Read Kissi Ɛstɛr 8 Bible Online

Ɛstɛr 8 - Kissi bible

Ɛstɛr 8

¹Paale pilɛle len, mí masaa Sɛrsɛs yɔngu Ɛstɛr laa ndɔ ɲɛ-sɔlaa cɛi Haman va kon yaamɔɔ Yuifia-o kpow. Mí Mardosee hun masaa o hɔl, kani mí Ɛstɛr cɔm ndu masaa vanayɛi va ndu tɛɛn nda Mardosee-e.

²Mó soli kelɛi ndɔɛi ndóò poonda Haman o ba-e, mó ke Mardosee. Mí Ɛstɛr handu vɛlɛ Mardosee ɲɛm Haman-ndon bollen.

³Mí Ɛstɛr del vɛlɛ masaa o labɛngunin a caŋndo le ndu tɛɛlɔnndo, haliko mi ndóò tɛɛmbuu tuulan a yiyannda Haman fula kon o polale Akak len nin-ndo ndóò nɔ le Yuifia kpede diwvo lan.

⁴Mí masaa yulu tinda ndɔ n'sianio Ɛstɛr o hɔl, mí Ɛstɛr can mó sim.

⁵Mó dimi aa: «Te masaa cɛl pɛ, mò ce ya ɲia, te o cɛl pɛ sɔɛi ya co ndu dimul-le, te o va pɛ aa dɛnɛ nuu hɛnan ndu, mɛɛ sɛbɛlan la sɛvan, mò tɛɛmbuu sɔɔn va o sɛbɛla Haman, po Hammedata fula kon o polale Akak len nin-ndo ndóò sɛva le Yuifia va o kobila leboltan nin-nda kpow diwvo lan.

⁶Kani vɛ̀ɛ̀ ya lo yɛnin tofaa mì dɛnɛ palaa tol vanaa nia coo? Bàà mì lo tofaa mì polale vanaa nia le cuu?»

⁷Mí masaa Sɛrsɛs dimul Ɛstɛr laa ndɔ nda Mardosee Yuifinɔ aa: «Ya ya, i cii nin Ɛstɛr ɲɛm Haman-ndon yɔngu, mí landu Haman o yɔmndo le yeema ndóò yeema le Yuifia diwvo-o.

⁸Niaa pila sɛva dɛnɛ kɛndɛ vana tosal Yuifia, mà hini kɔl-lo. La sɛva sɛbɔɔ o diola nilan, mì la handu pondale kelɛi nii lecoo. Kani sɛbɔɔ sɛvan pɛ o diola masaa, mì pondale ndɔlen le handun lecoo, sɔɛi ken melnun lɛŋ te.»

⁹Paale len, paangii yàándɔɛi va malɔ bidiin a leyàá, má veelu vanaa sɛvaa masaa, má sɛval Yuifia, vanaa lebolla, masaa n'bungaa a simlacia va o tàndàla bidiinnda lan nin-nda, kandɔɔ Ɛnde, kɔlan tiiya háá Etiopii, tàndàla lan la va kɛmɛ bidiin a laŋɔmmɛw. Lende Mardosee ndóò dimi le tosaa ni. Má sɛwviaa sɛbɛlan, kobi oo kobi a sɛva ndɔ a o sɔɛi mangalɛi vannda ndáà dimi lon-nde nin, má sɛval vɛlɛ Yuifia o sɛva ndaa a o sɔɛi ndɛi mangalɛi nin.

¹⁰Má sɛwviaa sɛbɛla lan o diola masaa Sɛrsɛs lan, má pila pondale kelɛi ndɔɛi lecoo. O kon má yɔngu vanaa ɲaanun soa-a lan, mí nda hel o soa téndéa nda hɛli o cɛi mandaa soa lemasaa nin-nda coo, má piɔw lan.

¹¹Mí masaa sɛva o sɛbɛla lan nin maa Yuifia va o kobila yɛ́-yɛ́la va o tàndà kon nin-ndan-nda cuungian nɛɛ pilɛ mà baŋa yoomu ndaa. Te vana-vana ndóò tiŋ nda pɛ a sɔngɔɔ, o va vanaa cɔvaa va le lɛŋnden kpow-va, o va vanaa cɔvaa va o tàndàla lan nin-nda, a del vanaa kan coo, mà diw cuavaa ndaa a laandaa ndaa, mà poondiaa ɲɛm ndan kpow.

¹²Sɔɛi masaa cɛl ken-nde ndíì bɛnda le tosanndo o paale pilɛ len bɛngu, o lɛŋnde ndɔlen kpow nin, o paale tɔ́ a leyàándɔlen coo o paangii tɔ́ a idiinndɔɛi nin, paangii Adar pɛɛn.

¹³Sɔɛi ken va i sɛvaa o sɛbɛla o sɛva lan-ndan nin, le ndi yondaa o tàndàla pilɛn-pilɛnndan nin, le vannda dimullo maa Yuifia vanin a bɛɛndian paale len le yaamɔaa ndaa simullo.

¹⁴Mí vanaa piɔw sɛbɛlan-nda hel o soa lemasaa coo, má fula cɔ́-cɔ́ le kɔlan sɛbɛla lan yɔɔ maa mɛɛ masaa ndóò dimi yɛ. Fɔ́ɔ́fɔ̀, mì sɔɛi kalɛi yondan, mí i tiw o kobi lebollo Suse nin kpow.

¹⁵Mí Mardosee fula o masaa lo a doma ndɔ lemasa ndóò nɔ bungan humbon a yinɔɔ makaa-o lekɔɔ. Mó vownun mɔsil bɛndu n'siani lemasaa a doma kola keese siaŋaa lecoo. Mí vɔkɔ-vɔkɔ kɔlkɛndɔɔ can Suse ciee.

¹⁶Mí paale len le siŋnun paale ɲaalelen, paale dɛnɛ kɛndɛlen a paale lebɛɛlen le Yuifia.

¹⁷O kobila leboltan kpow nin a o kobi oo kobi nin, nɛɛ-nɛɛ sɔɛi masaa ndóò dimi ken o sɛbɛlan coo-e tiiya, mí i siŋnun dɛnɛ kɔlkɛndɛ bɛndoo, ɲaaloo, kafo diaa a kponyoo le Yuifia. Mí vanaa bɔɔ-bɔɔ a siinguun nda pila Yuifia o lɛŋnde len nin, kani siòònde va nda taw a Yuifia.