Mí masaa Sɛrsɛs ɲuna Ɛstɛr laa ndɔ aa: «Nɛ̀ɛ́-nɛ̀ kon? Kuɛɛ nɛ vana tuu tuu kon-ndo co yɛ?»

⁶Mí Ɛstɛr muli aa: «Yaamɔɔ kon, vana vɔɔn kon, ndu co Haman ni!» Fɔ́ɔ́fɔ̀, mì siòòŋii bɛndu-bɛnduei bii Haman nɛɛ o va icali masaa nda laa ndɔ o hɔl-la.

⁷Mí masaa can tangban a kɔltuw bɛndoo, mó faŋan o tabali nda va dioo-o, mó kɔa o nakɔ cɛi lemasaa nin. Mí Haman dɔaw taasi maa masaa ndóò kelu le ndu dɛnɛ palaa tuisio coo. Le hee, mó koma lo Ɛstɛr lanɔɔ masaa tɛɛlɔnndo le yoomu ndɔɔ baŋaa.

⁸Telen masaa fula o nakɔɔ nin, mó muungu cɛinin nɛɛ nda va ɲɛdiaa dioo-a-o, mó komal Haman o delaa o kpɛŋɛ Ɛstɛr-o coo nɛɛ ndu Ɛstɛr va o icali-a. Mí masaa yonda aa: «Vɛ̀ɛ̀ langbanɔɔ ho yeema vɛlɛ mò kpuva lanaɔɔ masaa ya masaa pila o hɔl cɛinin nanu?» Lɔ́ɔ́ pá mó cii ɲuna kon, mí vanaa ndɔa baalaa yii Haman kolaa o hɔl.

⁹Mí Harbona, langbanɔ pilɛ o vanaa masaa ndóò kɛsi kɔllo coo-a tɛɛn o dimul masaa aa: «Haman cii yɔmndo bɛɛndiaa le Mardosee vana va sɔɔn kɛndɛn masaa dimio-o landɔɔ, yɔm kon co o ndu lo bɛɛ. Bandii ndɔɛi co háá dunndo beleŋuɛɛnu.» Mí masaa dimi aa: «Mɛɛ a kɔ landu ndu pila lon!»

¹⁰Má kɔ landu Haman o yɔm ndóò toosiaa kon le Mardosee-o. O kon mí masaa ɲulul kɔl.