Read Kissi Ɛstɛr 9 Bible Online

Ɛstɛr 9 - Kissi bible

Ɛstɛr 9

¹O paale tɔ́ a leyàándɔlen coo o paangii tɔ́ a idiinndɔɛi nin, paangii Adar, sɔɛi masaa ndóò yii tɔŋndo-e ndíì bɛnda le tosanndo ni. Yaamɔaa Yuifia ndáà nɔ o lakɔl maa a va nda tiwba paale len. Kɛ mí o nda ve kɔl too tosan, mí Yuifia nɔla vanaa va nda pɛɛsaa-a.

²Mí Yuifia cuungian o kobila va o tàndàla masaa Sɛrsɛs lan nin-ndan kpow nin le vanaa ndáà yeema le nda dɛnɛ vɔɔndo tosallo-a cɔlɔbaa. Vana-vana tiwba le nda simullo le, kani siòònde taw i va vannda kpow a nda.

³Mí vanaa bɛndua va o tàndàlan nin-nda kpow, masaa n'bungaa a vanaa baalaa masaa kpede va Yuifia malaa, bau siòònde va nda bɔɔ a Mardosee.

⁴Kani Mardosee ndóò nɔ fonda bɛndoo o cɛi lemasaa nin, mí diola ndɔlan la tiw o kobila leboltan kpow nin. Tɔ́ɔ́ ndɔɔ va hiovɔɔ laci a handɔnndo lecoo tuŋ.

⁵Mí Yuifia cuukuu yaamɔaa ndaa kpow a mɔɔn cɔwvon, má cii nda diw, má tosal vanáà pɛɛsa nda kan-nda mɛɛ ndáà yeema yɛ.

⁶O kobi lebollo Suse nin kínɛí, mí Yuifia diw vanpiaandua kɛmɛ leŋuɛɛnu (500).

⁷Má diw vɛlɛ Parsandata, Dalfɔn, Aspata,

⁸Porata, Adalia, Aridata,

⁹Parmasta, Arisai, Aridai a Vaisata,

¹⁰poaa tɔ́a Haman po Hammedata-o-a pɛɛn, Haman yɔŋnun kon yaamɔɔ Yuifia-o. Kɛ a yee ba o ɲɛm vanaa ndáà dii kan-nda le.

¹¹Ɲinkon-ɲinkon, mí masaa tuɛi mɛɛ kpɛɛ vannda ndáà vi o kobi lebollo Suse nin yɛ.

¹²Mí masaa ɲuna Ɛstɛr laa ndɔ aa: «O kobi lebollo Suse nin kínɛí, Yuifia diw n'van kɛmɛ leŋuɛɛnu (500), má tɛɛmbuu nda, handɔɔ o poaa tɔ́a Haman-nda coo. I sina vɔ o nda tosa o tàndàla tɔ̀la co o masale nilen nin-ndan-ndo le! Kɛ yɛɛ nɛ n yeema yɛ mì yɔngu nɔm?»

¹³Mí Ɛstɛr muli aa: «Màá masaa cɛl-la diom, mì Yuifia co Suse-a tosa siɔdii mɛɛ nda tosa hau yɛ, mà landu poaa tɔ́a Haman-nda o yɔmndo.»

¹⁴Mí masaa cɛl mì i tosan lende. Mí sɔɛi ken yondan Suse, o kon mí poaa tɔ́a Haman-nda sɔla landɔɔ o yɔmndo.

¹⁵O paale tɔ́ a lehiɔɔlundɔlen coo o paangii Adar nin, mí Yuifia va Suse-a cuungian vɛlɛ, má diw vannda kɛmɛ leyáá (300), kɛ a cue ɲɛ-ɲɛ nda le.

¹⁶Mí Yuifia tɔ̀a va o tàndàla lemasalan nin-nda bɛɛ a cuungian le yoomu ndaa baŋaa yaamɔaa ndaa o ba. Má diw vannda vaalan belaŋɔmmɛw a laŋuɛɛnu (75 000) o vanaa va nda pɛɛsaa-a tɛɛn, kɛ a cue ɲɛ-ɲɛ nda le.

¹⁷Ken tosan o paale tɔ́ a leyàándɔlen coo o paangii Adar nin. O paale tɔ́ a lehiɔɔlundɔlen coo, má pɛngi, má siinguu paale len paale kafolen a paale ɲaalelen.

¹⁸Kɛ mí Yuifia va Suse-a nda cuungian o paale tɔ́ a leyàándɔlen coo a o paale tɔ́ a lehiɔɔlundɔlen coo. O paale tɔ́ a leŋuɛɛnudɔlen coo, má pɛngi, má siinguu paale len paale kafolen a paale ɲaalelen.

¹⁹Lelan Yuifia va a sɛŋiannda yondolan nin o sɔndɔkɔltan-nda tosà kafoo o paale tɔ́ a lehiɔɔlundɔlen coo o paangii Adar nin ni, mà dɔwnun ɲaale, mà yaw ɲɛdiaa, mà kennan vɛlɛ ɲɔɔn paale len.

²⁰Mí Mardosee sɛwviaa sɔɔn mún, mó piɔw sɛbɛla lan Yuifia va o tàndàla va o masale Sɛrsɛs len nin-ndan-nda kpow, piɔw lan vanaa va kpɛɛlun-nda a vanaa va levil-la,

²¹haliko mi ndáà va kafo kon tosaa vɔsi oo vɔsi, o paangii Adar nin, o paale tɔ́ a lehiɔɔlundɔlen a o paale tɔ́ a leŋuɛɛnundɔlen coo.

²²Le tùú Yuifia sɔla hɔ́ɔ́yɛi yaamɔaa ndaa o ba o palɛi ken nin, mí kɔl tambɛi ndaa siŋnun ɲaaloo, mí dɛnɛ palaa ndaa siŋnun kafoo o paangii ken nin-ndo, mó dimul nda maa a va kafoo tosaa o palɛi ken coo, mà va ɲɛdiaa kafoo yawvo, mà va ɲɔɔn kennanndo, mà va vanaa bala fondoa malaa.

²³Mí Yuifia cɛl má siinguu kafo nda kandu kon tosaa-o a sɔɔn Mardosee sɛval nda mún-ndon naamoo. Sɔɔn mún yɔŋnun mun ni:

²⁴Haman po Hamedata fula o polale Akak len coo-o, yaamɔɔ Yuifia ndóò tuu le Yuifia ciiyo o lepilɔɔ. Mó mal siondei le paale o va nda cii kon-nden sinaa.

²⁵Kɛ mɛɛ Ɛstɛr fula masaa o hɔl, mí masaa sɛva le dɛnɛ vɔɔn Haman ndóò tuu kon le Yuifia tuisio coo-o mingio ndu pila o lebol, má landu ndu o yɔmndo nda poaa ndɔa.

²⁶Le hee nda ke palɛi ken diolan ni aa «Purim» kon co dimio o pɛrsiei nin ni aa «Siondei malɔɔ.» Le dɛnnda Mardosee ndóò sɛva o sɛbɛ kon nin-ndan a sɔɔn nda pila ce má sina vakpa-on a le dɛnnda tosalan nda lan,

²⁷Yuifia siinguu palɛi ŋiŋii ken palɛi naamui vana nɔla faŋa le-i ni le nda pila, le cuavaa ndaa imamaa a le vana-vana handun nda coo. Vɔsi oo vɔsi, dɛnnda lan láà bɛnda le tosanndo o telen kelun-ndo mɛɛ o va o sɛvaa yɛ.

²⁸Le fɛɛn a fɛɛn, o yungu oo yungu nin, o tàndà oo tàndà nin a o kobi oo kobi nin, palɛi ken i bɛnda mì i va palɛi loonannde, mì vannda bii sɔɔn sɛvan a ndi o kɔɔ-on. Naamu palɛi siondii malaa kon bɛnda mò tambu Yuifia tɛɛn te. Kafo loonan kon bɛnda mò ɲum Yuifia tɛɛn te.

²⁹Mí Ɛstɛr, lanɔɔ masaa, cua Abihayil-lo nda Mardosee Yuifinɔ sɛva vɛlɛ sɛbɔɔ le sɔɛi kafo kon tiindaa.

³⁰Má piɔw sɛbɛla lan le Yuifia va o kobila kɛmɛ bidiin a laŋɔmmɛwla va o masale Sɛrsɛs len nin-ndan nin. Sɔɔn kɔlɲulon a sɔɔn loaa o lediom coo-on n va n'sɛvaa o sɛbɛla lan nin ni.

³¹Mí palɛi kafo siondii malaa kon i kialun o telen ndóò dimin-ndo maa mɛɛ Mardosee nda Ɛstɛr lanɔɔ masaa ndáà handu tɔŋndo yɛ, maa nda pila Yuifia loonun ndi le cuavaa ndaa imamaa, mà va sumndo biyɔɔ a cɛɛŋɔnndo.

³²Mí sɔɔn Ɛstɛr soo mun a siondii malɛi o kɔɔ-on siŋnun namoo. Lelan n co n'sɛvaa o sɛbɔɔ nin ni.