Read Kissi Fulaa 13 Bible Online

Fulaa 13 - Kissi bible

Fulaa 13

¹Mí Mɛlɛka soaa o Moise lo, mó dimul ndu aa:

²«Poaa tasea a cɔlua piaandua tasea Israɛlla kpow, á bɛnda ma kɛsi nda a diandaa le ya Mɛlɛka. Kani po tase oo po tase vanalanɔɔ velu pɛ, cɔlu piaandu tase oo cɔlu piaandu tase cɔloo kom pɛ, le ya Mɛlɛka kan co ni.»

³Mí Moise dimul Israɛlla aa: «La loonun a paalen nden o kɔɔ, la va o cɛlen nin o lɛŋnde Esipte len nin, mí Mɛlɛka soli niaa lon a ba ndɔ kpaayaa. Lelan, la va pɛ kafo kon tosaa, la dia bulu toosian a lɛvɛnndo-o le.

⁴Hau niaa co fula o lɛŋnde Esipte len nin ni, o paangii Abib-e he nin.

⁵Lelan, lɔ́ɔ́ Mɛlɛka lueinin niaa o lɛŋnde Kanannda, Hitiia, Amoriia, Heviia a Yebusiia nin-ndo, lɛŋnde o yiilu fuɲaa niaa mamaa kpemaa le nda len yɔngoo len, lɛŋnde cɔlua a tɔlɔɔlan la naŋ nin taw-taw len, la bɛnda mì la tosa kafoo ho o paangii pilɛi he nin.

⁶O palɛi ndii ŋɔmmɛw bɛngu, la bɛnda mì la va bulu toosian a lɛvɛn too dioo. O paale ŋɔmmɛwndɔlen coo, la tosa kafoo le Mɛlɛka biiloo.

⁷Vana-vana bɛnda mò de bulu toosian a lɛvɛn too o palɛi ŋɔmmɛvii ken bɛngu. O lɛŋnde niaale len nin kpow, vana bɛnda mì vana saalun bulu toosian a lɛvɛnndo-o, te kon te lɛvɛnndo pila o laniaa lo le.

⁸Paale len le tiiya pɛ, la bɛnda mì la pɛɛku cuavaa niaa, mì la dimul nda aa: ‹Le tùú Mɛlɛka tosal naa dɛnɛ kɛndɔɔ telen naa n fula Esipte-o naa n co hee tosaa ni.›

⁹Maa mɛɛ ɲɛla co niaa layiyaa o laba a o n'tendu lan la co tɔɔmaseloo yɛ, lende duɲɛi he bɛnda ni mi i va tɔɔmasele loonanndo le niaa, haliko mi tɔŋ Mɛlɛka-o va niaa o lasondo. Kani ndu soli niaa Esipte a ba ndɔ kpaayaa ni.

¹⁰Vɔsi oo vɔsi, te paale len le tiiya pɛ, la tosa naamoo ho.

¹¹Tuma Mɛlɛka lueinin niaa o lɛŋnde Kanaan-nden nin-ndo, mɛɛ o mɛnalan niaa a fuɲaa niaa mamaa yɛ, telen o yɔngunin niaa lɛŋnde kalalen-ndo,

¹²la bɛnda mì la yɔngu ndu poaa niaa tasea a cɔlua piaandua tasea niaa kpow. Le Mɛlɛka kan co ni.

¹³Le sofɛlɛa yɛ, la tiwba mì la baŋa nda[17] a saa téndóó, te kon te a cuin téndóó. Te la yeema yɛ le ndu baŋa le, la yem ndu kɛsei. Kɛ o hɔ́aa niaa tɛɛn, la bɛnda mì la baŋa poaa tasea.

¹⁴Te cuavaa niaa ɲuna pɛ niaa aa: ‹Le kɔlɔ yɛɛ niaa co yɛ dɛnɔɔ ho tosaa?› La mulul nda aa: ‹A ba ndɔ kpaayaa Mɛlɛka soli naa o cɛlen nin o lɛŋnde Esipte len nin ni, cɛa naa n va lon ni.

¹⁵Kani mɛɛ Faraɔnnɔɔ va baŋnɔnndo kɛɔ le naa malɔɔ kɔlan, mí Mɛlɛka diw poaa tasea a cɔlua piaandua tasea o lɛŋnde Esipte len nin kpow. Lelan naa n sòli cɔlua piaandua tasea sálàá le Mɛlɛka ni, mì n baŋa poaa naa tasea.

¹⁶Maa mɛɛ ɲɛla co niaa o laba a o n'tendu lan la co tɔɔmasele loonanndo le Mɛlɛka yɛ, lende sálàlan ndan la co ɲɛ loonanndo le niaa le loonɔnndo a ba kpaaya Mɛlɛka soli niaa Esipte-o o kɔɔ ni.›»

¹⁷Mɛɛ Faraɔnnɔɔ mal yungoo Israɛl kɔlan, Hala muli nda hɔlla le keiyo a ba lɛŋnde Filistia le. Toɲaa, nɛi kon va nɛi bingio ni, kɛ mó dimi aa: «Taa kei pɛ a lon, mà sina maa cɔwla kàlà-kálàlan la co nda laci, siòònde co nda biyɔɔ mà muungun Esipte.»

¹⁸Le hee, mó muli nda hɔlla a ba lɛŋnde veselɛilen, a kpengii mɛmma ihɛlma makpɛ̀ndɛ̀an. Mí Israɛlla fula o lɛŋnde Esipte len nin a ɲɔɔn o ba taw[18].

¹⁹Mɛɛ nda cɛn kɔlan, mí Moise kɔa a paala Yosɛf lan. Kani mí Yosɛf ndóò veelu puapilɛa ndɔa sindɛ, mó dimul nda aa: «Hala vanin niaa ikɛi. Lelan, la mɛnan maa lɔ́ɔ́ niaa vanin kɔlan-ndo, la kɔanin a paala nilan.»

²⁰Mí Israɛlla faŋan Sukɔt, má kɔannun, má kɔ kila dɔ́ɔ́ngɔ́ɔ̀ Etam o lɛŋnde veselɛilen dangalaa.

²¹Mɛlɛka va nda kɔlan laci ipala o tindile ikumnden nin le nda nɛiyo cɔmndo, icɔl-lɛ o va kɔlan nda laci o tindile leyinnden nin le nda ɲɔɔ teengiallo, haliko mi ndáà va kɔlan ipala a icɔl.

²²Tindile ikumnden léè feŋan nda laci ipala oo ipala le, tindile leyinnden bɛɛ léè feŋan nda laci icɔl oo icɔl te.