Read Kissi Fulaa 11 Bible Online

Fulaa 11 - Kissi bible

Fulaa 11

¹Mí Mɛlɛka dimul Moise aa: «I co vɛlɛ kpundɛ mɛɛlaa tuisi Faraɔnnɔɔ nda Esiptea coo. Te n malan pɛ naa ndu o laan vaŋ, o co niaa malɔɔ mì la kɔɛ. O co niaa bɛɛ tovɔɔ mì la faŋan o ndu lo le fɛɛn a fɛɛn.

²Lelan, soo o Israɛlla lo, ma dimul nda mì vanapɔnɔ oo vanapɔnɔ piɛi Esiptenɔ piaandu nda co nɛɛ pilɛ-o ɲɛm cɔwnun a volin humbon-ndon a n cɔwnun a sianion-ndon. Vanlaandua bɛɛ a bɛnda mà piɛi caaŋaa ndaa laandua Esiptea ɲɛm mun.»

³Mí Mɛlɛka yoola mí Esiptea ca Israɛlla ɲia taw-taw. Handɔɔ o kon coo, vana kúndàá bɛndoo Moise va o lɛŋnde Esipte len nin ni. Kandɔɔ a buɛyaa Faraɔnnɔɔ, kɔ bii a vanaa tɔ̀a Esipte kpede, ndáà nɔ bɛɛlen a Moise.

⁴Mí Moise dimi aa: «Mɛlɛka dimi aa a di-tɛɛndo, o co cɔnɔn mò kei o lɛŋnde Esipte len tɛɛn,

⁵mì poaa tasea a cɔlua piaandua tasea vi o lɛŋnde len nin kpow, kandɔɔ a po tase Faraɔnnɔ co masalen tosaa-o, po tase cɛ laandu co kpeyanndo cuvo-o, kɔ bii a cɔlu piaandu tase cɔloo kom-ndo.

⁶Yéélan la co isɔɔ o lɛŋnde Esipte len nin kpow, kabi bɛɛ yééla vaa lende la suu vɔ le, le fɛɛn a fɛɛn la suu lɛnin vɛlɛ lende le.

⁷Kɛ o Israɛlla lo, hali tunndo vana tuinin vanacieo busullo, te kon te cɔloo busullo le. Kon tosannin haliko mi la sina maa Mɛlɛka handu pɛɛngulan Esiptea nda Israɛlla tɛɛn.»

⁸Mí Moise cɔɔlu vɛlɛ dimi aa: «Paale len le tiiya pɛ, vanaa baalaa nɔmnda ha kpow a hunnin, mà del-la o labɛngunin, mà dimi aa: ‹Cua vanaa nɔmnda mì la kɔɛ›. O kon, i cuanin nda mì n kɔɛnnun.» Mí Moise fula o Faraɔnnɔɔ lo a kɔltuwvo taw.

⁹Mí Mɛlɛka dimul Moise aa: «Faraɔnnɔɔ yeŋnin nilan o sɔɛi niɛi mò bii ndi le. Kon kpow co tosan haliko mi vangala kpundɛlan Esiptea coo.»

¹⁰Faraɔnnɔɔ, Moise a Aarɔn o hɔl kpundɛlan ndan kpow la tosan ni. Kɛ mí Mɛlɛka kindi ndu Faraɔnnɔɔ nilan háá mó kɛɛ le Israɛlla malɔɔ faŋanndo o lɛŋnde ndɔlen nin.