Read Kissi Fulaa 1 Bible Online

Fulaa 1 - Kissi bible

Fulaa 1

¹Diola poaa Yakɔb-a la co lan ni, a kɔɛ nda fuɲa nda-aa latulu o lɛŋnde Esipte len nin-nda. Tuma nda va kɔlan-ndo, mí vana-vana kɔa a yungu ndɔɔ:

²Rubɛn, Simeɔn, Levii, Yuda,

³Isakar, Sabulɔn, Bɛnyamɛn,

⁴Dan, Nɛftali, Kad a Asɛr.

⁵Kpow-kpow, a va vannda belaŋɔmmɛw, Yosɛf ndu va nin o lɛŋnde Esipte len nin.

⁶Mɛɛ nda viow tei, mí Yosɛf vu, mí bɛndaa ndɔa cuu vu, mí kunda tase kon bɛɛ cuu vu kpow.

⁷O kon kɔɔli, mí vanaa tɔ̀a lo lon-nda koma kui taw-taw, má sɔla kpaayaa. A lo kuiyo tei, má tiw o lɛŋnde len nin sɔ́.

⁸Kɛ telenndo pum tiiyaa, mí vana celen sul masaa o lɛŋnde Esipte len nin. Masa kon ndóò síná Yosɛf le.

⁹Mó dimul vanaa ndɔa aa: «La tofa vɔ dɛnɛ! Vannda ha co kuiyo dɛ! Israɛlla pɛɛn. Nduyɛ a hiow naa kpaayaa.

¹⁰Lelan, n nuwvian taasio a dɛnɛ ndaa o kɔɔ, yɔŋii nda lo kui bɛndoo ho. Kani vannda bɛɛ hinul naa a cɔwvo ni, à nɔla mà del yaamɔaa naa kan kɔɔli le naa cɔlɔbaa, o kon à faŋan o lɛŋnde naalen nin.»

¹¹O kon mí Esiptea handu Israɛlla mɛlɛsoŋnda coo le nda tundɔɔ o baala lepɔtɔllo nin. O baala kon tosaa, má tangul kobilan tan tiɔn: Pitɔm a Ramsɛs, leFaraɔnnɔɔ vaa baloo mandaa lenin.

¹²Kɛ nduyɛ, mɛɛ ndáà saangiaa nda faw, lende koni ndáà hiaw laci a kuiyo a á lɛŋnden hiɔlɔɔ. Mí siòònde bii Esiptea a sɔɛi he[1].

¹³Má saangiaa Israɛlla a kɔlvesɛiyo taw.

¹⁴Má bɛpɛla nda bɛpɛlaa pila a valta kálà-kálàlan tosaa: puuloo lindaa, kpilikion lɔu a valta yondolan. Mbɔ̀ a bɛpɛla bɔɔ cuavaa Israɛlla o baalala lepɔtɔlta súú-súù ka nin.

¹⁵O Hebreea lo, vanlaandua sokoa-vialaa pum va lon nda ŋiɔn: o pilɛ diolan Sifra, o pilɔɔ Púa. Mí masaa Esipte dimul nda aa:

¹⁶«Te vanalanɔ Hebreenɔɔ va nin pɛ violɔɔ, la mɛɛndan hɔ́ɔ́ o co kon violɔɔ-o, te cɛlɛkpɛ piaandoo ni, la dii ndu. Kɛ te o laandoo o co violɔɔ ni, la mɛi ndu yoomu.»

¹⁷Kɛ le mɛɛ sokoa-vialaa kan ndáà nɔ siòòŋii Hala-e yɛ, a ve tosa mɛɛ masaa Esipte ndóò dimul nda yɛ le, a ve cɛlɛkpɛa piaandua diyɔɔ le.

¹⁸Le hee, mí masaa Esipte veelu nda, mó ɲuna nda aa: «Le yɛɛ niaa co yɛ tosaa lende? Le yɛɛ mì la va cɛlɛkpɛa piaandua mɛiyo yoomu?»

¹⁹Mí sokoa-vialaa kan mulul ndu aa: «Vanlaandua Hebreea co maa vanlaandua Esiptea le, dialun kalan pila nda nɔ ni. Pulei biŋin nda pɛ, telen pá mì sokonɔ-vialaa tiiya, o komal nin a cii violɔɔ.»

²⁰Mí Israɛlla cɔɔlu kui taw, má sɔla kpaayaa. O kon mí Hala tosal sokoa-vialaa kan dɛnɛ kɛndɔɔ taw-taw.

²¹Le tùú sokoa-vialaa kan ndáà vo Hala-o, mí Hala ke nda cuawva.

²²O kon mí Faraɔnnɔɔ yii tɔŋndo o lɛŋnde ndɔlen nin kpow aa: «Te vanalanɔ Hebreenɔɔ velu nin pɛ hɔ́ɔ̀, o va pɛ o piaandoo, la kɔ viow ndu o pee bɛndoo Nil, kɛ te o va pɛ cɛlɛkpɛ laandoo o velu ni, la mɛi ndu yoomu.»