Read Kissi Fulaa 10 Bible Online

Fulaa 10 - Kissi bible

Fulaa 10

¹Mí Mɛlɛka dimul Moise aa: «Kɔ o Faraɔnnɔɔ lo, kani ya Mɛlɛka kindi ndu nilan nda vanaa ndɔa baalaa ni, haliko mi tuisi nda kpundɛlan-ndan kpow coo.

²O kon kɔɔli, mì nɔm Moise hun dimul fɛɛn cuavaa nɔmnda a cuavaa nɔmaa imamaa mɛɛ ya soli mɔnɛ a Esiptea yɛ, a mɛɛ ya tuisi nda kpundɛlan coo yɛ, haliko mi la sina o kon maa ya co Mɛlɛka ni.»

³Mí Moise nda Aarɔn a kɔa o Faraɔnnɔɔ lo, má dimul ndu aa: «Mɛlɛka soo nuaa ni, Hala Hebreea pɛɛn aa: ‹Vɛ ma va kɛɔ tuisinndo ya o labɛngunin? Mel-la cuavaa niaa mà kɔ biilu ya.

⁴Taa kɛɛ pɛ le nda malɔɔ, i co siɔdii sóónɔa tuisi o lɛŋnde nɔmnden kpow coo.

⁵Sóónɔa co hulɔn háá mà kumbu lɛŋnden mɔku-mɔku, vana cinin lɛŋnde fondolen te fɔ nda. Tɔlɔɔ oo tɔlɔɔ loeon mɛi le tɛɛmbuuo, sóónɔa kan co lan dio selemenden. A co vɛlɛ yɔmii co vulɔɔ mí i va hindɔɔ yondoo nin-nde dio kpede.

⁶A co piɔ o cɛila nɔmndan nin, o cɛila vanaa nɔmaa baalaa nin a o cɛila Esiptea nin kpow. O vanin bɔɔ kpundɛ bɛndu. Cɔn a fuɲaa nɔmaa mamaa, kɔ bii a fuɲaa nɔmnda, háá a paalen nden hau, vana ci vɔ dɛnɛ vaa lende le.›» O kon, mí Moise fulan o Faraɔnnɔɔ lo, mó kɔannun.

⁷Mí vanaa baalaa Faraɔnnɔɔ a dimul ndu Faraɔnnɔɔ aa: «Yee mà lo tofaa háá mì langbanɔɔ ho lo naa dɛnɛ palaa ho tuisio coo? Mal vannda ha mà kɔ biilu Mɛlɛka Hala ndaa. A sina vɔ maa tambei le Esipte tambu nuaa le?»

⁸Má mingi vɛlɛ Moise nda Aarɔn o Faraɔnnɔɔ pila lo. Mó dimul nda aa: «La kɔ mì la kɔ biilu Mɛlɛka Hala niaa. Kɛ ɔ́ɔ̀ vanaa bɛnda le kɔlan-nda?»

⁹Mí Moise muli aa: «Naa kpow n bɛnda le kɔlan ni, kandɔɔ a felengia, kaasoŋaa yuuvɛiya, vanpiaandua kɔ bii a vanlaandua. N co vɛlɛ lakɔ a cɔlua naa: saa, cuinnda a nawva. Kani n bɛnda mì n tosa kafoo le Mɛlɛka naa biiloo.»

¹⁰Mí Faraɔnnɔɔ mulul nda a kpaavɛi aa: «Màá Mɛlɛka lo niaa ikɛi telen ya malnin niaa kɔlan a yungula niaalan-ndo! Kɛ dombio fúú niaa co ni.

¹¹Lelan, kɛì-kɛì bɛɛ! Vanpiaandua kínɛí co lakɔ ni mà kɔ biilu Mɛlɛka.» O kon, má toaw nda, má soli nda o Faraɔnnɔɔ lo cɛinin.

¹²Kon tosanndo, mí Mɛlɛka dimul Moise aa: «Siɛndi ba nɔmndo o lɛŋnde Esipte len coo, haliko mi sóónɔa coŋ lecoo vuyɛɛ, mà de tɔlɔɔla loeon mɛi lan kpow.»

¹³Mí Moise siɛndi tinda ndɔɔ o lɛŋnde Esipte len coo, mí Mɛlɛka cua hoeiye fulaa a ba paalen le can-ndo. Mí hoeyii ken niinu hɔŋndo o lɛŋnde Esipte len coo kpɛŋ, mí i lɔl vɛlɛ hɔŋndo pii. Idiiyo, mí hoeyii ken hun a sóónɔa taw.

¹⁴Mí sóónɔa kan sɛŋin o lɛŋnde Esipte len nin, a va taw-taw. Kabi sindɛ, sóónɔa hin-ndɔ hunɔɔ bɛndu vaa lende Esipte le, nduyɛ, a hin ndɛnin vɛlɛ lɔ́ɔ́-lɔ́ɔ̀ lende le.

¹⁵Má kumbu lɛŋnden háá mí le yɔŋnun yim-yim. Má dia bil kiyɛiyo a tɔlɔɔla koamaala loeon mɛi lan. O lɛŋnde Esipte len nin kpow hali peele kiyɛilen a mɛi o yɔmnde coo a o billo coo yondoo nin te.

¹⁶Mí Faraɔnnɔɔ viam kiilaa le Moise nda Aarɔn veeloo cɔ́-cɔ́. Mɛɛ nda hin, mó dimul nda aa: «I cua hakio a Mɛlɛka Hala niaa, i cua vɛlɛ hakio a niaa pila.

¹⁷Lelan, la mal-la vɛlɛ haki o laan, mì la tɛɛlun Mɛlɛka Hala niaa, mò baŋa ya a kpundɔɔ ho.»

¹⁸Mí Moise fula o Faraɔnnɔɔ lo cɛinin, mó kɔ piɛi Mɛlɛka.

¹⁹O kon, mí Mɛlɛka cua hoeyii bɛndu-bɛnduei a ba paalen le del-lo, mí hoeyii ken kɔandu sóónɔa kan, mí i kɔ viow nda o mɛmma ihɛlma makpɛ̀ndɛ̀an nin. Hali sóónɔɔ ndu pilɛ o lo o lɛŋnde Esipte len nin te.

²⁰Kɛ mí Mɛlɛka kindi vɛlɛ Faraɔnnɔɔ nilan háá mó kɛɛ le Israɛlla malɔɔ kɔlan.

²¹Mí Mɛlɛka dimul Moise aa: «Heelu ba nɔmndo coocoo haliko mi ɲumma bɛndu-bɛnduan ma tol o lɛŋnde Esipte len coo kpow, ɲumma n'kpungbama man ma celulnin háá mì vana nɔla man pilanndo.»

²²Mí Moise heelu ba ndɔɔ coocoo, mí ɲumma bɛndu-bɛnduma n'kpungban ma toal o lɛŋnde Esipte len coo háá palɛi ndii yáá.

²³O palɛi yaii ken bɛngu, vannda Esipte a nɔla cananndo vellaa-velle le, kani vana-vana ndóò nɔla cɔnɔnndo o ndu lo le kɔlan nɛɛ celen te. Kɛ ɲɛ-tengaa va nɛɛ Israɛlla va icali-a.

²⁴Mí Faraɔnnɔɔ veelu Moise, mó dimul ndu aa: «La kɔ mì la kɔ biilu Mɛlɛka, la tiwba mì la kɔɛ a yungula niaalan. Kɛ la mɛi saa niaa, cuinaa niaa a navaa niaa nanu.»

²⁵Mí Moise dimul ndu aa: «Te n mɛi pɛ nda nanu, vɛ̀ɛ̀ nɔm a nɔlanin pá ma ke naa cɔlua le sálàla kɔlɲululan a sálàla loamaala naa n bɛnda le Mɛlɛka Hala naa solullo lan solio?

²⁶A cɔlua naa naa n co lakɔ ni, hali cɔloo ndu pilɛ o co lo nanu le. Kani o nda tɛɛn naa n solinin cɔlua sálàá le Mɛlɛka Hala naa ni. Kɛ naa pila n sina vɔ a naa n bɛnda mì n hɛli le ndu sálàá solullo a nda-a le, fɔ mì n tiiya lon.»

²⁷Kɛ mí Mɛlɛka kindi Faraɔnnɔɔ nilan háá mó kɛɛ le nda malɔɔ kɔlan.

²⁸Mí Faraɔnnɔ kon dimul Moise aa: «Faŋan ya o hɔl. I ca lɛ nɔm mà hun sim ya o hɔl te dɛ! Paale ya co nin nɔm cɔnnɔn o hɔl-ten, a co ɲinkon piɔ́mndo sɔla.»

²⁹Mí Moise mulul ndu aa: «A cii dimi, a ci lɛnin ya mì sim nɔm o hɔl te few.»